Në Prishtinë është bërë inaugurimi i sheshit “Erhard Busek”.

Rama ka shkruar se emërtimi i këtij sheshi është një shenjë mirënjohjeje për angazhimin e palodhur të Erhard Busek.

“Sot, bashkë me ambasadorin e Austrisë në Kosovë, inaguruam Sheshin Erhard Busek, pranë Bibliotekës Kombëtare të Kosovës. Ky vendim u miratua në unanimitet në Kuvendin Komunal, duke treguar vlerësimin e përbashkët për figurën dhe kontributin e tij të jashtëzakonshëm. Emërtimi i këtij sheshi është një shenjë mirënjohjeje për angazhimin e palodhur të Erhard Busek në forcimin e marrëdhënieve mes Kosovës dhe Austrisë, si dhe për rolin e tij të rëndësishëm diplomatik në rajon”, ka pohuar ai.

Tutje, ai ka shkruar se Busek  ishte një mik i madh i vendit tonë dhe një zë i fuqishëm për stabilitetin dhe bashkëpunimin në Ballkan.

“Me këtë shesh, ne jo vetëm që nderojmë trashëgiminë e tij, por edhe forcojmë lidhjet mes dy shteteve tona, duke ruajtur kujtimin e një miku të madh të Kosovës”.

Ish-presidenti Hashim Thaçi është parë duke u larguar nga objekti i QKUK-së, ku qëndroi për disa orë për të vizituar babanë e sëmurë.

Largimi i Thaçit u shoqërua me brohorima nga dhjetëra njerëz që ishin mbledhur në oborrin e klinikës.

Prishtina është stacioni i parë në Ballkan në të cilin është ndalur muzeu mobil, me të cilin Turqia shpalos rrëfimin e saj për Luftën e Çanakales. Ka zbarkuar midis kryeqytetit, të mërkurën, 45 ditë para se të shënohet 110-vjetori i asaj që njihet edhe si Beteja e Gallipolit, midis forcave angleze dhe franceze dhe në anën tjetër ushtrisë osmane ndihmuar nga Austro-Hungaria dhe Gjermania. 

Llogaritet se aty humbën jetën rreth 280 mijë veta, në mesin e të cilëve 25 mijë shqiptarë. Ishte njëra prej betejave më të mëdha në Luftën e Parë Botërore dhe zgjati prej 25 prillit të vitit 1915 deri më 9 janar 1916. Fituan forcat osmane dhe lavdinë e saj e feston Turqia. Në këtë frymë e sjell edhe muzeu mobil. Historiografia shqiptare ka qasje të ndryshme për të. Pikëpyetje e madhe ngelet prania e shqiptarëve në këtë luftë, që u zhvillua pasi Shqipëria shpalli Pavarësinë më 1912. Një pjesë e madhe e ushtarëve shqiptarë mendohet të kenë qenë prej atyre që ishin zhvendosur në Turqi për të jetuar.

Muzeu mobil të mërkurën është vendosur në Prishtinë, përballë hotelit “Grand” nëpërmjet një leje të lëshuar nga Drejtoria e Shërbimeve Publike e kryeqytetit. Brenda muzeut, që do të qëndrojë edhe sot në kryeqytet, jepet një historik i shkurtër i asaj që ka ndodhur në një prej betejave më të gjata e më të përgjakshme të Luftës së Parë Botërore. Muzeu që do të ndalet edhe në Mamushë, Dragash e Prizren ofron eksponate të asaj kohe, një paraqitje në poliester të themeluesit të Turqisë, Mustafa Kemal Atatürk e të dhëna të tjera. Atatürk, për të cilin thuhet se ka prejardhje shqiptare, në tetor të vitit 1923 do të themelonte atë që sot është Turqia. Ai i kishte prirë Divizionit të 19-të në betejën e Çanakalesë, formacion ky për të cilin thuhet se përbëhej kryesisht nga shqiptarët. Muzeu mobil që deri në maj do të shëtisë në tetë shtete të rajonit, ofron të dhëna vetëm në gjuhë turke, përderisa dokumentarët që shfaqjen në të kanë edhe titra në anglisht. 

