Deputeti i SVP-së: Zvicra të mos pranojë më refugjatë myslimanë

Walter Wobmann nga SVP/UDC kërkon masa të menjëhershme që “të mos pranohet në Zvicër asnjë azilkërkues islamik nga Iraku dhe Siria"

Shoqëria zvicerane vazhdon të jetë e tronditur nga masakra që ndodhi të mërkurën në Paris, me ç`rast “në emër të zotit” u vranë 12 njerëz. Në mesin e mijëra dënimeve të ashpra dhe shprehjeve të mllefit kundër terroristëve ka rënë në sy një twitter i pazakonshëm i ministres së energjetikës, Doris Leuthard.

Ajo, para se të dënojë krimin, ka shkruar fjalinë e shkurtë: ”Satira nuk është leje për gjithçka”, duke e hedhur pjesën e fajit edhe te karikaturistët tashmë të vrarë. Kjo fjali, edhe pse pasohet me fjalitë tjera ku Leuthard dënon gjithsesi krimin, ka shkaktuar reagime të ashpra në drejtim të saj. As përmirësimi dhe deklarimi se shprehja e saj është kuptuar gabimisht, nuk e ka zbutur mllefin ndaj saj.

Ndër më të ashprit ndaj ministres që vjen nga partia demokristiane (CVP/PDC) është treguar deputeti nacional nga partia SVP/UDC, Walter Wobmann. “Deklarata e saj është krejtësisht e pa vend. Me këtë ajo kapitullon para islamistëve radikalë dhe u krijon atyre hapësirë”. Më tutje

Wobmann akuzon Zvicrën për “naivitet në qasje me islamin radikal, i cili përbën një rrezik për Zvicrën liridashëse. Përhapja e islamizmit tash duhet që përfundimisht  të luftohet me vendosmëri. Ndryshe, është vetëm çështje kohe kur edhe në Zvicër mund të ndodhë një sulm i ngjashëm”, ka thënë Wobmann.

Por, më interesantja vjen në fund. Deputeti nga SVP kërkon masa të menjëhershme që “të mos pranohet në Zvicër asnjë azilkërkues islamik nga Iraku dhe Siria. Pasi që përmes rrugës së azilit, këtu mund të vijnë terroristët më të rrezikshëm. Ka mjaft të përndjekur të religjioneve tjera që kane nevojë për ndihmë, dhe atyre Zvicra edhe duhet t`ua ofrojë ndihmën”, shkruan blick.ch.