Dënim i përjetshëm për vrasësit e Enver Hadrit

Të dënuarit janë Bozhidar Spasiq, ish-shef i UDB-së për operacione speciale dhe vrasësit Veselin Vukotiq dhe Andrija Drashkoviq. Lajmin e ka bërë të ditur për media, Teuta Hadri, e bija e atdhetarit Enver Hadri

Gjykata Penale e Brukselit i ka shpallur fajtorë dhe i ka dënuar me burg të përjetshëm vrasësit e Enver Hadrit.

Këtë lajm e ka bërë të ditur për media, Teuta Hadri, e bija e atdhetarit Enver Hadri, i vrarë nga UDB -ja serbe në Bruksel, më 22 shkurt 1990.

Dje, Gjykata e Madhe Penale e Brukselit, i shpalli fajtorë për vrasjen e Enver Hadrit, Bozhidar Spasiqin, ish-shef i UDB-ës për operacione speciale dhe vrasësit Veselin Vukotiq dhe Andrija Drashkoviq.

Ndërkaq sot, edhe pse prokurorja e rastit kërkoi për fajtorët nga 30 vjet burg për çdonjërin, megjithatë trupi gjykues, i përbërë nga përfaqësuesit e drejtpërdrejtë të popullit në sistemin e drejtësisë, vendosën ndryshe, ata vendosën që kriminelët serbë të dënohen me burg të përjetshëm, shkruan Teuta Hadri në njoftimin e saj për media.

“Kjo është një fitore e madhe e drejtësisë mbi krimin politik. Me këtë vendim, Gjykata Penale e Brukselit, kryeqytetit të Evropës, krahas organizatorit dhe vrasësve të Enver Hadrit, praktikisht e dënoi edhe shtetin serb. Sepse organet serbe prej një çerek shekulli, nuk lanë gur pa lëvizur, që vrasja e Enver Hadrit të mos zbardhet dhe dorasit të mos ndëshkohen.

Shpresojmë se edhe vrasjet e ngjashme politike të kryera kundër shqiptarëve, apo kujtdo qoftë tjetër, do të zbardhen deri në imtësi dhe organizatorët dhe vrasësit të marrin dënimin e merituar”, shkruanTeuta Hadri  në letrën e saj drejtuar mediave.