Donatorët nga diaspora bëjnë me shtëpi edhe një familje në Gjilan

Milaim Jashari, kryetar i shoqatës “Feniks” nga Ferizaj, theksoi se në ndërtimin e kësaj shtëpie kanë kontribuar disa donatorë, duke njoftuar se gjatë këtij viti, kjo është shtëpia e 13 që po ndërtohet nga kjo shoqatë

Komuna e Gjilanit në bashkëpunim me donatorët, ka filluar ndërtimin e shtëpisë për nënën vetë-ushqyese, Lumnije Rulani, e cila prej një dekade ka jetuar në gjendje të rëndë të banimit, njofton komuna e Gjilanit.

Donatori Sali Avdullahi, i cili ka folur në emër të Vezir Januzit, e ka falënderuar kryetarin Lutfi Haziri për përkujdesjen për t’i dalë në ndihmë familjeve në nevojë, ndërkaq ka apeluar të gjithë njerëzit e vullnetit të mirë që të vazhdojnë të jenë solidar me familjet skamnore, përcjell albinfo.ch.

Milaim Jashari, kryetar i shoqatës “Feniks” nga Ferizaj, theksoi se në ndërtimin e kësaj shtëpie kanë kontribuar disa donatorë, duke njoftuar se gjatë këtij viti, kjo është shtëpia e 13 që po ndërtohet nga kjo shoqatë.

Fjalë pak dhe tepër e emocionuar ka qenë zonja Lumnije Rulani, e cila ka falënderuar kryetarin Lutfi Haziri për përkujdesjen si dhe donotarët, bashkatdhetarët tanë që jetojnë në botë.

“Unë sot po ndihem shumë rahat pasi kam vuajtur nëntë vite duke qëndruar në shtëpi të huaja e me qira. Unë jam nënë vetë-ushqyese, jetoj me vajzën 11 vjeçare. Faleminderit shumë kryetarit dhe donatorëve”, tha ajo.

Ndërkohë, që prej organizimit të mbrëmjes humanitare “Pak nga ne, shumë për ata” nga ana e kryetarit Haziri në tetorin e vitit 2014, kjo është shtëpia numër 44 që po ndërtohet, kurse me buxhet komunal po u paguhen qiratë për 40 familje, përderisa 38 shtëpi të tjera po rinovohen sipas kërkesave të qytetarëve.