Archives

Sektori i arit në Zvicër po lulëzon

Posted on by Drin Reçica

Sektori i arit në Zvicër po lulëzon pasi investitorët kërkojnë asete të sigurta në mes të paqëndrueshmërisë politike në rritje, me Shtetet e Bashkuara që së fundi kanë rritur stoqet e tyre, përcjell albinfo.ch.

Sipas Dominique Casaï, themelues i “Uram”, rritja e blerjes së arit në SHBA është e lidhur me fushatën zgjedhore të Donald Trump. “Për të shmangur tarifat e mundshme për importet e arit, tregtarët kanë filluar të grumbullojnë paraprakisht,” shpjegoi ai.

Zvicra, shtëpia e rafinerive më të mëdha të arit në botë, është një përfituese kryesore. Deri në dy të tretat e të gjithë arit të tregtuar globalisht transportohet fizikisht përmes vendit dhe rafineritë zvicerane aktualisht po operojnë me kapacitet të plotë.

Megjithatë, Casaï paralajmëron se beteja e vërtetë ekonomike ka të bëjë me metalet strategjike dhe tokat e rralla – kritike për energjinë dhe teknologjinë.

Teatri i Kosovës po hap një kapitull të veçantë në skenën norvegjeze

Posted on by Drin Reçica

Bëhet e ditur se artistët shqiptarë nga Teatri i Kosovës do të dhurojnë shfaqjen “The Negotiating Peace” në Festivalin Ndërkombëtar të Teatrit në Oslo, përcjell albinfo.ch.

Vlen të theksohet se Teatri i Kosovës në këtë ngjarje madhore nuk prezantohet vetëm përmes kësaj shfaqjeje, por do të organizohet edhe një bisedë mes dramaturgut Jeton Neziraj dhe kritikes së teatrit Natasha Tripney, një lexim skenik i dramës “Citycide” nga antropologia kosovare Eli Krasniqi, i ndjekur nga një diskutim me autoren, si dhe një aktivitet i quajtur “Mbrëmja e Kosovës”.

Ambasada e Kosovës në Londër prezanton ushqimet tradicionale

Posted on by Drin Reçica

Një mbrëmje e këndshme e organizuar nga Ministria e Jashtme e Mbretërisë së Bashkuar dhe Ambasada e Kosovës në Londër prezantoi në mënyrë të veçantë ushqime tradicionale të Kosovës, shkruan albinfo.ch.

Ambasada njofton se ky aktivitet promovoi kulturën dhe traditat tona, duke i dhënë mundësi diplomatëve nga vende të ndryshme të botës të shijojnë shije unike dhe të njihen më shumë me pasurinë e trashëgimisë sonë kulinare.

https://www.facebook.com/share/p/14t834jQQ1/?mibextid=wwXIfr

Eksperti zviceran: Turizmi do rrisë ndjeshëm çmimet në Shqipëri

Posted on by Drin Reçica

Pa dyshim, Shqipëria është një nga vendet që ka njohur një rritje të ndjeshme të numrit të turistëve, përcjell albinfo.ch.

Por një gjë e tillë nuk do të jetë pa kosto, raporton media gjermane Merkur.

Kur mendoni për destinacionet e njohura të udhëtimit, Spanja, Italia dhe Greqia janë ndoshta të parat që ju vijnë në mendje. Kështu nis një shkrim i Merkur.de, i cili i ka kushtuar vëmendje bumit turistik të Shqipërisë, duke theksuar se vendi ka njohur një rritje prej 80% të turistëve brenda pesë viteve të fundit.

Bazuar në këto shifra, Shqipëria renditet në krye të listës së OKB-së për rritjen e turizmit, por ky zhvillim ka edhe anën tjetër të medaljes. Eksperti ballkanik Marco Wipfli, pronar i agjencisë turistike Meersicht, me seli në Zyrih, thotë se arsyeja kryesore e rritjes së madhe të turizmit shqiptar lidhet kryesisht me çmimet e ulëta.

“Shqipëria është një nga destinacionet më të lira të pushimeve në Evropë. Sipas të dhënave nga Enti Federal i Statistikave, qëndrimet në hotele dhe vizitat në restorante në vendin ballkanik kushtojnë më pak se gjysma e çmimit të Gjermanisë. Gjithnjë e më shumë pensionistë italianë po emigrojnë në Shqipëri për shkak të këtyre çmimeve të ulëta”, thuhet në shkrim, ku theksohet se kjo situatë mund të ndryshojë shpejt.

Wipfli parashikon se çmimet në Shqipëri do të rriten masivisht në vitet e ardhshme. “Për një vend ekonomikisht të dobët, bumi i turizmit është një levë e madhe ekonomike”, është shprehur kryeministri i Shqipërisë, Edi Rama.

“Sipas OKB-së, rritja ekonomike prej 5% në vitin 2022 është e lidhur ndjeshëm me të ardhurat fitimprurëse nga turizmi. Por kjo tashmë po ndikon në rritjen e çmimeve. Revista shqiptare e biznesit Monitor raporton se çmimet për shërbimet e ofruara në disa zona janë rritur deri në 90% nga viti 2023 në 2024”, thuhet në analizën e Merkur.de.

“Kjo është vetëvrasje. Rritja e çmimeve do të ketë pasoja në verën e 2025. Dhe është turp që kjo ndodh kur ne kemi hyrë në Champions League të turizmit mesdhetar”, citohet të ketë thënë Rama.

Paralajmërohet dyfishim i rasteve të demencës

Posted on by Alb

Rastet e demencës në Shtetet e Bashkuara pritet të dyfishohen nga tani deri në vitin 2060, përcjell albinfo.ch. Për qytetarët amerikanë mbi 55 vjeç, rreziku arrin në 42%, më shumë se dyfishi i vlerësuar më parë.

