Archives

Tirana me tetë ndërtesat e saj më të pazakonta

Posted on by Drin Reçica

Çdo ditë e më shumë Tirana po konsiderohet si një nga qytetet më të bukura, mirëpo kurioziteti i ndërtesave po bëhet sa tërheqëse aq edhe interesante me studio të njohura ndërkombëtare si MVRDV, Stefano Boeri dhe OODA, të cilat po projektojnë ndërtesa të mëdha.

Albinfo.ch ju sjell tetë prej projekteve më interesante, të cilat pritet të shtojnë bukurinë këtij qyteti.

Puzzle Tirana nga NOA dhe Atelier4 e cila pokonsiderohet si një fasadë e inspiruar ngashtëpitë tradicionale

Kjo do të jetë një ndërtesë 71 metra e lartë, me një fasadë qëngjan me shtëpitë tradicionale shqiptare me çati të pjerrëta. Ndërtesa do të përmbajë hapësira komerciale, apartamente dhenjë hotel. “Koncepti i projektit vjen nga kombinimi i dy botëve: urbane dhe rurale, në një ndërhyrje të vetme arkitekturore,” – shprehet Lukas Rungger, themelues i NOA.

Downtown One Tirana nga MVRDV – Harta e Shqipërisë në fasadë


Do të jetë ndërtesa më e lartë në vend kur të përfundojë këtë vit. Me 150 metra lartësi, kjo kullë do të jetë pranë Piramidës sëTiranës dhe do të ketë një fasadë të dizajnuar për të përfaqësuarnjë hartë të Shqipërisë. “Shqipëria ka bërë një rrugë të gjatë. Para 10 vitesh ishte vendi më i varfër në Europë, ndërsa sot poecën drejt zhvillimit të madh ekonomik,” – thekson Winy Maas.

Skenderbeu Building nga MVRDV – Një fasadëme formë fytyre

Është në fazën përfundimtare të ndërtimit pranë sheshit kryesortë qytetit, Skanderbeg Building është konceptuar si një“skulpturë figurative” e Gjergj Kastriotit – heroit kombëtar. Studioja holandeze MVRDV, e cila ka realizuar edhe renovimine Piramidës së Tiranës, e ka projektuar këtë ndërtesë 85 metra tëlartë për t’u bërë një pikë referimi unike për qytetin. “Qytetet nëmbarë botën po bëhen gjithnjë e më të ngjashme me njëra-tjetrën. Unë gjithmonë i inkurajoj ato që të ruajnë karakterin e tyre të veçantë,” – shprehet Winy Maas, bashkëthemelues iMVRDV.

Rruga Adem Jashari nga Valerio Olgiati – Tre kulla ‘totemike’

Ky projekt i arkitektit zviceran Valerio Olgiati do të përfshijë trekulla të mëdha, të cilat do të kenë një lartësi nga 150 deri në 266 metra. Kullat janë projektuar për t’u dukur si figura totemike, duke krijuar një identitet të veçantë për këtë pjesë të qytetit. Ndërtesat do të përmbajnë dhoma hoteli dhe apartamenteluksoze.

Hora Vertikale nga OODA – Një kompleks indërtuar me kube

Hora Vertikale është një ndërtesë rezidenciale e përbërë nga 13 kubë të shkallëzuar. Çdo kub do të ketë 22.5 metra në secilënanë dhe do të përmbajë shtatë kate apartamente, ndërsa e gjithëstruktura do të arrijë një lartësi prej 140 metrash. “Çdo kubmishëron një koncept unik të lidhur me artin dhe ështëfrymëzuar nga arkitektura tradicionale shqiptare,” – thonëarkitektët e OODA.

Bond Tower nga OODA – Eleganca e njëbalerine

Do të jetë një kompleks me dy kulla të lidhura mes tyre qëndodhet në Bulevardin Dritan Hoxha. Kullat kanë një formë tëlakuar, e cila është frymëzuar nga këmbët e një balerine nëpozicionin plié. “Ndërtesa krijon një siluetë elegante dheikonike, duke shmangur masivitetin urban dhe duke sjellë njëndjesi harmonie në peizazhin e qytetit,” – shprehet OODA. Kompleksi do të përfshijë hapësira rezidenciale, komerciale, zyra dhe një hotel.

