Dhunë e tmershme në Montreux

Sipas burimeve të albinfo.ch, të rinj shqiptarë nga Maqedonia janë po ashtu të implikuar në dhunën e tmerrshme në Montreux

Mediet e Zvicrës romande kanë raportuar për dy skenarë dhune të tmerrshme që kanë ndodhur në qytetin e Montreux, ku ka adoleshentë të lënduar seriozisht si dhe arrestime të të rinjve me prejardhje nga Ballkani.

Rasti i parë thuhet të ketë ndodhur të premten në mbrëmje, kur për aryse tërësisht banale, në qendër të qytetit, një adoleshent nga Bex (VD) ka marrë plagë të rënda me thikë në qafë dhe në gjoks dhe një shok i tij në shpatullë nga dy të rinj të tërbuar.

Prindërit e adoleshentit të lënduar shprehin indinjatën si dhe revoltën e tyre ndaj dhunës që ka pësuar djali i tyre 17-vjeçar.

Rasti tjetër ka ndodhur të nesërmen, në tregun e mbuluar të qytetit, ku tre persona janë therur po ashtu me thikë.

Burime anonime të albinfo.ch njoftojnë se në grupet e involvuara në këta skenarë dhune gjenden edhe pjesëtarë të rinj zviceran-shqiptarë nga Maqedonia që jetojnë në Montreux dhe rrethinë. Njëri prej tyre thuhet të jetë shtrirë në spital pas lëndimeve të marra më ditën e shtunë.

Rajoni i Riviera-Chablais që përmbledh qytetet Vevey, Montreux dhe Villeneuve ka një numër të rëndësishëm të shqiptarëve nga Maqedonia.

Nga burime të albinfo.ch mësohet se në këto lokalitete ekzistojnë banda të ndryshme të përziera dhe ku ka mjaft të rinj shqiptarë nga Maqedonia që janë shpeshherë të implikuar në skenarë dhune. Nën ndikimin e alkoolit si dhe të kanabisit, të rinjtë, shpeshherë të dështuar në futjen e tyre në jetën profesionale, enden rrugëve si dhe shesheve deri në orët e vona.

Jo më larg se në një week-end të para ca ditëve raportohet se dy banda shqiptare janë përleshur mes tyre, me një dhunë të shfrenuar në dalje të një diskoteke.

Duhet po ashtu të konstatohet se organizimi i shqiptarëve në këtë pjesë të Zvicrës romande është thjeshtë joekzistues. Nuk egziston asnjë shoqatë shqiptare në Vevey apo Montreux.