Disa zona në Shqipëri përfshihen nga zjarret

Temperaturat e larta kanë bërë që disa zona të përfshihen nga zjarret në Shqipëri

Temperaturat e larta kanë bërë që disa zona të përfshihen nga zjarret në Shqipëri.

Një kodër në zonën e Kasharit në Tiranë është përfshirë nga flakët, ku deri më tani pothuajse është djegur plotësisht njëra anë e saj, raporton Albinfo.ch.

Zona është e mbushur me bimësi të llojeve të ndryshme dhe temperaturat e larta kanë bërë që zjarri të jetë më i fuqishëm.

Deri vonë është raportuar se nuk kishte zjarrfikës, ndërsa i gjithë vendi është mbushur me tym.

Në pamje shihet se si zjarri po djeg gjithçka, ndërsa aty pranë ndodhen edhe shumë banesa, të cilat mund të rrezikohen.

Edhe në zonën e Bukmirës zjarret vijojnë të mbetet problematike, pasi vazhdojnë të jenë aktive.

Deri më tani janë djegur disa hektarë me vreshta rrushi dhe bimësi.

Ishte e pamundur lokalizimi i flakëve nga toka me zjarrfikësit dhe forcat e ushtrisë, prandaj për momentin po ndërhyhet nga ajri me dy helikopterë.

Banorët kanë dalë nga banesat e tyre, ndërsa e gjithë zona është e mbushur me tym.

Ipeshkvi i Dioqezës së Rrëshenit, Dom Gjergj Meta, ka publikuar në rrjete sociale disa foto të Bukmirës në qarkun e Lezhës, ku shfaqen vreshta në flakë, duke thënë se po rrezikon edhe shtëpitë e fshatit në Mirditë.

Ai u ka bërë thirrje autoriteteve që të dërgojnë mjete nga ajri për të ndihmuar situatën./Albinfo.ch

---