Dhjetëra të lënduar në Ferizaj nga shpërthimi i bombolës së gazit

“Numri i të lënduarve nga shpërthimi i bombolës së gazit ka arritur në 42, në mesin e tyre janë edhe dy të mitur”, ka thënë Qazim Reka

Një bombol gazi shpërtheu në një restorant në Ferizaj duke lënë të plagosur disa persona.

Ngjarja e rëndë ndodhi në lagjen “The Village”, nga ku mësohet se 4 persona ndodhen në gjendje kritike për jetën.

Mediat vendore raportojnë se numri i të lënduarve ka shkuar në 42, përcjell albinfo.ch.

Drejtori i Spitalit Rajonal të Ferizajt, Jeton Zeqiri, ka thënë se 32 pacientë, kërkuan ndihmë mjekësore si pasojë e shpërthimit.

“24 prej tyre janë hospitalizuar. 8 prej tyre kanë marrë djegie të shkallës së lartë dhe janë dërguar për në Qendrën Klinike Universitare të Kosovës. 4 janë në gjendje kritike për jetën. Ndërsa 12 të tjerë janë duke u trajtuar në Spitalin e Ferizajt dhe ndodhen në gjendje të qëndrueshme”, është shprehur Zeqiri për Top Channel.

Më vonë numri ka shkuar në 42. Kështu ka bërë të ditur për Telegrafin, Major Qazim Reka nga Policia e Kosovës.

Ai ka shtuar se nga 42 të lënduar 12 prej tyre janë dërguar për në QKUK.

Shpërthimi ka shkaktuar gjithashtu edhe dëme të shumta materiale.

---