Euro 2025 për femra: Zvicra mposhtet nga Norvegjia pas një pjese të parë të shkëlqyer

(KEYSTONE/Michael Buholzer)

Zvicra e nisi fuqishëm Euro 2025, por doli pa pikë nga ndeshja e parë ndaj Norvegjisë, duke humbur 1-2 në Basel.

Në pjesën e parë, ekipi i Pia Sundhage dominoi plotësisht, duke e mbyllur 45-minutëshin në epërsi falë golit të Nadine Riesen në minutën e 28-të.

Presioni i lartë dhe loja me intensitet të madh i shuan norvegjezet, që nuk arritën të krijonin asgjë deri në pushim.

Mirëpo, gjithçka ndryshoi në pjesën e dytë. Ada Hegerberg barazoi në minutën e 54-t, ndërsa vetëm katër minuta më vonë një autogol i Julia Stierli i dha avantazhin Norvegjisë (58’). Në minutën e 70-të, Hegerberg humbi penalltinë që do vuloste fatin e ndeshjes. Zvicra pati rast të barazonte me penallti, por pas verifikimit me VAR, u anulua për një pozicion jashtë loje milimetrik të Alayah Pilgrim, transmeton albinfo.ch.

Rezultati final: Zvicra 1-2 Norvegjia

Kjo disfatë e vendos Zvicrën në pozitë të vështirë për kualifikim, ndërsa Norvegjia dhe Finlanda kryesojnë Grupin A me nga 3 pikë, Islanda dhe Zvicra mbeten pa pikë.