Degradohet fjalori politik: Haradinaj kërkon falje për fjalën “peder”

Në mbledhje të Komisionit për Politikë të Jashtme, Haradinaj e quajti “peder” kryetarin e komisionit për demarkacion, Murat Mehën. Pas kësaj fyerje pasuan reagimet

Një fjali e pamenduar mirë e ish-kryeministrit dhe liderit të AAK-së, Ramush Haradinaj është bërë skandal në Kosovë. Në mbledhje të Komisionit Parlamentar për Politikë të Jashtme, Haradinaj e quajti “peder” kryetarin e komisionit qeveritar për caktimin e vijës kufitare të Kosovës me Malin e Zi, Murat Mehën.

I revoltuar në vendimin që ka bërë Meha dhe komisioni i tij për përcaktimin e kufirit me Malin e Zi, Haradinaj e ka akuzuar dhe fyer rëndë atë. Me herët Mehen e ka quajt “prevarant ordiner” ndërsa dje edhe “peder”.

Mirëpo menjëherë pas këtij fjalimi, reagoi vetë i apostrofuari Murat Meha por edhe komuniteti LGBT (Lesbian, Gay, Biseksual dhe Transgjinor), duke e quajtur ofendim deklaratën e Ramush Haradinaj. Ky i fundit u zu në pozicion jo të volitshëm, dhe iu kërkoi falje LGBT-së, por jo edhe Mehës.

“Cilësimi që i kam bërë Murat Mehës në Komisionin e Jashtëm Parlamentar, s’ka të bëjë me fjalor diskriminues ndaj asnjë kategorie njerëzore, e as ndaj komunitetit LGBT.

Ajo që kam thënë ka të bëjë vetëm me karakterin e kryetarit të Komisionit për Demarkacion, por nëse dikush është ndier i fyer me këtë fjalë, u kërkoj falje publike”, thotë Haradinaj.

Ndërkaq Meha i kontaktuar nga Kallxo.com, nuk ka dashur të komentojë rreth cilësimit që mori nga lideri i partisë së dytë opozitare në Kosovë. “Etika ime morale, profesionale, dhe familjare e cila 100 vjet ka kontribuar për shtetin nuk më lejon që të shprehem dhe të sillem në mënyrën e tillë, me njerëz të cilët jetojnë në shekullin e XXI dhe nuk e kuptojnë dokumentacionin”, tha Meha për KALLXO.com.

Deklaratën e Haradinajt e ka dënuar edhe drejtori ekzekutiv i Këshillit për Mbrojtjen e të Drejtave dhe Lirive të Njeriut (KMDLNJ), Behxhet Shala. Ai tha se Haradinaj ka përdorur “fjalor fyes” ndaj një komuniteti.

“Siç duket, Haradinaj ka dalur prej vetes për shkak se, sipas tij, është bërë një padrejtësi e madhe. Është fjalor fyes për një komunitet tjetër, si dhe është fyes edhe për vet Murat Mehën”, tha Behxhet Shala.

Analistët politik, ndërkaq konsiderojnë se shkalla politike në vend ka filluar të degradohet, sa i përket fjalorit. Ata thonë se nuk është vetëm kjo e deklaratë e kryetarit të AAK-së që fyen një komunitet apo personalitet. Edhe kryeministri Isa Mustafa disa ditë më parë, ish kryetarin e Vetëvendosjes, Albin Kurti e quajti gomar. Ndërsa deputeti i Vetëvendosje, Fisnik Ismajli foli edhe fjalë banale në një debat në Kuvend.