Del Ponte ka dhënë dorëheqje nga Komisioni për krime në Siri

“Nga bashkësia ndërkombëtare dhe Këshilli i Sigurimit nuk siguruam dot një rezolutë, e cila do të ndihmonte në themelimin e tribunalit për të gjitha krimet që janë kryer në Siri”

Prokuroria veterane, Carla del Ponte, ka dhënë dorëheqje nga hetimi i OKB-së për krimet e luftës në Siri, duke e kritikuar Këshillin e Sigurimit dhe duke thënë se qeveria siriane kishte përdorur armë kimike.

Ish-kryeprokurorja zvicerane, e cila hetoi krimet e luftës në Ruandë dhe ish-Jugosllavi, qysh në gusht kishte paralajmëruar se do të jepte dorëheqje nga Komisioni i OKB-së  nga shkaku i mungesës së përkrahjes politike.

Duke u përshëndetur me Komisionin, që ishte themeluar para 6 vjetësh, Del Ponte ka thënë se ajo u desh të largohej nga shkaku i frustrimit.

“Nga bashkësia ndërkombëtare dhe Këshilli i Sigurimit nuk siguruam dot një rezolutë, e cila do të ndihmonte në themelimin e tribunalit për të gjitha krimet që janë kryer në Siri,” tha ajo. Muajin e shkuar, Del Ponte i kishte thënë një gazete zvicerane që ka shumë dëshmi, të cilat do të mund ta ngarkojnë presidentin sirian për krime lufte.

Duke u larguar, ajo i tha ambasadorit sirian në OKB se kishte të drejtë kur përfundoi se regjimi i Assadit përdori armë kimike ndaj civilëve.