Këto janë vlerësimet e fundit të studimit të publikuara në Nature Medicine, që nëse rezultojnë të sakta, do të përktheheshin në rreth gjysmë milioni raste të reja këtë vit, duke u rritur në një milion raste të reja në vit deri në vitin 2060, duke marrë parasysh plakjen progresive të popullsisë.

Analiza e re, e financuar nga Instituti Kombëtar i Shëndetësisë dhe e kryer nga disa institucione amerikane, si Universiteti Johns Hopkins, mori në konsideratë të dhënat e mbledhura nga Studimi Neurokognitiv i Rrezikut të Aterosklerozës në Komunitete (ARIC-NCS), i cili që nga viti 1987 ka monitoruar nga afër shëndetin vaskular dhe njohës të afro 16,000 pjesëmarrësve ndërsa plaken.

Nga viti 1987 deri në vitin 2020, kishte 3,252 pjesëmarrës që zhvilluan demencë. Rreziku për ata mbi 55 vjeç për të përjetuar këtë formë të përkeqësimit kognitiv ishte 42% (një rrezik mesatar midis 35% për burrat dhe 48% për gratë, të cilat janë më të prirura për të zhvilluar demencë për shkak të jetëgjatësisë më të madhe).

Shanset për të pasur demencë janë edhe më të larta për njerëzit afrikano-amerikanë dhe për ata me variantin gjenetik APOE4, i cili shoqërohet me një rrezik më të madh të sëmundjes së Alzheimerit.

Studimet e kaluara kanë nënvlerësuar rrezikun e demencës për shkak të dokumentimit të dobët të sëmundjes në certifikatat shëndetësore dhe mbikëqyrjes së dobët të fazave të hershme të sëmundjes, veçanërisht te pakicat etnike, të cilat janë gjithashtu më të prekshme nga kjo sëmundje për shkak të faktorëve socio-ekonomikë.

Rritja e numrit të rasteve të vlerësuara nga tani deri në vitin 2060 i atribuohet plakjes së popullsisë – 58 milionë amerikanë janë mbi 65 vjeç – por edhe faktorëve gjenetikë, prevalencës së lartë të hipertensionit, diabetit, obezitetit, dietës së pashëndetshme, mungesës së ushtrimeve dhe neglizhimit të shëndetit mendor.

 

Shifra alarmante të obezitetit tek fëmijët, diskutohet përdorimi i Ozempic

Posted on by Alb

Obeziteti në fëmijëri është kthyer në një krizë globale shëndetësore, me shifra alarmante që vazhdojnë të rriten. Parashikimet tregojnë se deri në vitin 2030 rreth 250 milionë fëmijë mund të jenë obezë, duke e bërë këtë një çështje me rëndësi urgjente, përcjell albinfo.ch.

Sipas Organizatës Botërore të Shëndetësisë, normat e obezitetit janë më shumë se trefishuar në mbarë botën që nga viti 1975 dhe janë rritur gati pesë herë te fëmijët dhe adoleshentët.

Një nga zgjidhjet e propozuara është përdorimi i medikamenteve për humbje peshe, siç janë ato të grupit GLP-1. Mbështetësit e kësaj qasjeje argumentojnë se këto ilaçe mund të ndihmojnë në parandalimin e komplikacioneve shëndetësore dhe të përmirësojnë cilësinë e jetës së fëmijëve obezë. Nga ana tjetër, kritikët ngrejnë shqetësime mbi efektet afatgjata dhe mundësinë e varësisë nga këto medikamente, duke sugjeruar se duhet t’i kushtohet më shumë vëmendje trajtimeve të bazuara në ndryshime të stilit të jetesës.

Ky debat ka ndarë komunitetin shkencor, duke ngritur pyetje të rëndësishme mbi shëndetin, etikën dhe përgjegjësinë në trajtimin e obezitetit te fëmijët.

Debati mbi përdorimin e medikamenteve për humbje peshe te fëmijët

Argumentet pro:

  • Shkencëtarët dhe mjekët besojnë se këto medikamente mund ta ndalojnë obezitetin që në fazat e hershme.
  • Shumë adoleshentë mbipeshë përballen me bullizëm dhe izolim. Një studim me gati 7,000 të rinj obezë tregoi se ata që përdornin këtë lloj medikamenti, të njohur si GLP-1, kishin një rrezik më të ulët për të pasur mendime apo tentativa vetëvrasëse.

Argumentet kundër:

  • Ndërsa trajtimi i obezitetit tek të rriturit mund të shihet si korrigjim i gabimeve të së shkuarës, përdorimi i ilaçeve te fëmijët mund t’i bëjë ata të varur prej tyre gjatë gjithë jetës.
  • Studiuesit shqetësohen se nuk dihet ende se si këto medikamente ndikojnë në trupin në zhvillim të fëmijëve dhe cilat mund të jenë efektet afatgjata.
  • Kritikët e krahasojnë përdorimin e tyre me antidepresantët, të cilët shpesh përdoren si një zgjidhje e shpejtë për probleme komplekse të shëndetit mendor, duke shmangur përpjekjet për të adresuar shkaqet e vërteta të problemit.

 

 

BE-ja në alarm: Përgatitje për luftë me Rusinë dhe strategji të rrepta mbrojtjeje

Posted on by Alb

Bashkimi Evropian duhet të përgatitet menjëherë për mundësinë e një konflikti të gjerë me Rusinë, sipas një dokumenti strategjik të publikuar sot nga Komisioni Evropian, përcjell albinfo.ch.

Në këtë dokument, i njohur si Libri i Bardhë, sugjerohet se nëse Rusia arrin qëllimet e saj në Ukrainë, mund të përpiqet të zgjerojë ambiciet e saj territoriale. Viti 2030 është parashikuar si një periudhë potenciale për këtë zhvillim.

