Ekipi nga Kosova shpëton edhe një 29-vjeçare nga rrënojat në Turqi

Keystone (AP Photo/Omar Sanadiki)

Teksa po vazhdojnë angazhimet në ndihmë të kërkim-shpëtimit në Turqi, shoqata e kërkim-shpëtimit nga Kosova ka arritur ta nxjerrë të gjallë një 26-vjeçare nga rrënojat.

Lajmi është bërë i ditur për Klankosova nga Fanol Shala, anëtar i kësaj shoqate.

“Gjatë ditës së sotme kemi arritur ta nxjerrim të gjallë një 26-vjeçare. Këtë e kemi arritur me asistencën e ekipeve turke. Ajo është dërguar me autoambulancë në spital”, tha Shala.

Derisa, sipas tij, gjatë ditës i kanë nxjerrë tetë trupa të pajetë, përcjell albinfo.ch.

“Gjatë ditës kemi arritur që t’i nxjerrim 7-8 trupa të pajetë. Aktualisht kemi dyshime se nën rrënoja janë edhe katër trupa të pajetë, por në bazë të aparaturës që kemi, po sinjalizon për rrahje të zemrës. Pra, mund të jetë edhe dikush i gjallë”, tha ai.