Tirana Vertical Forest nga Stefano Boeri – Njëkopsht vertikal në qendër të qytetit

 

Projekti më i fundit i Stefano Boeri, Tirana Vertical Forest, pomerr formë pranë Arena Kombëtare në qendër të qytetit. Kjokullë 21-katëshe do të përfshijë 105 apartamente dhe do tëmbulohet me 3,200 shkurre dhe 145 pemë, duke krijuar njëmini-ekosistem të gjelbër në mes të qytetit.

New Boulevard nga Chybik + Kristof – Njëkullë me beton të kuq

Kjo ndërtes do të ngrihet në Bulevardin e Ri të Tiranës dhe do tëketë një lartësi prej 83 metrash. Ndërtesa do të ketë një formëkaskadë, duke u ngushtuar gradualisht teksa ngrihet lart. Struktura është pjesë e një distrikti të ri kulturor që do tëndërtohet në veri të qytetit.

Avdijaj me performancë të shkëlqyer në Austri

Posted on by Drin Reçica

Donis Avdijaj shkëlqeu me lojën e tij, duke kontribuar me një gol dhe një asistim në fitoren e Hartbergut ndaj Grazerit, 3:0, në kuadër të xhiros së 27-të të Bundesligës austriake, përcjell albinfo.at.

Avdijaj fillimisht asistoi në golin e parë, të shënuar nga kroati Patrik Mijiq në minutën e 59-të, ndërsa shënoi vetë për 2:0 në minutën e 70-të. Ai u zëvendësua në minutën e 84-t.

Sulmuesi 28-vjeçar ka shënuar katër gola dhe ka dhënë gjashtë asistime deri tash në Bundesliga. Për Kupën e Austrisë ka arritur shtatë gola e gjashtë asistime. Hartbergu luan finalen e Kupës më 1 maj kundër Wolfsbergerit.

Hartbergu po lufton gjithashtu për një vend në garat evropiane.

Dollari prek pikën më të ulët në tri vitet e fundit

Posted on by Drin Reçica

Mësohet se dollari amerikan ka prekur pikën më të ulët në tre vitet e fundit, pas tronditjeve që tregjet pësuan si pasojë e tarifave të vendosura nga administrata e Donald Trumpit dhe sulmeve të tij ndaj udhëheqësit të Rezervës Federale, Jerome Powell, përcjell albinfo.ch.

Trumpi hodhi akuza e fyerje ndaj Powellit, pasi ky i fundit nuk iu përgjigj thirrjeve për ulje të normës së interesit në SHBA.

Kjo ka bërë që dollari të bjerë në raport me valutën tjetër, duke arritur nivelin më të ulët që nga marsi 2022.

Në momentin e publikimit, një dollar këmbehet me 0,87 euro.

Konsumi global i verës arrin nivelin më të ulët historik

Posted on by Alb

Konsumi global i verës ka pësuar një rënie të ndjeshme, duke arritur nivelin më të ulët që nga viti 1961, sipas raportit të fundit të Organizatës Ndërkombëtare të Hardhisë dhe Verës (OIV). Në vitin 2024, konsumi i verës ra në 214.2 milionë hektolitra, një rënie prej 3.3 % krahasuar me vitin 2023.

Rënia e konsumit është pjesë e një tendence afatgjatë që ka filluar që nga viti 2019 dhe vijon të thellohet për shkak të faktorëve të ndryshëm, përfshirë shqetësimet shëndetësore, inflacionin dhe ndryshimet në sjelljen e konsumatorëve. Sipas ekspertëve të OIV-së, tarifat e mundshme të verës që mund të vendosen nga Shtetet e Bashkuara, së bashku me pasojat e pandemisë dhe paqëndrueshmërinë gjeopolitike, po përkeqësojnë situatën, përcjell albinfo.ch.

