Egjipti restauron statujën gjigante të faraonit Ramses II

Egjipti, për ta rimëkëmbur turizmin e zbehur nga Pranvera Arabe, ka nisur restaurimin e vendeve të lashta të faraonëve.

Pjesë e restaurimit është edhe statuja gjigante e një faraoni të njohur egjiptian. Dikur e bërë copash, statuja gjigante prej 12 metrash e faraonit Ramses II, i cili drejtoi Egjiptin para 3 mijë vjetësh, është restauruar dhe është bërë gati për shfaqje.

Restaurimi i statujës ishte pjesë e projektit të restaurimit të tempullit Seti I dhe i përket faraonit që njihet si Ramses-i i Madh, e që u priu egjiptianëve nga viti 1279 deri më 1213, para lindjes së Krishtit. Ai u priu disa ekspeditave ushtarake dhe zgjeroi Perandorinë egjiptiane nga Siria në lindje, deri në Nubia në jug.

Pjesë e projektit të restaurimit në Sohag ishte edhe hulumtimi i Tempullit të Athribisit, tempullit të vetëm të pazbuluar në Egjipt.

“Ky është tempulli i vetëm që nuk është hulumtuar deri më tani. Të tjerët janë hulumtuar para 100 vjetësh”, tha egjiptologu gjerman, Heidi Keopp-Junk. Dhjetë kilometra në jugperëndim të Sohagut, një tjetër projekt është restauruar në tempullin Osirion. Në këtë tempull u ul niveli i ujit me qëllim që vizitorët të mund të hynin te varret e lashta.