“Evropa duhet të jetë e gatshme për luftë nëse dëshiron ta shmangë atë,” thuhet në dokument.

Kjo strategji e re është një përgjigje edhe ndaj deklaratave të presidentit të SHBA-së, Donald Trump, i cili ka lënë të kuptohet se Shtetet e Bashkuara mund të mos jenë më një mbështetje e pakushtëzuar për paqen në Evropë.

“Arkitektura e sigurisë, në të cilën kemi ndërtuar mbështetjen tonë, nuk mund të konsiderohet më e sigurt,” tha Ursula von der Leyen, presidentja e Komisionit Evropian, duke theksuar nevojën për rritjen e investimeve në mbrojtje dhe forcimin e aftësive industriale të Evropës në këtë fushë.

Komisioni ka identifikuar shtatë fusha kyçe ku duhet të mbyllen boshllëqet në aftësitë ushtarake, përfshirë mbrojtjen ajrore dhe atë nga raketat, përdorimin e dronëve dhe luftën elektronike.

Sipas Komisionit, shtetet anëtare të BE-së duhet të bashkëpunojnë më ngushtë për të blerë dhe porositur së bashku të paktën 40% të materialeve ushtarake të nevojshme, për të eliminuar varësitë dhe për të bërë blerje masive të municioneve, raketave dhe dronëve.

Gjithashtu, Komisioni ka njoftuar se do të mobilizohen rreth 800 miliardë euro për projekte të riarmatimit, duke përfshirë një fond të ri prej 150 miliardë eurosh, i cili do të përjashtojë përkohësisht disa investime të mbrojtjes nga kufizimet e borxhit dhe deficitit të BE-së.

Për më tepër, Komisioni planifikon të thjeshtojë rregulloret dhe kërkesat për industrinë e armëve, me qëllim që të sigurojë një mbështetje edhe më të fortë për Ukrainën, e cila aktualisht po përballet me sulmet e Rusisë.

 

 

Kosova dënon kërcënimet e Serbisë, përsërit angazhimin për bashkëpunim me Shqipërinë dhe Kroacinë

Posted on by Alb

Ministria e Punëve të Jashtme dhe Diasporës e Kosovës ka dënuar ashpër deklaratën e fundit të Serbisë lidhur me memorandumin trepalësh të nënshkruar nga Kosova, Kroacia dhe Shqipëria, duke theksuar se Beogradi ka shkelur Marrëveshjen e Brukselit, e cila ndalon pengimin e marrëdhënieve ndërkombëtare të Kosovës, përcjell albinfo.ch.

MPJD thekson se kjo deklaratë është një shkelje e hapur e marrëveshjeve që Serbia ka pretenduar të pranojë dhe tregon mungesën e vullnetit të saj për një dialog të sinqertë. Ajo gjithashtu minon marrëdhëniet e mira fqinjësore dhe mohon njohjen e institucioneve dhe kornizës ligjore të Kosovës si autoritetet e vetme të vlefshme.

“Serbia ka përdorur një retorikë hegjemoniste, duke kërkuar shpjegime nga dy shtete sovrane, Kroacia dhe Shqipëria, që janë anëtare të NATO-s, me Kroacinë gjithashtu anëtare të BE-së. MPJD e cilëson këtë sjellje të papranueshme dhe një tjetër shkelje të Marrëveshjes së Brukselit, e cila parashikon se Serbia nuk do të pengojë marrëdhëniet ndërkombëtare të Kosovës dhe nuk do të flasë në emër të saj”, thuhet mes tjerash në reagim.

MPJD po ashtu thekson se përpjekja e Serbisë për t’u paraqitur si “garantuese e paqes në Ballkan” është absurde, duke marrë parasysh kontributin e saj në destabilizimin e rajonit përmes ndërhyrjeve ushtarake dhe mbështetjes për grupe kriminale në Kosovë.

“Në vend që të bëjë deklarata agresive, Serbia duhet të përmbushë angazhimet që ka pranuar, të heqë dorë nga ambiciet hegjemoniste dhe të njohë pavarësinë e Kosovës. Gjithashtu, Serbia duhet të hapë arkivat e saj të klasifikuara për krimet e luftës në Kosovë dhe të mbajë përgjegjësi për ato krime”, thuhet në reagim.

“Kosova nuk do të frikësohet nga kërcënimet e Serbisë dhe do të vazhdojë të forcojë sigurinë dhe partneritetet ndërkombëtare. Shqipëria, Kroacia dhe Kosova kanë nënshkruar një deklaratë trepalëshe për të forcuar bashkëpunimin dhe avancuar sigurinë rajonale, përmes trajnimeve dhe përpjekjeve të përbashkëta në luftën kundër kërcënimeve hibride dhe për mbështetje të integrimit të Kosovës në nisma rajonale të sigurisë”, theksohet në reagim.

 

 

Zvicra ka një milioner të ri nga lotaria

Posted on by Alb

Një lojtar fitoi 1.1 milionë franga zvicerane në Swiss Lotto të mërkurën, falë gjashtë numrave të saktë të Joker-it 352744, në rendin e duhur, përcjell albinfo.ch.

Megjithatë, çmimi i madh (jackpot) nuk u fitua. Numrat e duhur do të kishin qenë 15, 16, 19, 20, 23 dhe 25; numri me fat ishte 3, dhe numri i riluajtjes ishte 11.

Jackpot-i për shortin e radhës të shtunën është 15.4 milionë franga zvicerane, njoftoi Swisslos.

Cilat janë rregullat në Gjermani për përdorimin e telefonave nga nxënësit në shkolla?