Një nga tregjet më të prekura është ai amerikan, ku konsumi ra me 5.8 % krahasuar me vitin e kaluar. Edhe në Kinë, një treg kyç për industrinë, shitjet e verës ende nuk janë rikuperuar plotësisht pas krizës së COVID-19.

OIV e sheh këtë rënie si një paralajmërim për industrinë e verës, e cila po përballet me një “stuhi të përsosur”, siç e quajti Giorgio Delgrosso, drejtori i sektorit të statistikave në OIV.

Në Evropë—ku konsumatorët përbëjnë pothuajse gjysmën e tregut global—është regjistruar një rënie prej 2.8 %. Sipas kompanive të industrisë, si zinxhiri francez Nicolas, po ndodh një “ndryshim brezash” që tregon një tendencë të re në zakonet e konsumatorëve ndaj alkoolit.

E ardhmja e industrisë së verës mbetet e pasigurt, ndërsa ekspertët nuk janë të bindur nëse konsumi do të rikthehet në nivelet e mëparshme në vitet e ardhshme.

OKB sinjalizon alarm për industrinë e mashtrimeve online

Posted on by Alb

Rrjetet kriminale aziatike që veprojnë në hije të internetit po transformohen në një industri të globalizuar mashtrimesh digjitale, me përmasa që i kalojnë miliardat e dollarëve. Kombet e Bashkuara kanë ngritur një alarm serioz: ky nuk është më një fenomen rajonal, por një kërcënim ndërkombëtar me rrënjë të thella dhe pasoja të mëdha.

Në raportin e fundit të Zyrës së OKB-së për Drogën dhe Krimin (UNODC) theksohet se bandat — kryesisht nga Kina dhe Azia Juglindore — po përdorin taktika të sofistikuara për të joshur viktima nga e gjithë bota. Nga skema investimesh dhe mashtrime me kriptomonedha, deri te “romancat digjitale” që shndërrohen në kurthe ekonomike, këto grupe përfitojnë nga boshllëqet ligjore dhe mungesa e bashkëpunimit ndërkombëtar, përcjell albinfo.ch.

Përfaqësuesi rajonal i UNODC-së për Azinë Juglindore dhe Paqësorin, Benedikt Hofmann, paralajmëron se “ky lloj krimi po përhapet si kancer”. Ai thekson se përpjekjet për t’i ndalur këto grupe në një shtet shpesh çojnë vetëm në zhvendosjen e operacioneve në një rajon tjetër.

Bandat kanë ngritur struktura të organizuara, me qindra konvikte ku mbahen punëtorë — shpesh të trafikuar — të cilët detyrohen të ekzekutojnë mashtrime digjitale përmes telefonit dhe internetit. Me përhapje tashmë në Amerikën Latine, Afrikë, Lindjen e Mesme dhe Evropë, krimi digjital nuk njeh kufij.

Raporti kërkon veprime urgjente dhe bashkëpunim ndërkombëtar të vërtetë për të frenuar një fenomen që ka filluar të gërryejë vetë themelet e besimit online.

Rënia e shitjeve të makinave në Evropë, tregu në krizë për vitin 2025

Posted on by Alb

Numri i makinave të regjistruara në Evropë ka pësuar një rënie të konsiderueshme gjatë dy muajve të parë të vitit 2025, me ulje prej 3 % krahasuar me të njëjtën periudhë të vitit të kaluar. Tregjet kryesore—Gjermania, Italia dhe Franca—kanë regjistruar rënie të shitjeve, ndërsa Spanja ka përjetuar rritje prej 8 %.

Sipas raportit të Shoqatës Europiane të Prodhuesve të Automjeteve, gjatë muajve janar–shkurt u regjistruan 1.68 milion makina private, krahasuar me 1.74 milion të regjistruara në 2024. Ky trend rënës është reflektuar edhe në fabrikat e prodhimit, ku grupet e mëdha si Volkswagen, Stellantis, Mercedes-Benz, Toyota dhe Tesla kanë prodhuar më pak njësi se vitin e kaluar.

