Familjarët e të akuzuarve në Hagë që kërkuan të shkojnë në vizita

Gjykata Speciale, nga 15 korriku, i ka lejuar vizitat për familjarët e të paraburgosurve

Nga Ministria e Drejtësisë kanë konfirmuar se deri më tani kanë pranuar dy kërkesa për vizita.

Genc Nimoni, shef i kabinetit të ministres Albulena Haxhiu, tha për Klankosova.tv se kërkesë për vizitë kanë bërë familjarët e Jakup Krasniqit dhe Rexhep Selimit.

Nimoni tha se familjarëve të të paraburgosurve do t’u lejohet qëndrimi deri në tre ditë në Hagë dhe ata do të mbështeten financiarisht nga shteti i Kosovës.

“Deri më tani i kemi pranuar dy kërkesa për vizita familjare në Hagë. Ato i kanë parashtruar familjarët e Jakup Krasniqit dhe Rexhep Selimit. Ata do të mbështeten edhe financiarisht nga shteti për qëndrim dhe ushqim. Ata kanë të drejtë që të qëndrojnë deri në tre ditë”.

Ai theksoi se të akuzuarit kanë të drejtë që të kenë nga një vizitë në muaj dhe gjatë një viti gjithsejt 12 vizita.

Shefi i kabinetit të ministres së Drejtësisë ndër të tjera tha se shuma e cila do të jepet për familjarët që i vizitojnë të burgosurit në Hagë janë 80 euro për fjetje dhe 50 euro për ushqim.

---