Posted on by Alb

Në Gjermani nuk ka një rregull kombëtar për përdorimin e telefonave në shkolla; çdo land vendos vetë. Në Baden-Württemberg po kërkohen rregulla më të rrepta për të mbrojtur nxënësit nga efektet negative të telefonave, si shpërqendrimi, problemet me të mësuarin dhe ndikimi në shëndetin mendor.

Disa lande, si Bavaria, lejojnë që telefonat të mbahen në çantë, por duhet të jenë të fikur gjatë gjithë ditës. Në të gjitha shkollat është e ndaluar përdorimi i tyre gjatë orëve të mësimit dhe provimeve, përcjell albinfo.ch.

Mësuesit mund t’i konfiskojnë telefonat kur nxënësit thyejnë rregullat, por nuk kanë të drejtë të kontrollojnë përmbajtjen e tyre. Nxënësit nuk lejohen të bëjnë foto apo video pa leje, pasi kjo mund të çojë në masa disiplinore apo edhe ndjekje ligjore.

 

Pagesa minimale që paguan secili për shërbime mjekësore në Zvicër do të rritet

Posted on by Alb

Qeveria zvicerane është duke përgatitur një ndryshim që do të bëjë që pagesa minimale, të cilën të gjithë të rriturit duhet ta paguajnë vetë për vizitat mjekësore (para se të mbulohet nga sigurimi), të rritet gradualisht. Ky ndryshim nuk do të vlejë për fëmijët.

Ky propozim ishte bërë që në vitin 2019, por atëherë u kundërshtua dhe u hoq. Sot, disa parti politike besojnë se rritja është e nevojshme dhe duhet të zbatohet me kujdes, në mënyrë që të sigurohet një sistem i qëndrueshëm për disa vite, përcjell albinfo.ch.

Pse duan ta rrisin këtë pagesë?

Aktualisht, kjo pagesë minimale është 300 franga në vit dhe nuk është ndryshuar që nga viti 2004, ndërkohë që shpenzimet për kujdesin shëndetësor janë rritur ndjeshëm.

Mbështetësit e ndryshimit argumentojnë se kjo do t’i inkurajojë njerëzit të mendojnë më shumë para se të shkojnë te mjeku për çështje të vogla, veçanërisht nëse kanë zgjedhur një tarifë të ulët vetëpërgjegjësie.

Gjithashtu, ata theksojnë se ndryshimi nuk do të ndikojë ata që marrin ndihmë sociale apo ndihmë shtesë, pasi ata do të vazhdojnë të kenë mundësinë të kërkojnë rimbursim për shpenzimet e tyre mjekësore.

Kush është kundër?

Disa parti politike kundërshtojnë ndryshimin, duke argumentuar se ai do të rëndojë më shumë mbi ata që detyrohen të zgjedhin pagesën minimale për shkak të problemeve shëndetësore dhe vështirësive ekonomike, si të moshuarit dhe ata që vuajnë nga sëmundje kronike.

Ata theksojnë se, gjatë 20 viteve të fundit, çmimet e sigurimeve shëndetësore janë rritur ndjeshëm dhe kanë krijuar një barrë të madhe për familjet.

Ministrja e Shëndetësisë mbështet këtë ndryshim, por ka theksuar se ai duhet të zbatohet me kujdes dhe gradualisht, për të shmangur vështirësitë financiare për qytetarët. Ajo gjithashtu ka pranuar se shumë persona tashmë e shmangin vizitën te mjeku për shkak të kostove të larta, dhe ky faktor duhet të merret në konsideratë.

Tani i takon qeverisë të vendosë saktësisht se si do të zbatohet kjo rritje.

Finlanda ngre alarmin ndaj rrezikut të TikTok-ut, raste vetëvrasjesh mes adoleshentëve 

Posted on by Alb

Si pasojë direkte e ndjekjes së videove udhëzuese, të publikuara në TikTok, në Finlandë gjatë dy viteve të fundit mes adoleshentëve të moshave nga 13-18 vjeç, të cilët janë vetëvrarë, mbi 30 për qind ishin djem dhe 50 për qind ishin vajza.

“Tiktok i rekomandoi përmbajtje rreth vetëvrasjes një djali 11-vjeçar finlandez me pasoja të rënda. Ndërkohë, një studim vë në pikëpyetje pretendimet e Tiktok për mbrojtjen e të rinjve”, sipas areena.yle.fi.

Në TikTok ka video të shumta propaganduese mbi pabarazinë e gjinive, “ku djemtë burrërohen vetëm nëpërmjet vrazhdësisë dhe brutalitetit ndaj vajzave”, ndërsa “vajzat duhet të jenë vetëm kokulura dhe shtëpiake të bindura, të afta të lindin dhe të vlefshme vetëm për të plotësuar kënaqësitë e burrave”, përcjell albinfo.ch.

Pavarësisht kërkesave të shumta të mediave shtetërore dhe organizatave të ndryshme shoqërore të disa shteteve evropiane, TikTok ka hequr nga qarkullimi vetëm dy ose tre video të dhunshme, duke deklaruar se të tjerat janë “të moralshme”

Policia dhe qytetarët shënjestrojnë pedofilët në Zvicër

Posted on by Alb

Pedofilët që kontaktojnë fëmijë në internet janë në shënjestër të policisë, por edhe qytetarë të thjeshtë në mbarë botën përpiqen të kapin autorët. Kjo mbetet një çështje e diskutueshme.

Në Zyrih, policia e qytetit po kryen një operacion të fshehtë. Objektivi: një i dyshuar për pedofili. Hetuesi Michael Schuchter po paraqitet në internet si një 14-vjeçar. “Seks oral, seks anal — ai përshkroi saktësisht çfarë donte të bënte,” i tha Schuchter gazetës Rundschau. Policia është duke u përgatitur për arrestimin.

