Facebook ndalon të gjitha përmbajtjet e lidhura me talebanët

Kompania thotë se ka një ekip të dedikuar ekspertësh afganë për të monitoruar dhe hequr përmbajtjen e lidhur me grupin.

Facebook ka konfirmuar se i konsideron talebanët një organizatë terroriste dhe ndalon grupin nga platformat e tij dhe të gjitha përmbajtjet që e mbështesin atë.

Për vite me radhë, talebanët kanë përdorur mediat sociale për të përhapur mesazhet e tyre.

Marrja e shpejtë e Afganistanit ngre sfida të reja për kompanitë teknologjike se si të merren me përmbajtjen e lidhur me grupin.

“Talibanët janë të sanksionuar si një organizatë terroriste, sipas ligjit amerikan dhe ne i kemi ndaluar ata nga shërbimet tona sipas politikave tona të Organizatës së Rrezikshme. Kjo do të thotë që ne heqim llogaritë e mbajtura nga ose në emër të talebanëve dhe ndalojmë lavdërimin, mbështetjen dhe përfaqësimin e tyre“, tha një zëdhënës i Facebook për BBC, transmeton Albinfo.ch.

“Ne gjithashtu kemi një ekip të përkushtuar të ekspertëve të Afganistanit, të cilët janë folës amtare të Dari dhe Pashtos dhe kanë njohuri për kontekstin lokal, duke na ndihmuar të identifikojmë dhe paralajmërojmë për çështjet e reja në platformë”, shtuan ata.

Gjiganti i mediave sociale tha se nuk merr vendime për njohjen e qeverive kombëtare, por përkundrazi ndjek “autoritetin e bashkësisë ndërkombëtare”.

Facebook theksoi se politika zbatohet për të gjitha platformat e saj, përfshirë rrjetin e saj kryesor të mediave sociale, Instagram dhe WhatsApp.

 

---