Edhe Tetova, gati për pritjen e mërgimtarëve

Komuna e Tetovës dhe sektori i punëve të brendshme i kësaj komune kanë filluar aksionin e përgatitjeve për sezonin e ardhjes së mërgimtarëve. Sektori për komunikacion në kuadër të SPB-së së Tetovës, gjatë këtij muaji do të zhvillojë aktivitete të shtuara të policisë nëpër rrugët e Tetovës, me qëllim respektimin e rregullave të parkimit dhe evitimin e parkimit nëpër trotuare, raportojnë mediet shqiptare nga Maqedonia.

“Personat zyrtarë do t`i drejtojmë në ato pjesë të rrugës ku pritet frekuentimi më i madh, pra më së tepërmi pritet të ketë lëvizje në bulevardin “Iliria” dhe në rrugën e “Ilindenit”. Do t`u apeloja vozitësve që të jenë më të kujdesshëm sepse si sektor i punëve të brendshme do të marrim masa ndaj atyre që parkojnë veturat në ato pjesë të rrugës jo në rregull. Do të shfrytëzojmë edhe “merimangën” kështu që ata pastaj do të jenë të obliguar të bëjnë pagesë edhe të merimangës edhe dënimin e merituar. Pra nuk do të jemi aq tolerant në këtë aspekt”, deklaroi Besir Qamili, shef i sektorit për komunikacion në SPB Tetovë, përcjell “albinfo.ch”.

Aktivitete të ngjashme janë ndërmarrë edhe nga komuna e Tetovës. Sipas zëdhënëses, Lume Huseini, komuna gjatë periudhës së qëndrimit të mërgimtarëve në vendlindje, do të punojë me kapacitet të plotë.

Nga data 20 korrik, po ashtu është paraparë që në Tetovë, të realizohet edhe java e kulturës tetovare, pikërisht për nder të ardhjes së mërgimtarëve të cilët do të mund që ta shijojnë gjatë kësaj jave si Teatrin, po ashtu edhe aktivitetet e tjera kulturore në Tetovë”.