Danone tërheq nga tregu disa seri qumështi për foshnje edhe në Zvicër

Rastet e tërheqjes së produkteve ushqimore për foshnje për shkak të dyshimit për praninë e toksinave janë në rritje. Kompania franceze Danone, konkurrente e Nestlé, ka njoftuar se po tërheq nga shitja edhe në Zvicër disa seri qumështi për foshnje.

Sipas një komunikate të publikuar të enjten, disa produkte të markës Aptamil dyshohen se mund të përmbajnë cereulide, një toksinë bakteriale. Ditët e fundit, Danone ka tërhequr produkte të qumështit për foshnje edhe në disa vende të tjera, duke theksuar deri më tani se produktet e shitura në Zvicër nuk ishin të prekura. Megjithatë, masa e re – që prek gjithashtu Gjermaninë dhe Austrinë – vjen si pasojë e udhëzimeve të reja të Bashkimit Evropian, thuhet në deklaratë.

Të hënën, Autoriteti Evropian për Sigurinë Ushqimore (EFSA) propozoi një vlerë kufitare për cereulide dhe përcaktoi një dozë ditore të tolerueshme për foshnjat. Në Francë, kjo vlerë kufitare kishte qenë më parë më e lartë.
“Shëndeti dhe siguria e foshnjave, si dhe respektimi i rregulloreve lokale, janë gjithmonë prioriteti kryesor i Danone,” shkruan kompania, duke përshëndetur qartësinë e sjellë nga udhëzimet e reja.

Tërheqje në mbi 60 vende

Që nga fundi i vitit 2025, disa prodhues të ushqimeve për foshnje – përfshirë Nestlé, Danone, Lactalis dhe kompaninë zvicerane Hochdorf – kanë ndërmarrë tërheqje masive të produkteve për shkak të rrezikut të ndotjes me cereulide, transmeton albinfo.ch.

Në Zvicër, qumështi Bimbosan, i prodhuar nga Hochdorf, si dhe qumështi Babybio nga kompania franceze Vitagermine, “janë aktualisht të kontaminuar me këtë toksinë dhe nuk duhet të përdoren”, njofton Zyra Federale për Sigurinë Ushqimore dhe Çështjet Veterinare (FSVO) në faqen e saj zyrtare.

FSVO thekson gjithashtu se “nuk përjashtohet plotësisht mundësia që edhe produkte të tjera të jenë të prekura”.
Farmacitë në Zvicrën frëngjishtfolëse raportojnë një fluks të madh kërkesash nga prindërit lidhur me tërheqjen e qumështit pluhur për foshnje, përfshirë produktet e markës Guigoz, që i përkasin grupit Nestlé.