Fifa: Shaqiri dhe të tjerët “mund të kalojnë” për Kosovën

De Gregorio, drejtor për komunikim në Fifa: “Mundësia që Shaqiri dhe të tjerët të kenë të drejtë për të luajtur për Kosovën është e madhe. Natyrisht nëse ata duan”

Përfaqësuesja zvicerane e futbollit, vazhdon të ketë një problem “kosovar”. Për herë të parë nga selia e futbollit botëror, Fifa vjen një përgjigje pohuese lidhur me atë se a mund të kalojnë në përfaqësuesen kosovare futbollistët me rrënjë shqiptare që sot luajnë për Zvicrën.

Gazeta “Blick” shkruan në versionin e saj online sot se “për herë të parë lidhur me problemin është pozicionuar edhe Fifa. Drejtori për komunikim është deklaruar kështu për gazetën: “Po, mundësia që Shaqiri dhe të tjerët të kenë të drejtë për të luajtur për Kosovën është e madhe. Natyrisht nëse ata duan”.

Në vazhdim gazeta shkruan për stadin ku ndodhet sot futbolli kosovar nga aspekti i pranimit të tij ndërkombëtar. Aty përmendet fakti se Kosova ende nuk është anëtare e Fifa-s dhe se për të qenë në këtë organizatë duhet që së pari shteti i Kosovës të pranohet në OKB dhe se dihen cilat janë kushte për këtë.  

Në gjendjen aktuale, kur përfaqësuesja kosovare e futbollit lejohet të luajë ndeshje miqësore ndërkombëtare, sipas “Blick” futbollistët kosovarë të Zvicrës kanë të drejtë të luajnë pa pasur pasoja. Por, ajo më tutje citon Shaqirin i cili ka thënë se “nuk dëshiron të luajë ndeshje miqësore  që kanë brenda një potencial të caktuar konflikti ose që mund të shkaktojnë probleme”. Por, ndërkohë Kosova synon të bëhet anëtare e FIFA-s dhe të marrë pjesë në kualifikimet për botërorin 2018. Shaqiri rreth kësaj thotë se “Në një rast të tillë do ta rishqyrtoj situatën”. Ngjashëm ka deklaruar për albinfo.ch edhe ylli tjetër shqiptaro-zviceran, Granit Xhaka.

Sipas Fifa-s rast i Kosovës mund të bëhet precedent. Drejtori për medie, De Gregorio thotë: “Do të kemi një pozicion të ri fillestar”. Nëse Kosova luan në kualifikimet për Botëror, Shaqiri dhe kosovarët tjerë mjafton të luajnë njëherë për Kosovën dhe pastaj nuk mund të kthehen më në kombëtaren e Zvicrës.