Ndikimi i konkurrencës dhe kalimi drejt makinave elektrike kanë ndikuar ndjeshëm në linjat e prodhimit, teksa automjetet me naftë dhe benzinë zënë gjithnjë e më pak hapësirë në rrugët e Evropës.

Në Shqipëri ende nuk ka të dhëna zyrtare nga Drejtoria e Transporteve për importin e mjeteve në vitin 2025, por, bazuar në ecurinë e vitit të kaluar, pritet që të regjistrohen rreth 8 000 makina çdo muaj, me dominim të automjeteve me lëndë djegëse.

14 të arrestuar si të dyshuar për terrorizëm në Holandë

Posted on by Alb

Policia holandeze ka arrestuar 14 persona me akuza për terrorizëm, deklaron Zyra e Prokurorit.

Të dyshuarit dyshohet të kenë përdorur platforma të mediave sociale, si TikTok, për të nxitur akte terrorizmi.

Sipas njoftimit, të arrestuarit janë ndërmjet 14 e 30 vjeç.

Në një operacion mbarëkombëtar, hetuesit arrestuan të dyshuarit në Hagë, Amsterdam dhe Roterdam.

Për shkak se disa nga të arrestuarit janë të mitur, Prokuroria nuk do të japë detaje të tjera në këtë fazë.

 

 

Bashkimi i Helvetia dhe Baloise: Çfarë duhet të presin punonjësit dhe klientët tani?

Posted on by Alb

Një marrëveshje e madhe është në horizont në qendrën financiare të Zvicrës: Kompanitë e sigurimeve Helvetia dhe Baloise planifikojnë të b

Një marrëveshje e madhe është në horizont në qendrën financiare të Zvicrës: kompanitë e sigurimeve Helvetia dhe Baloise planifikojnë të bashkohen. Çfarë do të thotë kjo për punonjësit, rrjetin e degëve dhe klientët? Blick përgjigjet pyetjeve më të rëndësishme.

Helvetia dhe Baloise, grupi i dytë i sigurimeve
Helvetia dhe Baloise planifikojnë të bashkohen, për të formuar grupin e dytë më të madh të sigurimeve në Zvicër. Bashkimi, me emrin “Helvetia Baloise”, pritet të përfundojë deri në fund të vitit. Përpara kësaj, aksionarët e të dyja kompanive dhe Komisioni i Konkurrencës duhet t’i japin dritën e gjelbër. Grupi i ri do të ketë rreth 20% të tregut zviceran të sigurimeve.

Pse duan të bashkohen?
Sipas Jeffrey Hochegger, strategut të investimeve në Raiffeisen Switzerland, “në segmentet kryesore – sigurimet jo-jetësore, jetësore dhe ato kundër aksidenteve – Baloise dhe Helvetia, si kompani individuale, janë mjaft pas konkurrentëve të tyre”. Në sigurimet jo-jetësore, Helvetia ka 10% të tregut dhe Baloise 7%, ndërsa konkurrentë si Axa (16%) dhe Mobiliar (18%) dominojnë më shumë. Konkurrenca është veçanërisht e fortë te sigurimet për pensionet.

Çfarë ndryshon për klientët?
Sipas Thomas Schmuckli, kryetarit të bordit të Helvetia, asgjë menjëherë. Kontratat e klientëve të Baloise do t’i kalojnë automatikisht Helvetia Baloise, pa ndryshime afatshkurtra. “Kontratat mbeten të vlefshme deri në skadim, në përputhje me kushtet e dakorduara,” thotë Helvetia. Klientët nuk kanë të drejtën për ndërprerje të jashtëzakonshme të kontratës vetëm për shkak të bashkimit.

A do të rishikohen kontratat?
Në periudhën afatmesme pritet standardizimi i ofertave ku të dyja kompanitë operojnë së bashku (p.sh. sigurimi i pasurisë, i automjeteve). Oferta më konkurruese do të mbetet në fuqi.

