Del Ponte nuk është ftuar në hetime

Del Ponte ka qenë e befasuar nga informata për formimin e ekipit dhe konkursin për zgjedhje të ekipit të ri shtatanëtarësh

Ish-kryeprokurorja e Tribunalit të Hagës, Carla del Ponte, deklaroi se askush me të nuk ka kontaktuar lidhur me formimin e ekipit të ri nën ombrellën e EULEX-it i cili do t’i hulumtojë informatat për trafikim me organe të njerëzve në Kosovë.

Sipas gazetës “Blic”, Del Ponte ka qenë e befasuar nga informata për formimin e ekipit dhe konkurs për zgjedhje të ekipit të ri shtatanëtarësh.

“Nuk di asgjë për këtë, por duhet të presim të shohim se çka do të ndodhë gjatë ditëve të ardhshme”, tha Del Ponte dhe theksoi se ajo “çdo herë” është e gatshme të ndërmarrë hetimin.

Zëdhënësja e EULEX-it, Irina Gudeleviç, ka deklaruar se procesi do të zhvillohet nën juridiksionin e Gjykatës së Qarkut të Prishtinës, për shkak se Brukseli nuk mund të ketë juridiksion në Kosovë.