Kriminelët kërkojnë foto dhe takime

Kriminelët kontaktojnë fëmijë në internet dhe planifikojnë sulme seksuale. Kjo quhet cybergrooming. Ata shpesh paraqiten si fëmijë të së njëjtës moshë.

Sipas të dhënave nga studimi James i realizuar nga ZHAW, një në dy adoleshentë në Zvicër, të moshës 12 deri në 19 vjeç, është kontaktuar në internet me qëllime seksuale të padëshiruara, përcjell albinfo.ch.

Aileen i zbulon kriminelët online

Nuk është vetëm policia që përpiqet të ndalojë pedofilët; edhe individë privatë marrin pjesë në këtë luftë. Ata quhen “gjuetarë pedofilësh”. Ata bisedojnë në internet duke përdorur profile false dhe përballen me të dyshuarit.

Aileen, një punonjëse zyre nga Zvicra frankofone, mbledh të dhëna për të dyshuarit për pedofili. Në kohën e lirë, ajo bisedon online duke u shtirur si një vajzë 13-vjeçare. Përmbajtja e mesazheve është tronditëse: “Si janë gjinjtë e tu? Do të doja shumë të të lëpija.” — kjo është një prej mesazheve që mund të marrë një fëmijë 13-vjeçar, tregon Aileen.

Ajo beson se policia duhet të bëjë më shumë për të luftuar pedofilinë dhe dëshiron t’i ndihmojë me punën e saj. Aileen është pjesë e të ashtuquajturit “Team Moore”, një grup francez që i zbulon publikisht këta kriminelë dhe i raporton tek autoritetet.

“Kemi kapësit, që luajnë rolin e fëmijëve virtualë. Pastaj janë hetuesit, që përpiqen të zbulojnë identitetin e personit,” shpjegon Aileen.

“Team Moore” është themeluar para gjashtë vitesh në Francë dhe deri më tani ka dorëzuar mbi 500 dosje në polici në 13 vende.

Në Zvicër, “Team Moore” ka raportuar tre raste deri tani. Në një rast në kantonin e Vaudit janë hapur procedura penale. Ende nuk dihet nëse provat do të çojnë në një dënim. I dyshuari kishte propozuar disa herë një takim me “vajzën”.

“Pa ndërhyrjen tonë, këta individë do të mbeteshin plotësisht jashtë radarit të drejtësisë,” thotë Aileen.

Policia është skeptike

Policia e shikon me shqetësim këtë ndërhyrje të qytetarëve privatë. Beat Rhyner, shefi i hetimeve të specializuara në Policinë e Qytetit të Zyrihut, thotë: “Shpesh nuk është e qartë nëse provat që na dorëzojnë individët privatë mund të përdoren në gjykatë.”

Dhe shton: “Duam të përqendrojmë burimet tona të kufizuara në rastet ku njerëzit përpiqen të vendosin kontakt fizik me fëmijët dhe kanë qëllime abuzimi.”

Policia e qytetit të Zyrihut është një nga të paktat forca policore në Zvicër që kryen operacione të tilla të fshehta. Ata kryejnë nga 15 deri në 20 arrestime në vit për raste të dyshuara pedofilie.

Oficeri Schuchter mund të shpenzojë vetëm rreth 20 për qind të kohës së tij për këtë punë.

Pse nuk zhvillon policia më shumë hetime të fshehta online?
“Nëse duam ta rrisim këtë, duhet të rrisim edhe burimet,” thotë shefi i hetimeve Rhyner. “Kjo është një çështje politike.”

 

 

Ngritet aktakuzë ndaj 5 personave mes hetimeve në Parlamentin Evropian për ryshfet

Posted on by Alb

5 personave iu është ngritur aktakuzë nga Prokuroria belge në lidhje me një hetim në vazhdim për korrupsionin e dyshuar brenda Parlamentit Evropian.

Katër nga të dyshuarit, sipas prokurorisë, përballen me akuza, përfshirë korrupsionin aktiv, ndërsa personi i pestë akuzohet për pastrim parash.

“Pas arrestimit, katër të dyshuarit kryesorë janë lënë në paraburgim. I dyshuari i pestë është liruar me kusht”, thanë prokurorët.

Hetimet janë të lidhura me pretendimet se gjiganti kinez i teknologjisë, Huawei, u përpoq të ndikonte në mënyrë të padrejtë në vendimmarrjen brenda BE-së, përcjell albinfo.ch.

Përdorimi i teknologjisë kineze në komunikimet celulare perëndimore ka qenë një temë e nxehtë debati prej vitesh.

Kritikët e Huawei kanë frikë se Kina mund të fitojë akses në rrjetet celulare përmes kompanisë.

Të hënën, autoritetet belge kryen kontrolle të mëtejshme në zyrat e Parlamentit Evropian në Bruksel, disa prej të cilave ishin vulosur më parë.

Javën e kaluar u zbulua se rreth 100 oficerë policie kryen 21 kontrolle shtëpish në Belgjikë dhe Portugali, si pjesë e hetimeve për ryshfet dhe falsifikim të dyshuar.

Gjatë këtyre kontrolleve u arrestuan përkohësisht disa persona.

Gjiganti farmaceutik Roche heq dorë nga disa programe për shkak të Trump

Posted on by Alb

Kompania farmaceutike me bazë në Bazel, Roche, ka vendosur të pezullojë programet e saj për diversitetin për shkak të një dekreti të presidentit amerikan, Donald Trump. Ky dekret ndalon projektet që promovojnë mundësi të barabarta në vendin e punës, përcjell albinfo.ch.

