Distria Krasniqi në pullat postare në Kosovë

Foto: Posta e Kosoves

Posta e Kosovës ka lëshuar sot në qarkullim një emision të ri të pullave postare me titullin “Distria Krasniqi”, për të nderuar njërën nga sportistet më të mëdha të vendit, raporton albinfo.ch.

Në njoftimin zyrtar thuhet se ky emision i veçantë filatelik i kushtohet kampiones botërore dhe olimpike në xhudo, Distria Krasniqi, e cila është shpallur xhudistja më e mirë në botë për vitin 2025, në të gjitha kategoritë.

Pamjet dhe informacionet për pullën janë siguruar në bashkëpunim me Federatën e Xhudos në Kosovë, duke përçuar një mesazh të fuqishëm vlerësimi për sukseset ndërkombëtare të Krasniqit.

“Përmes këtij emisioni, Posta e Kosovës nderon një histori suksesi dhe frymëzimi, duke e shndërruar imazhin e Distrias në një simbol që do të udhëtojë përtej kufijve, si ambasadore e vlerave tona kombëtare”, thuhet në njoftim, raporton albinfo.ch.