Durrësi s’tërheq më pushues nga Kosova si më parë

Nëse para disa vitesh Durrësi u tejmbush me emra biznesesh të qyteteve të Kosovës apo Maqedonisë për të tërhequr pushuesit patriotikë të këtyre zonave, në 2018 duket se kjo taktikë nuk vlen.

Shqiptarët e Kosovës dhe Maqedonisë e i janë larguar bregdetit të Adriatikut.

Ibrahim Osmani është nga Kosova dhe në Durrës drejton një hotel.

“Ka rënie shumë, jo pak. Unë kështu s’e mbaj mend, të them të drejtën. Kam 18 vite që punoj, por kështu rënie nuk mbaj mend”, shprehet Osmani.

Ndërsa Lirim Bajrami është nga Tetova dhe ka hapur një restorant në Durrës.

“Këtë vit ka pushues të huaj, polakë, hungarezë, boshnjakë, por Durrësi, d.m.th. plazhi i Durrësit, ka shumë pak pushues nga Kosova e Maqedonia. Rënia është 30-40% të pushuesve të Kosovës, Maqedonisë d.m.th., të shqiptarëve. Në krahasim me vjet është shumë, shumë poshtë turizmi, si për kosovarë si për shtetas të huaj”, tha ai, raporton Tch.

Por, cilat janë arsyet pse shqiptarët e Kosovës dhe të Maqedonisë nuk pushojnë më në Durrës, sipas gazetares Valdete Osmani?

“Dëshira e kosovarëve, ajo dëshira e madhe e cila është zbehur kohët e fundit për të vizituar Shqipërinë, mendoj se është pikërisht për mungesën e kushteve, mungesën e trajtimit të mirë ndaj tyre dhe mungesa e pastërtisë së Durrësit, derdhja e ujërave të zeza në det. Mungon një dezinfektim i mushkonjave, të cilat s’të lënë të qetë të hash një darkë. Me shumicën me të cilët bisedojmë në Prishtinë kur kemi dilema se ku të shkojmë… Durrësi, Shëngjini, Velipoja mbeten vendet ku shkohet për zor, pasi i kanë fëmijët e vegjël apo nuk kanë kushte ekonomike për t’i kaluar pushimet më larg”, u shpreh Valdete Osmani.