Fermerët zviceranë të shqetësuar për të ardhurat dhe barrën administrative

Foto nga arkiva (KEYSTONE/Martial Trezzini)

Fermerët zviceranë po e nisin me shqetësim vitin e ri. Ata përsëritën kërkesat e tyre të muajve të fundit në Kirchberg (BE) të premten: paga më të mira dhe më pak burokraci.

“Të ardhurat janë në stagnim, hendeku midis familjeve fermere dhe pjesës tjetër të popullsisë po zgjerohet,” ankuan Unioni i Fermerëve Zviceran (USP) dhe Unioni Zviceran i Fermerëve dhe Grave Rurale (USPF) të premten gjatë një konference për shtyp të organizuar në një Fermë Bernese në Kirchberg, në kantonin e Bernës.

Fermerët punojnë midis 60 dhe 66 orë në javë për një pagë më pak se 5,000 franga në muaj, argumentuan ata. Në këtë kontekst, sigurimi i pensioneve shpesh bie anash.

Ky presion i fortë ekonomik ka ndikim në shëndetin mendor të fermerëve, theksoi drejtori i USP Martin Rufer, duke kujtuar shkallën mbi mesataren e depresionit dhe vetëvrasjeve në këtë sektor.

Organizatat ombrellë bujqësore i bëjnë thirrje Këshillit Federal të “marr përgjegjësi” duke u garantuar fermerëve të ardhura të mjaftueshme dhe duke ulur barrën administrative.

Ata gjithashtu u bëjnë thirrje atyre që janë të përfshirë në zinxhirin e vlerës që të sigurojnë që të ardhurat e krijuara nga produktet e fermerëve të mbulojnë kostot e prodhimit. Çmimet janë shumë të ulëta, veçanërisht në prodhimin bimor, të cilat ndikohen nga luhatjet për shkak të ndryshimeve klimatike, sipas USP dhe USPF.

Një vit më parë, qindra fermerë demonstruan në të gjithë vendin me të njëjtat kërkesa. Por situata nuk ka ndryshuar rrënjësisht që atëherë, shpjegon në Forum Damien Rey, president i komitetit të fermerëve të rinj të Unionit të Fermerëve Zviceran.

“Ka pasur disa përmirësime, por ka pika që nuk kanë ndryshuar ose kanë ndryshuar shumë pak. Ne kemi mundur të kemi rritje të çmimeve në disa tregje, por më pak në të tjera. Ne jemi përpjekur t’i paraqesim këto kërkesa me Komisioni i Fermerëve të Rinj tash e pesëmbëdhjetë vjet, pa shumë sukses”.

Damien Rey vazhdon: “Revoltat e kësaj pranvere na kanë lejuar gjithashtu të kemi pak më shumë entuziazëm, një vizion mediatik të këtyre problemeve. Ato na kanë lejuar të arrijmë tek popullata dhe të ndërgjegjësojmë konsumatorët për problemin tonë.”

USP po pozicionohet tashmë kundër iniciativës për përgjegjësinë mjedisore për të cilën popullsia duhet të votojë më 9 shkurt. Teksti “do të prishte bujqësinë zvicerane në nivel ekologjik, por nuk do të ndryshonte asgjë në aspektin e konsumit. Importet thjesht do të mbushnin boshllëqet “, gjykon presidenti i organizatës ombrellë Markus Ritter.

Situata ishte veçanërisht e tensionuar në vitin 2024 në botën bujqësore, e cila u mobilizua në të gjithë Evropën dhe Zvicrën. Veçanërisht fermerët demonstruan me traktorët e tyre në rrugët e Gjenevës në fillim të vitit./RTS