Punonjësit e Roche në Bazel kanë marrë një letër zyrtare, ku njoftohen se zyrat e diversitetit në SHBA dhe në Bazel do të riemërohen dhe riorganizohen. Me këtë ndryshim, kompania po shpërbën departamentin e saj për diversitetin dhe nuk do të ketë më për objektiv një kuotë për gratë në pozicione drejtuese. Objektivi i mëparshëm ishte që 38% e pozicioneve drejtuese të mbuloheshin nga gra, ndërsa hiqet edhe synimi për përfaqësimin e pakicave etnike në masën 19% të punonjësve.

Në vend të “diversitetit”, Roche do të fokusohet tani në konceptin e “përfshirjes dhe përkatësisë”. Se çfarë do të thotë konkretisht kjo riorganizim për barazinë brenda kompanisë, ende nuk është e qartë. Roche nuk ka dhënë informacione të mëtejshme për SRF, përveçse ka deklaruar se objektivat dhe programet janë duke u rishikuar dhe përshtatur për të qenë në përputhje me kërkesat ligjore të SHBA-së.

Në deklaratën e saj, zyra e shtypit e kompanisë shkruan: “Në dritën e urdhëresave të reja ekzekutive në SHBA për ‘Diversitetin, Barazinë dhe Përfshirjen’, kemi rishikuar dhe përshtatur objektivat dhe programet tona si në nivel global ashtu edhe në atë amerikan, për të qenë në përputhje me kërkesat ligjore.”

“Diversitet, Barazi dhe Përfshirje” (DEI) është një koncept që nënkupton krijimin e një mjedisi pune më gjithëpërfshirës dhe të drejtë për të gjithë punonjësit, pavarësisht nga gjinia, raca, orientimi seksual, aftësia fizike apo statusi social. Këto politika synojnë të rrisin përfaqësimin e grupeve të ndryshme në pozicione drejtuese dhe të sigurojnë mundësi të barabarta për të gjithë punonjësit.

Në vitin 2024, Roche realizoi rreth gjysmën e shitjeve të saj në SHBA dhe ka atje një të katërtën e fuqisë punëtore — 26,000 punonjës — më shumë se në çdo vend tjetër. Për shkak të rëndësisë së tregut amerikan për kompaninë, këto rregulla të reja nuk do të zbatohen vetëm në SHBA, por në të gjithë botën, sqaron Roche, përcjell albinfo.ch.

Roche nuk është kompania e vetme që po heq dorë nga objektivat për diversitetin. Edhe banka UBS po i braktis këto objektiva. Në raportin vjetor të vitit 2023, termat “diversitet, përfshirje dhe barazi” përmendeshin 21 herë. Këtë vit, këta terma janë zhdukur plotësisht. UBS gjithashtu po heq dorë nga qëllimi i saj për të pasur 30 për qind gra në ekipin drejtues deri në fund të vitit, raportoi ndër të tjera gazeta NZZ.

Edhe Novartis po i nënshtrohet rregullave të reja të vendosura nga administrata e Donald Trump. Kompania i shkroi SRF se “për shkak të ndryshimeve në peizazhin ligjor dhe politik në SHBA, janë të nevojshme disa përshtatje”. Për shembull, Novartis do të “ndalojë përdorimin e listave të kandidatëve të larmishëm dhe të paneleve të përzgjedhjes me diversitet në procesin e rekrutimit për të gjitha pozicionet në SHBA.”

Shkencëtarja flet për vetëcensurë

Profesorja Nathalie Amstutz e konsideron këtë zhvillim “shumë problematik.” Ajo kryen kërkime mbi barazinë gjinore dhe të drejtat e barabarta në kompani në Universitetin e Shkencave të Aplikuara në Zvicrën Veriperëndimore.

Në vitet e fundit, Roche dhe Novartis janë përmendur shpesh si modele për t’u ndjekur. Fakti që këto kompani tani po heqin dorë nga objektivat e tyre “ka një element të vetëcensurës,” thotë Amstutz.

 

40 emigrantē të zhdukur pas fundosjes së gomones në Itali

Posted on by Alb

40 persona raportohen të zhdukur pas mbytjes së një gomoneje në Ngushticën e Sicilisë. Pasditen e djeshme, rojat bregdetare dhe anijet patrulluese të “Guardia di Finanza” zbarkuan 10 të mbijetuar dhe gjashtë trupa të pajetë në brigjet e ishullit Lampione në Lampedusa, përcjell albinfo.ch.

Sipas dëshmive të të mbijetuarve, ata u nisën të dielën nga Sfax, Tunizi, në një gomone me 56 persona. Më pak se 24 orë më vonë, në ujërat ndërkombëtare, shumë emigrantë ranë në det, ndoshta për shkak të dallgëve të fuqishme. Varka, tashmë gjysmë e fundosur, u lokalizua në afërsi të ishullit Lampione.

Gjashtë burra dhe katër gra të mbijetuar do të merren në pyetje nga policia për të rindërtuar më saktë ngjarjen dhe për të kuptuar rrethanat e tragjedisë. Operacionet e shpëtimit u kryen nga varkat patrulluese CP324 të Rojes Bregdetare dhe V1302 të “Guardia di Finanza”.

Ndërkohë, dje në Lampedusa janë regjistruar pesë zbarkime të tjera me 213 emigrantë, duke reflektuar krizën e vazhdueshme të emigracionit në Mesdhe.

Trump deklasifikon dokumentet rreth vrasjes së ish-presidentit Kennedy

Posted on by albinfo.ch

Administrata e Donald Trump ka publikuar mijëra dokumente të klasifikuara më parë në lidhje me vrasjen e ish-presidentit amerikan John F. Kennedy. Ky publikim është rezultat i një urdhri ekzekutiv të firmosur nga Trump pas marrjes së detyrës, me qëllim rritjen e transparencës mbi një nga ngjarjet më të diskutueshme historike, përcjell albinfo.ch.

