Dhjetë vjet pas shpalljes së pavarësisë, njohjet mbeten sfida kryesore e Kosovës

Arritjet dhe aspiratat e shtetit të Kosovës, janë diskutuar si temë nga Akademia Diplomatike e Ministrisë së Punëve të Jashtme të Kosovës, ku ka mbizotëruar pikërisht çështja e njohjes dhe subjektivitetit ndërkombëtar

Edhe dhjetë vjet pas shpalljes së pavarësisë, njohjet e reja dhe anëtarësimi në Kombet e Bashkuara mbeten sfidat kryesore të Kosovës.

Kosova vlerësohet se ka krijuar një subjekt ndërkombëtar me 115 njohje, por akoma të papërmbyllur, derisa nuk siguron edhe normalizimin e raporteve me Serbinë.

Ky normalizim, sipas Evropës së Lirë, besohet se do t’ia hapte Kosovës dyert drejt anëtarësimit në OKB.

Arritjet dhe aspiratat e shtetit të Kosovës, janë diskutuar si temë nga Akademia Diplomatike e Ministrisë së Punëve të Jashtme të Kosovës, ku ka mbizotëruar pikërisht çështja e njohjes dhe subjektivitetit ndërkombëtar.

Asistent i Presidentit në Këshillin për Tolerancë dhe Paqe, Nabil Ayad, tha se njohjet e reja, mbesin sfidat kryesore për Kosovën.

“Kosova është ballafaquar dhe vazhdon të përballet me shumë pengesa rreth perspektivës së saj, sigurisë dhe ekzistencës”, ka thënë Ayad. “Aktualisht ka 115 shtete që e kanë njohur Kosovën dhe e di që Qeveria po punon shumë që të shtohet numri i njohjeve”, tha Ayad, duke i vlerësuar njohjet e reja si shumë të rëndësishme për subjektivitetin ndërkombëtar të Kosovës.

Ndërkohë, Rejhan Vuniqi, zëvendësministre e Punëve të Jashtme tha se shteti i Kosovës kishte një rrugë jo të lehtë deri te shtetësia e saj. Sipas saj, Kosova po angazhohet në planin e jashtëm dhe të brendshëm që të ndërtojë shoqëri demokratike dhe të barabartë.

“Deri më sot, Kosovën e kanë njohur 115 shtete. Prej tyre 112 nga 193 shtete anëtare të Kombeve të Bashkuara, 23 nga 28 vendet anëtare të Bashkimit Evropian, 25 nga 29 shtete anëtare të NATO-s apo 37 nga 57 vendet anëtare të Organizatës së Bashkëpunimit Islamik”, ka thënë Vuniqi.

Megjithatë, sipas saj, Kosova po përballet me pengesa të ndryshme për njohje, që kryesisht vijnë prej shteteve të fuqishme si Kina dhe Rusia.

Pas disa viteve të brishtësisë nga aspekti i sigurisë, tani u vlerësua se Kosova ka një qëndrueshmëri të brendshme, ku raportet ndëretnike nuk shihen më si problemi kryesor, siç ishin dikur. Ndërkaq sfidë më vete u tha se mbetet formimi i Ushtrisë së Kosovës, me çka do të rrumbullakoheshin strukturat e saj të sigurisë dhe mbrojtjes.

Burim Ramadani, zëvendësministër i Forcave të Sigurisë së Kosovës, tha se shndërrimi i FSK-së në Forca të Armatosura, mbetet një prej synimeve kryesore të politikës aktuale të vendit.

“Ne duam që të anëtarësohemi në NATO dhe që NATO të qëndrojë në Kosovë. Ne jemi në proces intensiv për të transformuar FSK-në në Forca të Armatosura të Kosovës. Ne synojmë të arrijmë fazën e dialogut për anëtarësim në NATO dhe të përfshihemi në programin për paqe”, theksoi Ramadani.