Dy shpërthime gjatë natës në Gjirokastër e Vlorë

Dy shpërthime kanë ndodhur gjatë natës në Vlorë dhe Gjirokastër. Policia shqiptare ka njoftuar se në lagjen “Dunavat i dytë” në qytetin e Gjirokastrës është vendosur tritol në shtëpinë e Gentian Litit.

Një person ka mbetur i lënduar nga shpërthimi i eksplozivit. “Rreth orës 23:45, njoftohemi se në hyrje të banesës së shtetasit A.L., në lagjen “Dunavat i Dytë”, Gjirokastër, ka shpërthyer një sasi lënde plasëse. Si pasojë është dëmtuar lehtë shtetasi G.L., 34 vjeç (i biri i shtetasit A.L.), si dhe ka dëmtime materiale të banesës”, thuhet në njoftimin e policisë.

Ndërsa në qytetin e Vlorës, rreth orës 02:10, në lagjen “10 Korriku”, i është vendosur lëndë eksplozive një automjeti. Policia thekson se janë duke punuar në zbardhjen e plotë të ngjarjes dhe për identifikimin e kapjen e autorit, por deri tash nuk dihen motivet e shpërthimit.