“Me moton ‘Kudo që valëvitet flamuri i kuq, atje është Çanakale’, muzeu ynë mobil, i cili ka udhëtuar në të gjithë cepat e Turqisë, tani po shkon drejt zemrës sonë, Ballkanit”, shkruhet në ueb-faqen e Qendrës Historike të Gallipolit.  “Ne do të bashkohemi me bashkatdhetarët tanë në Ballkan për të ndarë epikën heroike të të parëve tanë, kujtimet e tyre të paharrueshme dhe krenarinë në zemrat tona. Si Muze i lëvizshëm i Betejave të Çanakalesë, ne jemi të emocionuar të ndajmë me ju entuziazmin e bartjes së gjurmëve të historisë sonë dhe ‘Shpirtit të Çanakalesë’ në të ardhmen. Bashkohuni me ne në këtë udhëtim unik dhe le të ringjallim së bashku kujtimet heroike të historisë sonë”, shkruhet në këtë ueb-faqe. 

Historiani Enver Rexha të mërkurën ka hyrë në Muze dhe ka qëndruar për pak minuta. Pasi ka dalë, ka thënë se bëhet fjalë për një prezantim modest të luftës. 

“Është një prezantim i shkurtër i asaj lufte të madhe. Nuk e di përse shqiptarët kanë shkuar për të luftuar në atë kohë kur Pavarësia e Shqipërisë veç ishte e shpallur. Mund të them se ka mundësi të jenë dy arsye të shkuarjes së shqiptarëve: çështja ideologjike ose kanë qenë edhe mercenar”, ka thënë ai. 

Muzeu mobil në Prishtinë është hapur nga ambasadori i Turqisë në Kosovë, Sabri Tunç Angılı, dhe konsulli i përgjithshëm i Prizrenit, Celal Doğan. 

Ambasadori Angılı citohet të ketë thënë se janë të shumtë ata nga Turqia,  Ballkani dhe Gadishulli Arabik, që luftuan dhe u bënë dëshmorë në atë që njihet edhe si Beteja e Gallipolit.

“Prandaj më duket shumë e rëndësishme dhe e vlefshme që ky muze i lëvizshëm i Luftërave të Çanakalesë erdhi në Kosovë për t’u takuar me kosovarët fillimisht në Prishtinë, pastaj në Mamushë, Dragash dhe Prizren”, ka thënë ai. 

Koordinatori i projektit të këtij muzeu, Engin Karataş, ka bërë të ditur se do të jenë në Ballkan për dy muaj dhe do të përpiqen që shpirti i Çanakalesë të ndihet në qytete të ndryshme. 

Pas Kosovës, muzeu mobil do të udhëtojë në Shqipëri, Mal të Zi, Bosnjë-Hercegovinë, Serbi, Maqedoni të Veriut për ta përmbyllur këtë rrugëtim në Bullgari në muajin maj.

Ish-presidenti i Kosovës, Hashim Thaçi, ka arritur sot në Kosovë për një vizitë të përkohshme, raporton albinfo.ch.

Vizita e tij është mundësuar pas miratimit të kërkesës nga Gjykata Speciale, për shkak të gjendjes së rënduar shëndetësore të babait të tij. Thaçi është lejuar të qëndrojë në Kosovë për një ditë, në kuadër të një vizite humanitare.

Aktualisht, ai ndodhet në ambientet e Qendrës Klinike dhe Universitare të Kosovës (QKUK), në Klinikën e Kardiologjisë, ku po trajtohet babai i tij. Në oborrin e spitalit janë vërejtur forca të shtuara të policisë dhe një numër qytetarësh.

Kërkesa për këtë vizitë ishte bërë më 14 shkurt 2025 dhe ishte e katërta me radhë nga ish-presidenti Thaçi, i cili kishte shprehur gatishmërinë për të respektuar të gjitha procedurat e kërkuara nga gjykata.

Sekretari i Përgjithshëm i NATO-s, Mark Rutte sot do të qëndrojë në Shtëpinë e Bardhë në Washington, përcjell albinfo.ch.

Atje, zyrtarin e lartë të Aleancës Veri-Atlantike  do ta presë presidenti amerikan Donald Trump.

Kjo vizitë e Rutte vjen dy ditë pas qëndrimit të tij në Kosovë ku pati të ndara me presidenten e vendit, Vjosa Osmani si dhe kryeministrin e vendit, Albin Kurti.

Mes tjerash, Rutte në Prishtinë siguroi se Shtetet e Bashkuara të Amerikës, dhe presidenti Donald Trump, mbeten të përkushtuara në KFOR dhe në NATO.

