Dy pedagoge shqiptare pranohen si bashkëudhëheqëse doktorature në Austri

Dy pedagoge shqiptare drejt udhëheqjes së doktoratave në Austri

Dy pedagoge të Universitetit të Shkodrës “Luigj Gurakuqi” (UNISHK), Prof. As. Dr. Albana Boriçi dhe Prof. As. Dr. Bresena Kopliku, janë pranuar zyrtarisht si bashkëudhëheqëse të studimeve të doktoratës në Austri, shkruan albinfo.ch.

Kjo arritje përbën një hap të rëndësishëm për stafin akademik dhe për procesin e ndërkombëtarizimit të universitetit.

Bashkëpunimi akademik me institucionet e arsimit të lartë në Austri hap perspektiva të reja për kërkimin shkencor, shkëmbimin e përvojave dhe rritjen e cilësisë së studimeve të ciklit të tretë, në dobi të pedagogëve dhe doktorantëve të UNISHK.

Vlen të theksohet se, falë ndërmjetësimit të znj. Edona Bilali, ish-deputete dhe aktualisht Zëvendësministre e Infrastrukturës dhe Energjisë, një vit më parë u hapën dy programe doktorale në bashkëpunim me palën austriake, ku roli i saj ka qenë kyç në ndërtimin dhe forcimin e këtij partneriteti akademik ndërkombëtar.

Aktualisht, ky bashkëpunim ka hyrë në një fazë të re zhvillimi, duke forcuar më tej pozicionin e Universitetit të Shkodrës në hapësirën akademike evropiane.

Universiteti i Shkodrës u uron suksese dy profesoreshave të nderuara, të cilat, së bashku me Zv. Rektoren Prof. Dr. Blerta Dragusha, po angazhohen për ta bërë këtë bashkëpunim sa më konkret dhe të prekshëm për doktorantët dhe stafin akademik të UNISHK./Albinfo.ch

---