Dikiq dhe dy të tjerë dyshohen për terrorizëm në tentativë

Prokuroria Speciale në Podgoricë ua ka hequr apostrofimin “terrorizëm” 11 serbëve të arrestuar në Mal të Zi, ndërsa tre të arratisur dyshohen për veprimtari kriminale

Vetëm tre nga serbët e arrestuar në Mal të Zi, një ditë para zgjedhjeve parlamentare, dyshohen për terrorizëm në tentativë, ndërsa ndaj 11 të tjerëve Prokuroria Speciale në Podgoricë ua ka hequr apostrofimin “terrorizëm” duke i akuzuar vetëm për veprimtari kriminale.

11 të dyshuar akuzohen se gjatë natës së zgjedhjeve (16 tetor) kishin planifikuar të sulmonin ndërtesën e Kuvendit malazez dhe të arrestonin kryeministrin Millo Gjukanoviq, shkruan sot e përditshmja e Podgoricës, “Dan”, transmeton Koha.net. Sipas kësaj gazete, e cila thirret në burime nga prokuroria, në urdhëresën për zhvillimin e hetimeve ndaj 11 të dyshuarve, përmendet vetëm krijimi i organizatës kriminale, ndërsa terrorizmi as që përmendet.

Për terrorizëm në tentativë dyshohen vetëm Bratisllav Dikiq (ish komandat i xhandarmërisë serbe), Kristina Hristiq dhe Aleksandar Singjeliq, që ndodhet në arrati.

Kryeprokurori special i Malit të Zi, Milivoje Katniq më 16 tetor deklaroi se ishin privuar nga liria 20 persona, shtetas të Republikës së Serbisë, për të cilët dyshohet me bazë se kanë kryer veprat penale krijimi i organizatës kriminale në lidhje me veprën penale terrorizëm.