Euro forcohet ndaj dollarit

Monedhat më “të sigurta” si jeni japonez dhe franga zvicerane janë forcuar po ashtu. Por ndryshe nga ato, euro normalisht dobësohet kundrejt dollarit në kohë krizash

Monedha euro është shfaqur si një fituese surprizë e trazirave të fundit të tregut të shkaktuara nga tarifat, duke u ngjitur në një nivel rekord trevjeçar kundrejt dollarit. Në këto kushte, Evropa rezulton të jetë një bast relativisht i sigurt mes kaosit global.

Nxitësi i lëvizjes së monedhës është nervozizmi në rritje i investitorëve globalë në lidhje me zotërimin e aseteve amerikane, duke i bërë ata të shesin dhe të zhvendosin paratë në vendet e tyre. Në Evropë, flukset po e nxisin euron.

“Nëse qeveria amerikane shkakton rënien e aksioneve dhe zvogëlon fitimet e kompanive amerikane, duhet të pyesim veten nëse pjesa tjetër e botës ende dëshiron të vendosë të gjitha paratë në obligacione ose aksione amerikane,” shprehen analistët.

Euro është rritur më shumë se 5% kundrejt dollarit që nga 1 prilli, një ditë para se Presidenti i SHBA-së Donald Trump të prezantonte tarifa të reja bazë prej 10% për të gjitha ekonomitë dhe të vendoste detyrime që arrinin në 20% për Bashkimin Evropian, shkruan Scan, transmeton albinfo.ch.

Vendimi i Trump për të pezulluar taksat më të larta për 90 ditë nxiti rritjen më të madhe ditore të euros që nga viti 2015. Deri të premten, ajo kishte arritur një nivel rekord trevjeçar mbi 1.14 dollarë, duke u bazuar në rritjen që kishte filluar javë më pare, kur Gjermania njoftoi një plan masiv shpenzimesh.

Ndërsa ekspertët në rajon po e ngrenë lart monedhën e tyre si një lojtar kyç global, kjo mund të dëmtojë eksportuesit evropianë, të cilët kanë përfituar nga një euro më e lirë gjatë ngadalësimeve ekonomike botërore.

Forca e euros ka arritur gjithashtu një rekord 17-mujor kundrejt paundit britanik dhe është tregtuar rreth niveleve maksimale 11-vjeçare me juanin kinez.

Monedhat më “të sigurta” si jeni japonez dhe franga zvicerane janë forcuar po ashtu. Por ndryshe nga ato, euro normalisht dobësohet kundrejt dollarit në kohë krizash.

Për më tepër, në fillim të vitit, monedha evropiane po tregtohej me rreth 1.03 dollarë, ndërsa analistët prisnin që ajo të binte nën 1 dollar nëse do të vendoseshin tarifa. Këto parashikime tani po rivlerësohen në mënyrë dramatike.

Ekonomistët theksojnë se politikat e Trump kanë gërryer besimin te dollari, duke shtuar se vlerësimi i euros mund të vazhdojë. “Rritja e vlerës në 1.25 dollarë është një mundësi shumë e qartë,” thonë ata.

Kjo mund të sjellë pasoja të ndryshme për Evropën. Një përfaqësues i Deutsche Bank tha se kërkesa për borxhin e denominuar në euro mund ta bëjë më të lehtë për qeveritë evropiane të shpenzojnë. Po ashtu, rritja e euros e bën më të lehtë për Bankën Qendrore Evropiane të mbajë normat e interesit më të ulëta edhe nëse tarifat shkaktojnë inflacion të lartë.

Por kjo do të kishte pasoja negative për eksportuesit. “Normalisht, kur cikli global i biznesit është i dobët, euro dobësohet, gjë që zbut ndikimin negativ në ekonominë evropiane”, shprehen analistët.

---