Diaspora preferon veturën

Sipas sondazhit të realizuar nga albinfo.ch, mbi 60% e 1174 të anketuarve udhëtojnë për në vendlindje me veturë, kurse 30% me aeroplan

Gjatë pushimeve në vendlindje, gjithkund keni hasur në vetura me targa të huaja.

Se po shtohet numri i mërgimtarëve që po udhëtojnë me vetura, më se miri tregon sondazhi i realizuar nga portali “albinfo.ch“.

62 për qind e më shumë se 1174 të anketuarve kanë thënë se kanë udhëtuar me mijëra kilometra për në vendlindje me veturat e tyre, 30 për qind kanë fluturuar me aeroplan. Vetëm 9 për qind e respondentëve janë përgjigjur se kanë udhëtuar me autobus.

Shumica prej tyre kanë zgjedhur udhëtimin me veturë, për shkak se gjatë sezonit të pushimeve rriten edhe çmimet e fluturimeve.

Edhe pse udhëtimi me vetura është më i gjatë dhe më i lodhshëm, për shumicën e mërgimtarëve ka rezultuar të jetë më ekonomik.

Agim Salihu nga Gjilani së bashku me 4 anëtarë të tjerë të familjes, për pushimet e sivjetme verore për në vendlindje kishte vendosur të udhëtonte me veturë.

Rruga që kishte zgjedhur ishte ajo përmes Italisë, ku më pas me traget do të zbarkonte në Shqipëri, e pastaj përmes autostradës së re do të arrinte në Kosovë.

Ky rrugëtim i familjes Salihu ka kushtuar rreth 1300 euro.

“Rezervimi i tragetit si dhe kabinat e fjetjes për 5 persona ishte 810 euro dy drejtimësh, pastaj karburantet për automobilin në të dy drejtimet arrinin shumën e rreth 300 eurove, pa harruar këtu edhe taksen për shfrytëzimin e autostradës italiane që ishte 120 euro. Shto këtu edhe shpenzimet e tjera rrugore në shifrën 100 euro, llogaria totale është 1330 euro, shtoi kësaj edhe përafërsisht 30 orë rrugëtim tokësor dhe atë detar”, ka treguar për itinerarin e rrugëtimit Salihu.

Me këto 1330 euro, sipas Salihut, nuk kishte shanse të udhëtonte me aeroplan bashkë me familjen.

“Me aeroplan duhej edhe më shumë se gjysma e shpenzimeve”, tregon arsyen e braktisjes së aeroplanit mërgimtari nga Gjilani.

Me shpenzime më të vogla gjatë udhëtimi ka kaluar Faton Bunjaku.

Ai kishte kaluar nëpër Kroaci, Mal të Zi për të mbërritur në Kosovë.

“Llogaria është me veturë. 500 euro me kanë shkuar gjatë gjithë udhëtimit vajtje-ardhje. Pastaj edhe atje më duhet vetura për të shëtitur nëpër Kosovë”, ka thënë Bunjaku.

“E ke më lehtë me veturë, ngase mund të ndalesh për pushime në Mal të Zi apo në Kosovë”, tha Bunjaku.

Shumë më i lirë është udhëtimi me autobus për vendlindje

65-vjeçari Riza Beqiri, edhe pse në moshë, ishte detyruar të udhëtojë mbi 20 orë me autobus  për të shkuar në Kosovë.

“Pensioni im invalidor nuk  ma mbërrin me fluturu me aeroplan. Unë me bashkëshorten paguaj autobusin 500 franga dy drejtime”, tha Beiqiri.

Nga ana tjetër, sociologët mundohen të shpjegojnë faktin e ardhjes së mërgimtarëve nga shumë këndvështrime.

Disa e lidhin me ndjenjën nacionale për vendin, për Kosovën, për familjen, të tjerët hipotezat e tyre i mbështesin në tendencat supermatike, në atë që në popull njihet më shumë si “mendjemadhësi, korum” etj.

Sociologët këtë fenomen e shohin në dimensione të ndryshme, është shumë e vërtetë që një pjesë e diasporës vijnë kryesisht me fluturime për shkak të çmimeve të larta.

“Ndërsa, pjesa tjetër që vijnë kryesisht me vetura, mundohen të shpërfaqin identitetin e tyre në forma dhe mënyra të ndryshme, e kjo pastaj krijon një sub-kulturë, një a-kulturim në vete dhe bie ndesh me normat, vlerat e qytetarëve të Kosovës. Ndaj, mu për këtë shkak edhe lindin përgjithësimet, paragjykimet, gjeneralizimet e shumta”, mendon sociologu nga Prishtina, Ferdi Kamberi.

Për sociologun nga Prishtina është faktik dallimi social, kulturor në mes të shqiptarëve të Kosovës dhe diasporës shqiptare.

“Këto dallime kryesisht kanë të bëjnë në mënyrën e veshjes, krehjen e flokëve, ekspozimin para të tjerëve lidhur me para, ari, apo vetura, etj. Zakonisht perceptimet janë të ndryshme, madje edhe me etiketime si “shaca”, që kryesisht janë etiketuar për shkak të veshjeve me ngjyrë të bardhë, pastaj mënyra e rregullimit të flokëve dallon nga ajo e zakonshmja në Kosovë”, thekson Kamberi.

Promovimi para të tjerëve lidhur me standardin e jetës, etj., të gjitha këto kanë bërë që të ketë stereotipe të shumta në drejtim të diasporës shqiptare.

“Vlen të cekët sidomos ardhja e shumë mërgimtarëve me vetura, mënyra se si sillen nëpër qytetet kosovare, përderisa në Perëndim të marrim shembull ngasin  ngadalë, këtu ekspozohen dhe ngasin tepër shpejt. Element tjetër është edhe fakti se përderisa një pjesë bukur e madhe e diasporës shqiptare punon edhe punë të vështira dhe për të arritur deri te një veturë luksoze është tepër mund i madh. Në Kosovë, kur vijnë, ekspozimet nuk mungojnë”, ka shtuar Kamberi.

Sido që të jetë, 600 franga ka qenë bileta më e lirë në dy drejtime për Prishtinë, ndërsa 800 franga ajo më e shtrenjta, që janë shitur për bashkatdhetarët nga tour operatorët në Zvicër për ketë sezon pushimesh.

Rreth 40 fluturime janë realizuar në javë gjatë sezonit të verës nga Zvicra për Prishtinë, duke përfshirë Gjenevën, Bernën, Cyrihun dhe Bazelin.

Kjo tregon se me gjithë çmimet e larta në sezon, është rritur numri i udhëtarëve që destinacion kanë Prishtinën…  

---