Ai paraprakisht qëndroi në Bosnjë dhe Hercegovinë ku pati takime me zyrtarë të lartë atje.

Një ditë më parë, Aleanca Veri- Atlantike ka bërë një përmbledhje të vizitave në Ballkan të shefit të saj, Mark Rutte.

Në njoftimin e NATO-s u tha se gjatë vizitës së tij,  Rutte theksoi se “NATO-ja mbetet fuqishëm e përkushtuar ndaj stabilitetit të këtij rajoni dhe ndaj sovranitetit, integritetit territorial dhe sigurisë së Bosnjë-Hercegovinës”.

Po ashtu në njoftim, u dhanë detaje edhe për vizitën në Prishtinë të shefit të organizatës më të madhe ushtarake në botë.

Në kryeqytetin e Kosovës,  Sekretari i Përgjithshëm udhëhoqi një vizitë të Këshillit të Atlantikut dhe partnerëve kontribuues të trupave në misionin e KFOR-it të udhëhequr nga NATO dhe Ekipin Këshillues dhe Ndërlidhës të NATO-s.

.“NATO do të vazhdojë të luajë rolin e saj, në koordinim të ngushtë me Policinë e Kosovës dhe Misionin e BE-së për Sundimin e Ligjit në Kosovë, në rolet tona përkatëse si reagues të sigurisë”, shtoi ai.

“Zgjidhja që çon drejt paqes afatgjatë është politike; NATO do të vazhdojë të mbështesë plotësisht normalizimin e marrëdhënieve ndërmjet Beogradit dhe Prishtinës, të udhëhequr nga Bashkimi Evropian; kjo është mënyra e vetme për të zgjidhur çështjet në pritje dhe për të siguruar një të ardhme të qëndrueshme, duke siguruar që të drejtat e të gjitha komuniteteve të respektohen dhe të mbrohen; për të çuar përpara dialogun, të dyja palët duhet të tregojnë fleksibilitet, të bëjnë kompromiset e nevojshme dhe të fokusohen në përfitimet afatgjata”, theksoi ai, njoftoi NATO.

Kosova kryeson listën e vendeve evropiane me më shumë vdekje të parakohshme për milion banorë si pasojë e ndotjes së ajrit, njofton Instituti Atlas, përcjell albinfo.ch.

Në një grafikë të publikuar në Facebook, Kosova renditet e para për numrin e vdekjeve për shkak të ndotjes PM2.5, e cila vjen kryesisht nga trafiku, industria dhe djegia e karburanteve.

“PM2.5 janë grimca të imta në ajër—30 herë më të vogla se një fije floku—që depërtojnë thellë në mushkëri dhe qarkullimin e gjakut. Ato shkaktojnë sëmundje të zemrës, kancer të mushkërive dhe goditje në tru.

Ajri më i pastër = jetë më të gjata e më të shëndetshme!”, thuhet në raportin e institutit.

Më herët, Instituti Kombëtar i Shëndetit Publik kishte paralajmëruar se ndotja e ajrit paraqet një rrezik serioz për shëndetin, veçanërisht për grupet e ndjeshme dhe personat me sëmundje të frymëmarrjes.

Instituti sqaron se ndotja e ajrit ka efekte të shumta shëndetësore. Në afat të shkurtër, ajo mund të shkaktojë sëmundje, shtrime në spital, komplikime shëndetësore dhe vdekje. Ndërsa në afat të gjatë, ndotja ndikon në rritjen e rasteve të kancerit të mushkërive, sëmundjeve kardiovaskulare dhe pulmonare.

“Shkaqet kryesore të vdekjeve dhe sëmundjeve të lidhura me ndotjen e ajrit janë: sëmundjet ishemike të zemrës, goditja në tru, sëmundjet e frymëmarrjes, sëmundjet pulmonare obstruktive kronike, bronhiti, emfizema, irritimi i syve dhe sistemit të frymëmarrjes, si dhe kanceri i mushkërive. Sulmet e astmës gjithashtu përkeqësohen nga ajri i ndotur.”

Sipas të dhënave të Organizatës Botërore të Shëndetësisë (OBSh), ndotja e ajrit shkakton pothuajse 500.000 vdekje të parakohshme çdo vit në botë. Nga këto, rreth 290.000 ndodhin në vendet me të ardhura të larta, ndërsa 190.000 në vendet me të ardhura të mesme dhe të ulëta.