Donald Trump bën presion mbi kompanitë farmaceutike, konsideron një taksë shtesë prej 200%

Keystone EPA/JIM LO SCALZO / POOL

Presidenti amerikan Donald Trump njoftoi të martën se nuk ka ndërmend të lehtësojë politikën e tij doganore, duke paralajmëruar se planifikon të vendosë taksa të reja, këtë herë mbi produktet farmaceutike të importuara dhe bakrin.

Duke iu përgjigjur pyetjeve të gazetarëve gjatë mbledhjes së kabinetit, kreu i shtetit tha se po konsideron vendosjen e një takse shtesë prej 200% mbi produktet farmaceutike. Ai shtoi se do të presë të paktën një vit për ta zbatuar, për t’i dhënë kohë kompanive të ndërtojnë fabrika në tokën amerikane, transmeton albinfo.ch.

Për bakrin, taksa do të jetë 50%, tha ai, pa dhënë një afat specifik. Sekretari i tij i Tregtisë, Howard Lutnick, më pas i tha CNBC-së se kjo taksë për bakrin mund të vendoset “në fund të korrikut, ndoshta më 1 gusht.”

Çmimet e bakrit rriten ndjeshëm

Kjo perspektivë ka shtyrë investitorët të blejnë metalin me nxitim, duke çuar çmimin e bakrit në një nivel rekord mbi 5.40 dollarë për paund.

Që nga rikthimi në Shtëpinë e Bardhë në janar, miliarderi republikan ka bërë tarifat doganore një shtyllë kryesore të politikës së tij ekonomike: një leverdi negociuese për të marrë koncesione nga jashtë, një mjet për të rilindur industrinë vendase dhe një burim të ri të ardhurash publike.