Do të bjerë stoku i stafit?
Bashkimi synon sinergji prej 350 milionë CHF në vit, përpara taksave. Me mbi 22 000 punonjës aktualë, shumë pozicione përmbivendosen në Zvicër. “Në zonat me mbivendosje, uljet e stafit do të menaxhohen kryesisht përmes fluktuacioneve natyrore dhe pensioneve të parakohshme, dhe duhet të përfundojnë deri në 2029,” paralajmërojnë kompanitë. Largime më të mëdha priten te sigurimet e pasurisë dhe shërbimet administrative.

Çfarë ndodh me kontratat e punës?
Ndryshimet e kontratave (p.sh. bashkimi i planeve të pensioneve) mund të vijnë, por jo për të përkeqësuar kushtet e punës në mënyrë të padrejtë.

Ç’do të ndodhë me rrjetet e degëve?
Helvetia ka mbi 100 degë dhe 120 agjenci të përgjithshme; Baloise, 97 lokacione. Bashkimi do të krijojë mbivendosje të degëve në shumë komunitete, prandaj pritet konsolidim, siç ndodhi me UBS pas integrimit të Credit Suisse.

Berisha me thirrje për diasporën: Mos fotografo votën

Posted on by Alb

Kryetari i Partisë Demokratike në Shqipëri, Sali Berisha, u bëri thirrje shqiptarëve në diasporë të mos fotografojnë votën gjatë procesit zgjedhor. Ai theksoi rëndësinë e ruajtjes së lirisë dhe dinjitetit gjatë votimit, duke apeluar:

  • Mos fotografoni fletën e votimit

  • Qëndroni qytetarë të lirë, kudo që jeni

  • Votoni për ndryshimin dhe shpëtimin e Shqipërisë

“Ju bëj thirrje të mos fotografoni votën tuaj. Qëndroni qytetarë të lirë, votoni për ndryshimin dhe shpëtimin e Shqipërisë,” tha Berisha, duke nënvizuar të drejtën e diasporës për të kontribuar pa frikë nga presionet.

Sa kompani gjermane planifikojnë të largojnë punonjës në vitin 2025?

Posted on by Alb

Përgjatë vitit 2025, shumë kompani gjermane kanë paralajmëruar largime nga puna. Por, a është kjo një shenjë e mirë për mundësitë e punës dhe të ardhmen e ekonomisë gjermane?

Një vit i vështirë për Gjermaninë

Viti 2024 ka qenë një vit i vështirë për Gjermaninë, pasi ekonomia e vendit ka shënuar një tkurrje prej 0.2%, duke shënuar vitin e dytë të recesionit për ekonominë më të madhe të Europës. Këtë vit, pasiguria në tregjet financiare dhe tarifat e ndëshkimit nga SHBA kanë minuar shpresat për rikuperim të shpejtë.

Përveç lajmeve të këqija ekonomike, shumë kompani të mëdha gjermane kanë shpallur planet e tyre për largime nga puna. Këtu përfshihen markat e njohura si Volkswagen, Audi, Bosch, Siemens, dhe Thyssenkrupp, si dhe Deutsche Post dhe Deutsche Bahn, transmeton albinfo.ch.

Shpresa për një rikuperim ekonomik

Megjithatë, ka ende shpresa që ndryshimi i qeverisë në Gjermani mund të sjellë një rikuperim. Kancelari i ardhshëm Friedrich Merz (CDU) ka shpallur një fond investimesh prej 500 miliardë eurosh për përmirësimin e infrastrukturës dhe mbështetje të mëtejshme për shpenzimet ushtarake, që pritet të ndikojnë pozitivisht në ekonominë e vendit.

Sa kompani planifikojnë të largojnë punonjës?

