E bija ndjek rrugën e të atit, 16 vjeçja boton librin e parë

Ky libër përmban 70 faqe me poezi dhe proza nga jeta e përditshme, flet për raportet dhe fenomenet në shkolla duke sjellë një reflektim ndaj botës sonë multikulturore

Nëse babai i saj i ka shkruar lirisë e atdhedashurisë i shtyrë nga situata e rëndë politike e popullit shqiptar në ish-Jugosllavi, e bija e tij Fatlumja, shkruan dhe reflekton ndaj botës kozmopolite në Zvicër. Adoleshentja e re, Fatlume Sherifi, ka prezantuar dje në mbrëmje në objektet e shkollës ku ajo ndjek mësimet në St. Gallen/Wittenbach, librin e saj me titull „Gespiegelt von der Welt“. Ky është libri i saj i parë që është përgatitur në kuadër të temës së diplomës.

Me botimin e librit „Reflektimi ndaj botës“ ajo sjell për lexuesit një përshkrim të raporteve në jetën e përditshme nga përvoja e saj në shkollë mes kombësive të ndryshme dhe fenomeneve që i përcjellin të rinjtë e kësaj moshe.

Ky libër notohet si temë diplome të nivelit të lartë shkollor për klasat e nënta, tregon vajza me prejardhje nga Tetova.

Inspirimin për të shkruar këtë libër, e ka marrë nga babai, thotë Fatlumja.

„Ai më ka inspiruar dhe më ka mbështetur fort për të realizuar këtë projekt“. Babai i saj, Isuf Sherifi është një poet i njohur në mesin e mërgatës shqiptare në Zvicër me librat e tij si „Plisi“ apo „Ndarjen nuk e nënshkruaj“ e të tjera botime.

Meritë të madhe për realizimin e këtij botimi ajo i dedikon, edhe poetit të njohur zviceran, Fred Kurer. „Dua ta falënderoj në mënyrë të veçantë z. Fred Kurer që më ka mbështetur me ide konstruktive, duke redaktuar në tërësi librin tim“, shkruan ajo hyrjen falënderuese për inspiruesit dhe mbështetësit e saj.

Ajo vetë librin e ka vlerësuar si një përvojë të re të saj në këtë drejtim që në masë të madhe buron nga edukimi familjar dhe dashuria që ekziston për librin në këtë shtëpi.

Po kështu me nota pozitive e ka vlerësuar librin e nxënëses së saj mësuesja J. Moser. Aj është shprehur e lumtur për këtë punim të saj; Fatlumja tërë kohën ia ka kushtuar këtij libri, ajo ka shkruar shumë i mirë dhe në formë shumë sovrane.

Ky libër përmban 70 faqe me poezi dhe proza nga jeta e përditshme, flet për raportet dhe fenomenet në shkolla duke sjellë një reflektim ndaj botës sonë multikulturore.

---