Më shumë se 1,100 skedarë, me një përmbajtje që arrin mbi 31,000 faqe, janë bërë publike nga Arkivi Kombëtar. Trump ka njoftuar gjithashtu se në të ardhmen pritet të publikohen mbi 80,000 faqe të tjera që lidhen me këtë çështje.

Vrasja e Kennedy-t në Dallas, Teksas, në vitin 1963 vazhdon të jetë subjekt i teorive të shumta konspirative, pavarësisht se autoritetet ia kanë atribuuar atë Lee Harvey Oswald-it. Ekspertët thonë se do të duhet kohë për të analizuar dokumentet e reja dhe për të kuptuar nëse ato hedhin dritë mbi ndonjë detaj të panjohur më parë./DW

Kosova synon fitore në ndeshjen kundër Islandës

Posted on by albinfo.ch

Kombëtarja e Kosovës po vazhdon përgatitjet për ndeshjen e parë të “play-off”-it të Ligës së Kombeve kundër Islandës, e cila do të zhvillohet të enjten në stadiumin “Fadil Vokrri” në Prishtinë, përcjell albinfo.ch.

Përzgjedhësi Franco Foda ka theksuar se ekipi synon fitoren dhe kalimin në Ligën B. “Ne i kemi dy ndeshje për t’i fituar dhe të dyja janë vendimtare për të parë nëse do të vazhdojmë në Ligën B. Ne e dimë se Islanda ka ekip të mirë. Në ndeshjet e kaluara kemi treguar lojëra dhe kualitete të mira, mentalitet të fortë. Duhet të tregojmë në fushë që kemi edhe shpirt luftarak. Tani e kemi një mundësi të mirë që të ngrihemi në Ligën B dhe do të bëjmë gjithçka për të fituar këto ndeshje. Sigurisht që është shumë e rëndësishme për Kosovën që të jetë një nivel më lartë”, ka deklaruar Foda.

Kapiteni Amir Rrahmani vazhdon përgatitjet individuale për shkak të një lëndimi të pësuar të dielën me skuadrën e Napolit. Ai ka marrë pjesë në një pjesë të stërvitjes me grupin, por më pas ka vazhduar me një program të diferencuar. Edhe mesfushori Valon Berisha ka ndier një shqetësim të vogël dhe është stërvitur i diferencuar.

Mesfushori Donat Rrudhani ka folur pas stërvitjes për përgatitjet dhe rëndësinë e kësaj ndeshjeje. “Stërvitja ishte mjaft e mirë, punuam në aspektin taktik. E kemi analizuar Islandën dhe dimë pikët e tyre të forta dhe të dobëta. Shpresojmë t’i shfrytëzojmë maksimalisht. Synimi ynë është të fitojmë dhe të kalojmë në Ligën B. Besoj se çdo lojtar do ta japë maksimumin dhe se do të arrijmë objektivin tonë. Paraqitja në Prishtinë është një motiv shtesë për ne. Është ndjenjë e veçantë të luajmë para tifozëve tanë, ndërsa mbështetja e ‘Dardanëve’ është gjithmonë një avantazh i madh për ne”, ka theksuar Rrudhani.

Ndeshja mes Kosovës dhe Islandës zhvillohet të enjten nga ora 20:45 në stadiumin “Fadil Vokrri”. Takimi kthyese do të luhet më 23 mars në Murcia të Spanjës.

 

Kurti për varrezën masive në Bishtazhin: Janë identifikuar 11 të zhdukur

Posted on by albinfo.ch

Kryeministri i Kosovës, Albin Kurti, ka bërë të ditur se Komisioni Qeveritar për Personat e Zhdukur ka arritur të identifikojë 11 mbetje mortore nga varreza masive në Bishtazhin, përcjell albinfo.ch.

“Pas 26 pranverash në pritje e ankth të familjeve, 11 të zhdukur gjatë luftës janë gjetur dhe identifikuar në varrezën masive në Bishtazhin. Pas masakrës në Kralan, forcat shtetërore të Serbisë, i kishin rrëmbyer dhe groposur në varreza masive, në përpjekje që t’i zhduknin bashkë me dëshmitë e krimeve. Më 2 prill 1999, ata, bashkë me qindra burra dhe djem shqiptarë, u grumbulluan me dhunë nga forcat ushtarake dhe policore të Serbisë, në një fushë në Kralan, rrethuar me tanke. Aty u mbajtën nën tortura të vazhdueshme, pa ujë dhe ushqim për dy ditë.

Më 4 prill, nga ta u ndaluan 86 burra dhe djem, ndër të cilët 11 ishin të mitur. Që nga ajo ditë, askush nga ta më nuk është parë i gjallë. Disa prej tyre ishin gjetur në afërsi të liqenit Peruqac në Bajina Bashta të Serbisë. Pas zhvarrosjes nga Bishtazhini, Serbia i rrëmbeu kufomat”, ka shkruar Kurti.

Ky zbulim është një hap i rëndësishëm në përpjekjet për zbardhjen e fatit të personave të zhdukur, ndërsa institucionet e Kosovës dhe familjarët vazhdojnë të kërkojnë drejtësi dhe transparencë për të gjithë të zhdukurit gjatë luftës.

Pas 26 viteve, në varrezën masive në Bishtazhin, janë gjetur dhe identifikuar:

Adem Gashi

Sahit Gashi

Bekim Hasani

Sheremet Ismajli

Mentor Myrtaj

Osman Fejza

Shkelzen Hajdaraj

Bekim Gashi

Sabedin Kryeziu

Mentor Kryeziu

Vehbi Halilaj

Kryeministri i Kosovës ka thënë se “plagët e hapura të zhdukjeve me dhunë janë e vërteta e krimeve çnjerëzore dhe gjenocidit të kryer nga Serbia gjatë luftës në Kosovë”.

