Emisari gjerman: Rruga e zgjedhur nga Kurti në dialog, mund të mos jetë në interesin e Kosovës

Foto FB: Manuel Sarrazin

I dërguari special i Gjermanisë për Ballkanin Perëndimor, Manuel Sarrazin, ka thënë se rruga në të cilën po ecën Qeveria e Kosovës në dialogun me Serbinë, në plan afatgjatë mund të mos jetë në interesin e mirë të Kosovës për afrim me Bashkimin Evropian, transmeton albinfo.ch.

Ai ka deklaruar se rruga e zgjedhur nga kryeministri i Kosovës, Albin Kurti, mund të çojë në humbjen e mundësive për të shkuar drejt Bashkimit Evropian.

“Rruga në të cilën po ecën qeveria e zotit Kurti në dialog, në planin afatgjatë, kam frikë se mund të mos jetë e mirë në interesin e Kosovës, për afrimin me Bashkimin Evropian. Kam frikë se kjo mund të çojë më shumë në një drejtim të mbështetjes tek vetja dhe humbjes së mundësive për të shkuar drejt Bashkimit Evropian”, ka thënë ai për ABC News.

Ndër të tjera, Sarrazin i kërkoi Kosovës dhe Serbisë më shumë vullnet politik në dialog, dhe palët të ndërmarrin veprime konkrete, pasi u shpreh se nuk është detyrë e BE-së që të jetë arbiter, ndërsa ka kërkuar nga Serbia që të shkojë në rrugën drejt Bashkimit Evropian dhe t’i vendosë sanksione Rusisë.