Eksportet në Zvicër dhe Norvegji, me procedura të lehtësuara

Falë aplikimit të sistemit REX në kuadër të skemës GSP lehtësohet eksportimi i mallrave nga Kosova në Zvicër dhe në Norvegji

Sistemi REX në kuadër të skemës GSP (General System of Preferences) që u ofrohet vendeve në zhvillim, në këtë rast Kosovës, lehtëson eksporte në Zvicër dhe Norvegji.

Ky sistem u mundëson subjekteve në Kosovë që eksportojnë mallra në Zvicër dhe Norvegji që të regjistrohen nga Dogana e Kosovës në këtë sistem dhe më pas të kenë mundësi që për mallrat që i prodhojnë dhe eksportojnë në këto dy vende, të lëshojnë vetë deklaratë ose faturë mbi origjinën, pa pasur nevojë të pajisen me certifikatë të origjinës FORMA A. Funksionimi i plotë i këtij sistemi ka filluar nga data 1 janar 2017. Këtë lajm e ka bërë të ditur ministri i Financave të Kosovës, Avdullah Hoti në një postim në rrjetin social Facebook.

“Dogana e Kosovës ka filluar me aplikimin e sistemit REX në kuadër të skemës GSP (General System of Preferences) e cila i ofrohet vendeve në zhvillim, në këtë rast Kosovës nga Zvicra dhe Norvegjia. Ky sistem u mundëson eksportuesve kosovar që eksportojnë mallra në Zvicër dhe Norvegji që të regjistrohen nga Dogana e Kosovës në këtë sistem dhe pastaj të kenë mundësi që për mallrat që i prodhojnë dhe eksportojnë në këto dy vende të lëshojnë vetë deklaratë faturë mbi origjinën pa pasur nevojë të pajisen me certifikatë të origjinës FORMA A. Funksionimi i plotë i këtij sistemi ka filluar nga data 1 janar 2017”, ka shkruar Hoti në profilin e vet në “Facebook”, përcjell rtklive.com.

Hoti më titje thotë se periudha tranzitore nga metoda e certifikimit me certifikatën FORMA A (siç ka qenë) në metodën e certifikimit përmes sistemit REX do të zgjas një vit me mundësi shtyrje për gjashtë muaj të tjerë, periudhë pas të cilës çdo eksportues që dërgon mallra me origjinë të Kosovës në këto dy vende nuk mund të bëjë një gjë të tillë pa qenë i regjistruar.

“Prandaj njoftohen të gjithë prodhuesit/eksportuesit nga Kosova që eksportojnë mallra me origjinë të Kosovës në Zvicër dhe Norvegji dhe dëshirojnë të përfitojnë nga skema e Sistemit Gjeneral të Preferencave, të plotësojnë formularin i cili gjendet web faqen e Doganës dhe të njëjtën të vijnë ta paraqesin pranë sektorit të Origjinës, në zyrat e Doganës së Kosovës në Prishtinë në mënyrë që të regjistrohen në sistem. Pas regjistrimit do ta merrni numrin e regjistrimit të cilin duhet ta vendosni tek deklarimi fatural”, ka theksuar ai.