Këtë të mërkurë, Komisioni Qëveritar për të Zhdukurit ka njoftuar se ka arritur të identifikojë edhe mbetje të tjera mortore. Pas 26 vitesh në listën e personave të zhdukur, janë identifikuar mbetjet mortore të Elhami (Qamil) Tahiragës nga Rahoveci.

Trump thotë se biseda me Zelenskyn ishte shumë e mirë

Posted on by albinfo.ch

Presidenti i Shteteve të Bashkuara të Amerikës, Donald Trump, ka zhvilluar një bisedë telefonike me presidentin e Ukrainës, Volodymyr Zelensky, përcjell albinfo.ch.

Trump, në një postim në llogarinë e tij në Truth Social, e cilësoi thirrjen si “shumë të mirë” dhe konfirmoi se biseda zgjati rreth një orë.

“Pjesa më e madhe e diskutimit u bazua në thirrjen e bërë dje me Presidentin Putin, në mënyrë që të rreshtohen si Rusia ashtu edhe Ukraina për sa i përket kërkesave dhe nevojave të tyre,” shkroi ai.

“Ne jemi shumë në rrugën e duhur”, shtoi Trump.

Ai tha se ka kërkuar që Sekretari i Shtetit, Marco Rubio, dhe Këshilltari i Sigurisë Kombëtare, Mike Waltz, “të japin një përshkrim të saktë të pikave të diskutuara” gjatë bisedës.

Austria po kërkon në Indi punëtore të kualifikuar

Posted on by albinfo.ch

Universitetet dhe kompanitë austriake po kërkojnë gjithnjë e më shumë talente nga India për të mbushur boshllëkun e punëtorëve të kualifikuar, pasi Austria po përballet me një krizë demografike dhe mungesë të theksuar të të diplomuarve teknikë, përcjell albinfo.ch. Sipas Kronen Zeitung, Austria ka një mungesë prej rreth 40,000 të diplomuarish teknikë të aftë.

Me një popullsi të re dhe të edukuar, India ofron një burim të pasur për profesionistë të rinj që dëshirojnë të studiojnë dhe punojnë jashtë vendit. Susanne Feiel, përgjegjëse për ndërkombëtarizimin në Montanuniversität Leoben, theksoi se është koha për të adresuar “mungesat e mëdha të punëtorëve kryesorë” në Austri.

Universiteti ka nisur iniciativën “Focus India”, për të ndërtuar lidhje akademike dhe kulturore me universitetet indiane si IIT Bombay dhe Manipal Academy, dhe tashmë ka filluar të pranojë studentë indianë.

Për bizneset austriake, kërkesa për punëtorë të kualifikuar, sidomos në IT, është e madhe. Megjithatë, pengesa kryesore mbetet gjuha gjermane, për të cilën po ofrohen kurse të posaçme. Programi “Focus India” synon gjithashtu shkëmbimin e mundësive për studentët austriakë në Indi, duke krijuar një bashkëpunim të dyanshëm mes dy vendeve.

Wolfram Rossegger nga KS Engineers, një kompani automobilistike me bazë në Styria, konfirmoi kërkesën për Kronen Zeitung, duke theksuar: “Ne kemi nevojë për staf të IT-së në Austri. Ekipi ynë në Indi po rritet vazhdimisht, por shumica e kërkimeve tona ende kryhen në Austri. Dhe kemi vërejtur se shumë indianë janë të hapur për të fituar përvojë jashtë vendit.”

Universitetet duan ta trajtojnë këtë çështje duke ofruar kurse specifike gjermane për studentët ndërkombëtarë. Aftësitë në gjuhën gjermane, së bashku me diplomimin në Austri (duke anashkaluar procesin e gjatë të nostrifikimit), do ta bënin shumë më të lehtë punësimin e këtyre punëtorëve të kualifikuar për bizneset austriake.

Universiteti thekson se programi nuk ka të bëjë vetëm me sjelljen e studentëve dhe profesionistëve indianë në Austri, por gjithashtu synon të krijojë një shkëmbim të vërtetë të dyanshëm. “Focus India” synon jo vetëm të ftojë studentë dhe studiues nga India në Austri, por edhe të ofrojë mundësi për studentët austriakë të fitojnë përvoja të vlefshme në Indi.

Programi ka mbështetje të nivelit të lartë, duke përfshirë angazhimet diplomatike si takimet mes rektorit të Montanuniversität, Peter Moser, dhe kryeministrit indian Narendra Modi, siç thuhet në faqen “Focus India”, përcjell albinfo.ch.

Ngritet aktakuzë ndaj një shqiptari nën dyshimet se me policinë serbe kreu krime lufte

Posted on by albinfo.ch

Prokuroria Speciale e Republikës së Kosovës ka ngritur aktakuzë ndaj të pandehurit M.I., i nacionalitetit shqiptar, nën dyshimet për kryerjen e veprës penale “Krim i luftës kundër popullsisë civile”, përcjell albinfo.ch.

Sipas hetimeve, i pandehuri dyshohet se gjatë periudhës 1998-1999, në fshatin Osek Hylë të Komunës së Gjakovës, ka vepruar në bashkëkryerje me pjesëtarë të forcave policore serbe, duke kryer vrasje, dhunime, arrestime dhe keqtrajtime ndaj popullsisë civile shqiptare që nuk ishin të përfshirë në luftë.

Prokuroria ka propozuar mbajtjen e gjykimit në mungesë, konform dispozitave të Kodit të Procedurës Penale të Kosovës (KPPK), pasi i pandehuri ndodhet në arrati.