FIS: Siguria në Zvicër po përkeqësohet, rriten rreziqet nga spiunazhi dhe terrorizmi

(KEYSTONE/Ti-Press/Elia Bianchi)

Situata e sigurisë në Zvicër po përkeqësohet nga viti në vit, sipas raportit vjetor të Shërbimit Federal të Inteligjencës (FIS), “Siguria në Zvicër 2025”, të publikuar të mërkurën. Tensionet gjeopolitike globale dhe kërcënimet hibride po ushtrojnë gjithnjë e më shumë presion mbi neutralitetin dhe sigurinë kombëtare të vendit, shkruan Swissinfo.ch, transmeton albinfo.ch.

FIS shpreh shqetësim të thellë për rritjen e rrezikut nga spiunazhi, sidomos ndaj teknologjisë dhe organizatave ndërkombëtare me seli në Zvicër. Përkeqësimi i marrëdhënieve midis SHBA-së dhe Kinës, si dhe bashkëpunimi në rritje mes Rusisë, Kinës, Iranit dhe Koresë së Veriut për të sfiduar rendin ndërkombëtar, pritet të ndikojë drejtpërdrejt edhe në politikën e sigurisë zvicerane.

Një tjetër kërcënim i madh që përmendet në raport është terrorizmi, me theks të veçantë në radikalizimin online të të rinjve. Sipas FIS, aktivitetet ekstremiste në internet janë bërë një burim i rëndësishëm i indoktrinimit dhe nxitjes së dhunës.

“Radikalizimi digjital dhe rritja e tensioneve ndërkombëtare po krijojnë një sfidë të re të sigurisë për Zvicrën,” theksohet në raport. Lufta në Ukrainë pritet të vazhdojë edhe gjatë vitit 2025, ndërsa konflikti në rritje mes Izraelit dhe Iranit paraqet një tjetër vatër destabiliteti me ndikim të gjerë, transmeton albinfo.ch.