Sipas Institutit Gjerman të Ekonomisë (IW), më shumë se një e treta e kompanive në Gjermani planifikojnë të bëjnë largime nga puna në vitin 2025. Në një anketë të fundit të punëdhënësve, 35% e kompanive po shqyrtojnë shkurtimin e stafit, ndërsa vetëm 24% po planifikojnë të punësojnë më shumë.

Për të gjithë ata që preken nga largimet nga puna dhe ata që mbeten në punë, ka ende shpresa se ndryshimet politike do të përmirësojnë situatën.

Pse sektori industrial është më i godituri?

Nga sektorët e ndryshëm të ekonomisë, industria ka treguar shenja më të dukshme të goditjeve të mundshme nga largimet nga puna. Kjo përfshin sektorë si aerospace, makineri, industria automobilistike, kimikate dhe elektronikë – disa nga sektorët më të fortë të Gjermanisë.

Cilat janë dallimet rajonale?

Përveç të dhënave të përgjithshme, IW thekson se ka disa dallime rajonale në situatën e punësimit në Gjermani. P.sh., në veri të Gjermanisë, 31% e kompanive presin rritje të prodhimit, ndërsa në jug, në Baden-Württemberg, vetëm 19% besojnë se do të ketë rritje të prodhimit, ndërsa 39% presin tkurrje.

Pse po mbetet kaq pesimiste situata?

Përfundimisht, siç e shpjegon IW, ekonomia gjermane po përballet me shumë sfida të jashtme, siç janë ngjarjet gjeopolitike dhe pasiguria që vijnë nga administrata e re amerikane. Shkurtimet e mundshme të tarifave dhe tensionet ndërkombëtare vazhdojnë të godasin sektorët kryesorë të eksportit gjerman.

 

Vera e vonesave: Më pak trena, më shumë rrugë dhe dyfish kohë për të arritur në Milano

Posted on by Alb

Udhëtimi drejt Milanos përmes linjës hekurudhore të Simplon-it do të zgjasë më shumë këtë verë.

Udhëtarët që planifikojnë të udhëtojnë drejt Milanos këtë verë përmes tunelit të Simplon-it do të duhet të kenë durim. Kohëzgjatja e udhëtimeve do të rritet me të paktën një orë për shkak të punimeve në rrugë, ndërsa do të ketë edhe më pak trena në qarkullim, njoftoi të martën Hekurudha Federale Zvicerane (SBB), transmeton albinfo.ch.

Kompania italiane Trenitalia do të zgjerojë korridorin ndërmjet Domodossola dhe Milanos me katër metra. Kjo ndërhyrje do të sjellë mbylljen e plotë të këtij seksioni hekurudhor. Trenet EuroCity (EC) nuk do të qarkullojnë ndërmjet dy qyteteve nga 8 qershori deri më 27 korrik dhe nga 30 gushti deri më 13 shtator. Trenitalia do të ofrojë autobusa zëvendësues, të cilët do të zgjasin kohëzgjatjen e udhëtimit dhe do të reduktojnë numrin e vendeve në dispozicion.

Punime janë planifikuar gjithashtu edhe në linjën Gjenevë–Brig (VS) për të njëjtën periudhë. Shumica e trenave EC nga Gjeneva në Brig e më tej në Milano do të anulohen, edhe brenda Zvicrës, sipas një komunikate nga SBB.

Më pak trena EuroCity

Gjithashtu, numri i trenave EuroCity do të reduktohet. Si vitin e kaluar, vetëm tre trena EC (në vend të katër) do të qarkullojnë në ditët e javës në secilën drejtim në linjat Bazel–Bern–Milano dhe Gjenevë–Brig–Milano, për shkak të punimeve ndërmjet Domodossola dhe Milanos.

Një tren EC nga/drejt Bazelit dhe një tjetër nga/drejt Gjenevës do të shërbejnë vetëm deri në Domodossola. Shërbimi mbetet i pandryshuar gjatë fundjavave, me katër trena EuroCity që operojnë në këto dy linja.

