ESK: Rriten çmimet në Kosovë

Enti i Statistikave të Kosovës, ka publikuar Indeksin e Çmimeve të Konsumit për tetor. Sipas të dhënave që ka grumbulluar sektori për përpunimin e çmimeve në mes shtatorit dhe tetorit të këtij viti, çmimet e konsumit në Kosovë janë ngritur për 1.2 për qind , ndërsa shkalla e inflacionit në tetor të sivjetmë, krahasuar me tetorin e vititë të kaluar ishte 4.7 për qind.

Indikatorët e përmendur janë rezultat i grumbullimit të çmimeve në dhjetë qendra rajonale të Kosovës Prishtinë, Gjakovë, Prizren, Gjilan, Ferizaj, Pejë, Mitrovicë, Therandë, Istog e Podujevë.

Rregullisht nga data 10 deri me 20 të çdo muaji, incizohen çmimet e më tepër se 370 artikujve dhe shërbimeve dhe përafërsisht llogariten më shumë se 5000 çmime në muaj për ecurinë e Indeksit të çmimeve të konsumit.

“Çmimet e konsumit në Kosovë u rritën për 1.2 për qind në muajin tetor 2011 krahasuar me muajin shtator 2011. Ngritje e çmimeve kryesisht vërehet te rryma, gazi dhe lëndët djegëse të tjera për 22.9 për qind, pastaj pati ngritje te perimet për 3.9 për qind, mishi për 1.3 për qind, veshje për 1.1 për qind dhe përdorimi i pajisjeve për transportin personal (nafta dhe benzina) për 1.1 për qind”, ka njoftuar Enti.

Në këtë periudhë u vërejt edhe rënie e çmimeve te buka dhe drithërat për 3.7 për qind, qumështi, djathi dhe vezët për 2.0 për qind, pemët për 4.9 për qind dhe shërbimet për transport për 5.8 për qind.