Filmi në gjuhën turke “Köpek”, prodhimi më i mirë zviceran i vitit

Filmi «Köpek» ishte nominuar për pesë kategori ndërsa është shpallur fitues në tri prej tyre

Të premten në Cyrih është mbajtur solemniteti i ndarjes së çmimeve për filmat më të mirë zviceranë të vitit.

Filmi më i mirë artistik i Zvicrës për vitin 2015 është zgjedhur filmi në gjuhën turke «Köpek» i regjisores zvicerane-turke, Esen Isik. Bëhet fjalë për një film të angazhuar politikisht, që flet kundër diskriminimit të pakicave seksuale dhe të tjera, në Turqi.

Regjisorja Isik, për të cilën ky film është debutim në zhanrin e filmit të gjatë artistik ka fituar vite më parë trofeun për një film të saj të shkurtër artistik.

Filmi «Kopek» ishte nominuar për pesë kategori ndërsa është shpallur fitues në tri prej tyre. Ky film ka qenë i vetmi në konkurrencë, i cili është realizuar jashtë Zvicrës.

Konkurrent kryesor i filmit «Köpek» ka ene komedia «La vanitte e regjisorit Lionel Baier, film ky në gjuhën frënge, i nominuar në katër kategori. Çmimet i kanë fituar dy aktorë të këtij filmi: Patric Lapp është shpërblyer si aktori më i mirë ndërsa Ivan Georgiev si aktori më i mirë në rolet episodike.

Në kategorinë e filmit dokumentar ka fituar po ashtu filmi i një regjisori debutues, gjegjësisht «Above and Below» i regjisorit Nicolas Steiner.  Ky film ka fituar po ashtu edhe çmimin për montazhin më të mirë.

Çmimin për vepër jetësore e ka fituar kameramani 71 vjeçar nga Tesina, Renato Berta. Ai, gjatë karrierës së tij ka xhiruar filma bashkë me regjisorë të shquar si Jean-Luc Godard, Alain Tanner etj. Kameramanit Berta, çmimin i aka dorëzuar ministri federal i kulturës, Alain Berset.