DASH: Terrorizmi iranian synon Shqipërinë

Sipas raportit të DASH, Shqipëria kërcënohet nga terrorizmi iranian, që e sheh vendin si një pikëmbështetje në kontinentin evropian

Raporti për Terrorizëm i Departamentit Amerikan të Shtetit për vitin 2016 ka vënë re se terrorizmi iranian ka arritur edhe në Shqipëri.

Shqipëria aty përmendet jo si vend mbështetës, por si një vend i synuar nga terrorizmi.

Sipas këtij raporti, Shqipëria kërcënohet nga terrorizmi iranian, që e sheh vendin si një pikëmbështetje në kontinentin evropian.

Si edhe në Bosnje, Irani ka tentuar të infiltrohet përmes krijimit të organizatave bamirëse dhe kulturore që shërbejnë si organizata të fshehta për Trupat e Gardës Revolucionare Islamike dhe Ministrinë e Inteligjencës.

Më tej, raporti thekson se Irani ka vijuar aktivitetin terrorist, duke rritur mbështetjen për Hezbollahun, grupet palestineze terroriste në Gaza dhe grupimet e ndryshme në Siri, Irak e mbarë Lindjen e Mesme. Sa i përket pranisë në Evropë, Departamenti Amerikan i Shtetit vlerëson se shumë aktivitete mbeten ende të pazgjidhura, raporton Ora News.

Por pavarësisht përpjekjeve, terrorizmi iranian nuk po gjen mbështetje në popullsinë e përgjithshme të Shqipërisë. Qeveria shqiptare dhe parlamenti arritën një marrëveshje unanime për të lejuar një numër të madh të anëtarëve të grupit opozitar demokratik MEK të Iranit, të vendoseshin në Shqipëri vitin e kaluar.