Erdogan kritikon Izraelin për shkelje të të drejtave të palestinezëve në Rripin e Gazës

Presidenti turk, Recep Tayyip Erdogan, kritikoi rrethimin e plotë të Rripit të Gazës nga Izraeli, duke e akuzuar atë për shkelje të të drejtave të njeriut të më shumë se 2 milionë palestinezëve që jetojnë atje.

“Aktualisht, Rripit të Gazës nuk i jepet ujë. Nuk ka energji elektrike. Po të drejtat e njeriut?”, tha sot Erdogan në Ankara.

Izraeli njoftoi një bllokadë totale të Rripit të Gazës, duke ndërprerë energjinë elektrike, ujin, karburantin dhe ndaluar furnizimet me ushqime, transmeton dpa, përcjell albinfo.ch.

Vendimi erdhi mes sulmeve të rënda ajrore izraelite në Rripin e Gazës, në përgjigje të sulmeve të dhunshme të nisura të shtunën nga grupi militant islamik Hamas.

Erdogan kritikoi gjithashtu vendimin e Shteteve të Bashkuara të Amerikës për të zhvendosur një aeroplanmbajtëse në Mesdheun lindor gjatë konfliktit.

“Çfarë po bëjnë aeroplanmbajtëset amerikane në Izrael?”, tha Erdogan, duke e quajtur atë një hap drejt kryerjes së “masakrave të rënda”.