Fatmir Limaj prapë akuzohet për krime lufte

Prokuroria Speciale e Kosovës ka ngritur aktakuzë për veprën penale krimi i luftës kundër popullatës civile, ndaj deputetit Fatmir Limaj  

Pas disa muajve të heshtjes, Prokuroria Speciale e Republikës së Kosovës ka ngritur aktakuzë të re kundër deputetit dhe Kryetarit të partisë Nisma  Fatmir Limaj nën akuzën për veprën penale: Krimi i Luftës kundër popullatës civile, gjegjësisht krimet e luftës për shkelje të rënd të Konventës së Gjenevës.

Sipas aktakuzës, rasti ka të bëj me vrasjen e dy civilëve: Ramiz Hoxha nga fshati Bellanicë dhe Selman Binishi nga fshati Banjë, komuna e Malishevës, të cilët me datë 02 nëntor 1998, janë marrë në afërsi të xhamisë së fshatit Bellanicë dhe janë ekzekutuar në hyrje të fshatit Kravasari.

Aktakuza e ngarkon të pandehurin Fatmir Limaj se, si pjesëtar i UÇK-ës dhe komandant i Brigadës 121, nuk ka ndërmarr masa të arsyeshme dhe të nevojshme brenda kompetencave të tij për ta parandaluar apo për të ndalur vrasjen e Ramiz Hoxhës dhe Selman Binishit.

Sipas Aktakuzës, “i pandehuri Fatmir Limaj, i ka parë kufomat e viktimave dhe e ka ditur për krimin e kryer, mirëpo me vetëdije nuk ka ndërmarr masa drejt zbulimit të kryesve të këtij krimi dhe rastin asnjëherë nuk e ka paraqitur te organet kompetente për hetim dhe ndjekje”.

Ndryshe Limaj, ishte komandanti i parë i UÇK-së që u përball me akuza për krime lufte në Tribunalin Penal të Hagës. Ai u akuzua, bashkë me Isak Musliun dhe Haradin Balën, për krime lufte ndaj serbëve dhe shqiptarëve që dyshoheshin për bashkëpunim me Serbinë gjatë luftës në Kosovë.

Në nëntor të vitit 2005, Tribunali e liroi dhe Limaj u kthye në atdhe, ku edhe u prit si hero. Pas lirimit nga Haga, Limaj u akuzua edhe dy herë nga prokuria ndërkombëtare e akredituar në Kosovë. Një herë iu gjykua për krim të organizuar dhe korrupsion gjatë kohës që ishte ministër i Transportit dhe herën tjetër për krime lufte gjatë vitit 1998-1999.