Edhe Kosova u prezantua me dinjitet në Panairin e Librit në Leipzig

Pjesëmarrja për herë të pestë radhazi konfirmon praninë e qëndrueshme të letërsisë kosovare në një nga ngjarjet më të rëndësishme në Evropë

Kosova u prezantua me dinjitet në Panairin Ndërkombëtar të Librit në Leipzig, i cili u mbajt nga 19 deri më 22 mars, duke qenë pjesë e një prej ngjarjeve më të rëndësishme të librit në Evropë dhe më gjerë, transmeton albinfo.ch.

Përfaqësimi i këtij viti shënoi pjesëmarrjen e pestë radhazi të Kosovës në këtë panair prestigjioz, duke dëshmuar përkushtimin e vazhdueshëm për promovimin e letërsisë dhe kulturës shqiptare në skenën ndërkombëtare. Kosova u prezantua përmes Bibliotekës Kombëtare të Kosovës “Pjetër Bogdani”, duke sjellë rreth 100 tituj në gjuhën shqipe dhe angleze.

Në kuadër të programit të sivjetmë, u prezantuan gjashtë autorë të njohur të letërsisë bashkëkohore shqipe: Jehona Kicaj, Majlinda Bregasi, Nerimane Kamberi, Arbër Selmani, Eli Krasniqi dhe Meliza Krasniqi. Ata morën pjesë në panele diskutimi që trajtuan tema të rëndësishme për letërsinë dhe shoqërinë, si “Kujtesë e kontestuar, zëra të lidhur: Letërsia dhe politika në Ballkan” dhe “Gjuhë të vogla, histori të mëdha: Letërsia shqipe në kontekst global”.

Në ceremoninë hapëse të panairit ishte e pranishme edhe ministrja e Kulturës dhe Turizmit, Saranda Bogujevci, e cila vlerësoi rëndësinë e pjesëmarrjes së Kosovës në këtë platformë ndërkombëtare. Ajo theksoi se prezantimi i qëndrueshëm në panair përbën një mundësi të jashtëzakonshme për promovimin e autorëve dhe letërsisë shqipe në arenën globale.

Panairi i Librit në Leipzig shërben si një urë lidhëse mes kulturave dhe si një hapësirë e rëndësishme për dialog letrar, duke i dhënë mundësi Kosovës të forcojë praninë e saj kulturore dhe të prezantojë vlerat e saj artistike para një publiku të gjerë ndërkombëtar./Albinfo.ch

---