Dorëzohet në KQZ peticioni për shkarkimin e kryetarit të Zubin Potokut

@albinfo.ch

Komisioni Qendror i Zgjedhjeve ka pranuar peticionin për shkarkimin e kryetarit të Zubin-Potokut, Izmir Zeqiri, dhe bazuar në legjislacionin në fuqi, do t’i verifikojë nënshkrimet.

“Mund t’jua konfirmoj se deri më tani kemi pranuar kërkesën me nënshkrime të mbledhura për verifikim nga Kryesuesi i Kuvendit Komunal të Zubin-Potokut. KQZ, në përputhje me legjislacionin në fuqi, do të verifikojë listën e nënshkrimeve, pra nëse nënshkruesit janë qytetarë me të drejtë vote në komunën përkatëse”, ka thënë Valmir Elezi, zëdhënës në KQZ.

Nënshkrime për shkaktim të kryetarëve janë mbledhur edhe në Leposaviq, Mitrovicë të Veriut e Zveçan.

Për të qenë peticioni i suksesshëm, duhen nënshkrimet e së paku 20 për qind të qytetarëve me të drejtë vote.

Sipas të dhënave të Komisionit Qendror të Zgjedhjeve (KQZ) në Zveçan duhen nënshkrimet e 1.411 votuesve, në Zubin-Potok nënshkrimet e 1.347 votuesve, në Mitrovicë të Veriut duhen nënshkrimet e 3.640 votuesve dhe në Leposaviq nënshkrimet e 2.689 votuesve./Koha.net