Cyrih: Testet për sëmundje seksualisht të transmetueshme do të jenë me pagesë nga 2027

Keystone

Qyteti i Cyrihut ka vendosur të zgjasë edhe për dy vite projektin pilot të testimit falas për sëmundje seksualisht të transmetueshme (SST). Deri tani janë testuar rreth 6,600 persona, shumica të rinj nën moshën 25 vjeç. Rezultatet tregojnë se më së shpeshti janë zbuluar klamidia, gonorrea dhe sifilisi, ndërsa katër persona kanë rezultuar pozitivë për HIV, transmeton albinfo.ch.

Projekti ka kushtuar mbi 2.6 milionë franga, por autoritetet thonë se parandalimi i vetëm disa rasteve me HIV e justifikon këtë shpenzim, pasi kostoja shëndetësore gjatë jetës për një pacient mund të arrijë deri në 1 milion franga.

Nga viti 2027, testet do të bëhen pjesë e ofertës së përhershme, kufiri i moshës do të rritet në 30 vjeç, por ato nuk do të jenë më krejtësisht falas. Qytetarët do të paguajnë deri në 30 franga për test, ndërkohë që kostoja reale pa mbështetjen e qytetit shkon në rreth 200 franga.

Autoritetet theksojnë se kjo tarifë simbolike synon të nxisë përgjegjësinë individuale, ndërsa nuk pritet të ulë ndjeshëm kërkesën për testim.