Edhe Austria ka filluar dhënien e vaksinave të para

Vaksinimet kundër koronavirusit (Covid -19) kanë filluar sot edhe në Austri, shkruan albinfo.at.

Vaksinat e para u morën nga pesë persona, tri gra dhe dy burra të moshës 80 – 93 vjeçe, në Universitetin Mjekësor të Vjenës.

Pas vaksinimeve të para, 10.000 doza të vaksinave Pfizer-BioNTech, të cilat arritën dje në vend, do të jepen në gjithë vendin.

Të pranishëm gjatë dhënies së vaksinave të para ishin edhe kancelari Sebastian Kurz dhe ministri i Shëndetësisë, Rudolf Anschober. Pas takimit me personat që u vaksinuan, Kurz ka deklaruar se dita e 27 dhjetorit është një ditë historike, kurse ministri Anschober e ka quajtur si ‘ditë të parë të ndryshimit’,

“Ky është fillimi i fitores kundër pandemisë”, tha kancelari austriak, shkruajnë mediat austriake, përcjell albinfo.at.

Kurz vuri në dukje se programi i vaksinimit do të kryhet në tri faza, duke filluar nga java e ardhshme, konkretisht do të vaksinohen punonjësit e kujdesit shëndetësor dhe njerëzit që konsiderohen si grup i rrezikuar, kurse pastaj vaksinimi do të realizohet në gjithë vendin.

Ministri Anschober ka njoftuar se Austria mund të rrisë kapacitetet e  vaksinës Pfizer / Biontech në mbi katër milionë.

Në anën tjetër, kryetarja Komitetit Kombëtar të Vaksinimit, Ursula Wiedermann-Schmidt, ka shprehur besimin që vaksinimi ka një shkallë të lartë të mbrojtjes ndaj Covid -19. “Tani duhet të ketë më shumë hulumtime për të përcaktuar nëse njerëzit e vaksinuar mund të infektojnë persona të  tjerë. Deri në rezultatet e para, këshillohet ende të kemi kujdes të theksuar”, ka thënë ajo për orf.

Për Wiedermann-Schmidt, të sëmurët nga alergjia nuk i përkasin grupit që pritet të vaksinohen dhe as fëmijët nën moshën 16 vjeçe.

---