Firma zvicerane dyshohet për korrupsion

Akuza e ngarkon atë se në emër të mitos i ka paguar një biznesmeni të Indisë 530 mijë dollarë amerikanë

Ndaj kompanisë zvicerane Rheinmetal Air Defence AG në Indi janë duke u zhvilluar hetime me dyshimin për përfshirje në korrupsion. Firma nga Cyrihu që merret me prodhim të armatimit dyshohet të ketë paguar një biznesmen të Indisë për tu dhënë ryshfet zyrtarëve të shtetit, të cilët pastaj do ta fshinin emrin e firmës nga lista e zezë.

Akuza e ngarkon firmën në fjalë se në emër të mitos i ka paguar personit në fjalë 530 mijë dollarë amerikanë. Ky i fundit dhe bashkëshortja e tij janë arrestuar të premten në kuadrin e një aksioni të gjerë policor.

Koncerni Rheinmetall nga Dyzeldorfi, që është firma amë e asaj të Cyrihut, në fillim të vitit qe futur në Indi në një listë të zezë të firmave që dyshoheshin për korrupsion.