Escobar dhe Lajçak sot në Prishtinë, shkojnë edhe në Veri

Miroslav Lajcak, Twitter

Të dërguarit e posaçëm të Bashkimit Evropian, Miroslav Lajçak, dhe të Shteteve të Bashkuara të Amerikës, Gabriel Escobar, do të vizitojnë Kosovën, të martën shkojnë në Serbi.

Qëllimi i vizitës së tyre është gjetja e një zgjidhjeje për të dalë nga situata e krijuar në veri.

Përveç takimeve me drejtues të institucioneve në Kosovë, ata do të vizitojnë edhe veriun e vendit, përcjell albinfo.ch.

“Bashkimi Evropian është i gatshëm të zbatojë masa të vendosura. Dështimi për të depërshkallëzuar tensionet do të çojë në pasoja negative. Presim që Kosova të veprojë në mënyrë jo depërshkallëzuese dhe të pezullojë menjëherë operacionet policore në afërsi të ndërtesave komunale në veri të Kosovës. Kryetarët e komunave duhet t’i kryejnë përkohësisht detyrat e tyre në objekte të tjera, përveç ndërtesave komunale. Zgjedhjet e parakohshme duhet të shpallen sa më shpejt në të katër komunat dhe të organizohen në mënyrë plotësisht gjithëpërfshirëse. Presim që serbët e Kosovës të marrin pjesë në këto zgjedhje. Ne shprehim shqetësimin për gjendjen e gatishmërisë më të lartë të Forcave të Armatosura Serbe. Bashkimi Evropian pret që Kosova dhe Serbia të veprojnë me përgjegjësi dhe të angazhohen menjëherë në dialogun e ndërmjetësuar nga BE-ja për të gjetur një zgjidhje të qëndrueshme për situatën në veri të Kosovës që garanton mbrojtje, siguri dhe demokraci me pjesëmarrëse për të gjithë qytetarët, dhe hap rrugën për zbatimin e Marrëveshjes për Rrugën drejt Normalizimit dhe Aneksit të saj. Kjo përfshin fillimin pa ndonjë vonesë apo parakusht të mëtejshëm të punës për themelimin e Asociacionit së Komunave me Shumicë Serbe”, thuhet në deklaratë.