Deklaratat e Xhakës dhe Shaqirit pas eliminimit të Zvicrës

(KEYSTONE/Laurent Gillieron)

Zvicra është eliminuar sot nga Euro 2024, pasi u mposht nga Anglia gjatë penalltive.

Kapiteni i Zvicrës, Granit Xhaka, pas përfundimit të ndeshjes ka treguar se ka luajtur i lënduar.

“Të hënën u diagnostifikova me një fibër muskulore të çarë në aduktorët e mi. Por unë doja të isha këtu me ekipin, andaj shtrëngova dhëmbët. Nuk mund të godisja drejt portës, apo të bëja ndonjë pasim të gjatë”, ka thënë ai, transmeton albinfo.ch.

Sa i përket penalltisë së humbur nga Akanji, ai është shprehur krenar me të.

“Dikush duhej ta bënte penalltinë e parë. Unë vetë kam qenë në këtë pozicion. Kjo e bën atë edhe më të fortë. Kokën lart, jam krenar me këtë djalë”, deklaroi ai.

Për përfundimin e Euro 2024, për Zvicrën, Xhaka ka thënë se eliminimi ishte brutal.

“Duhet ta pranojmë. Sigurisht që dhemb të humbasësh kështu. Është brutale. Kishim cilësinë për të shkuar në gjysmëfinale”.

Në anën tjetër, Xherdan Shaqiri po ashtu e ka quajtur brutal eliminimin në çerekfinale të Euro 2024.

“Mendoj se nuk ka asgjë më brutale se të eliminohesh me penallti. Kemi luftuar dhe kemi dhënë çdo gjë për të vazhduar rrugën. Jam shumë krenar me ekipin dhe mendoj se kemi bërë shumë njerëz krenarë dhe të lumtur. Ky ishte gjithnjë synimi ynë i madh. Në futboll një ekip eliminohet edhe me penallti dhe Anglia ishte më e mirë në to sot. Ishim afër, por për fat të keq anglezët kishin nerva më të qeta. Por njerëzit do ta kujtojnë që luajtëm Evropian të mirë. Mund të shihet edhe në media sociale si kanë festuar njerëzit dhe kjo ka ndikuar te ne. Kjo eufori na ka prekur dhe nuk mund të fajësohemi për asgjë. Të gjithë jemi shumë krenarë me paraqitjen dhe mund të ndërtojmë në këtë për turneun e ardhshëm”, ka thënë ai.