Autobusa zëvendësues

SBB dhe Trenitalia do të ofrojnë gjithashtu autobusa zëvendësues ndërmjet Gjenevës dhe Milanos, me ndalesë të ndërmjetme në Martigny (VS). Janë planifikuar dy linja ditore në qershor dhe shtator dhe tre në muajin korrik.

Sipas SBB-së, shërbimet në linjën Simplon do të reduktohen për “disa vite, të paktën deri në verën e vitit 2027.” Si kujtesë, punime janë duke u zhvilluar në tunelin e Simplon-it dhe po ndikojnë në oraret e trenave të transportit të automjeteve ndërmjet Brig dhe Iselle (I). Gjatë këtyre punimeve, trenat për automjete të BLS do të qarkullojnë çdo dy orë në vend të çdo 90 minutash.

 

Ka shpërthyer bankomatin: 66 muaj burg dhe dëbim nga Zvicra për kosovarin

Posted on by albinfo.ch

Krimi ka ndodhur natën e 31 gushtit 2021, në zonën industriale të Dietlikonit, Kantoni i Cyrihut: Dy hajdutë vodhën fillimisht një aparat saldimi nga një servis makinash. Ata i tërhoqën me një karrocë me dy skuter elektrikë në një bankomat disa qindra metra larg.

Atje ata futën një përzierje oksigjen-acetileni në pajisje, e ndezën atë dhe hodhën në erë bankomatin në orën 3 të mëngjesit, transmeton albinfo.ch. Sipas aktakuzës, “topi i zjarrit” (shpërthimi) kishte një diametër prej dhjetë metrash. Dëmi material ishte 69.000 franga. Megjithatë, arkat e parave në bankomat i rezistuan shpërthimit. Ndaj autorët janë larguar pa asnjë plaçkë.

Njëri nga dy personat u arrit të identifikohet: ADN-ja e një babai kosovar 48-vjeçar u gjet në kapakun e sistemit të saldimit. Ai tani po përballet me akuza para Gjykatës së Lartë Kantonale të Cyrihut, shkruan nzz.ch. Në qershor 2023, Gjykata e Qarkut në Bülach e kishte dënuar atë me 64 muaj burgim dhe 14 vjet dëbim nga vendi për shkaktimin e një shpërthimi dhe shumë vepra të tjera.

“Thjesht nuk na duhen shpërthyesit e  bankomatëve në Zvicër”, deklaroi kryetari i trupit gjykues në shpalljen e vendimit.

Para Gjykatës së Lartë i akuzuari kërkon lirimin e plotë dhe dëmshpërblimin për dënimin e mbajtur me burg. Ai është i pafajshëm. “Akuzat nuk janë të vërteta,” thotë ai. Ai supozon se ADN-ja e gjetur në makinën e saldimit nuk është ADN-ja e tij dhe ai “nuk e ka idenë” se si ADN-ja arriti atje.

I akuzuari ka lindur në Kosovë dhe ka ardhur në Zvicër në vitin 1989 në moshën 13 vjeçare. Ai ka kryer një kualifikim, nuk është bërë kurrë shtetas i natyralizuar, ka qenë i papunë që nga viti 2005 dhe ka kryer vazhdimisht delikte. Në vitin 2011 ai u deportua, edhe pse ka familje dhe fëmijë në Zvicër, dhe iu ndalua hyrja në vend për pesë vjet, përcjell albinfo.ch. Deri atëherë, ai kishte akumuluar dënime me burg në total prej 40 muajsh për dënime të ndryshme.

Në vitin 2016, gruaja e tij, e cila kishte mbetur në Zvicër, ka aplikuar për bashkim familjar dhe atij i është dhënë sërish leje qëndrimi. Megjithatë, ai kishte fshehur nga autoritetet se ishte dënuar me 7 vjet e 8 muaj burg në Shqipëri në vitin 2012 për kontrabandë të 110 kilogramëve hashash.

Kështu ai tani akuzohet për “mashtrim të autoriteteve”. Për shkak të një gabimi të Zyrës së Migracionit, atij i qe lejuar sërish hyrja në Zvicër në vitin 2016 si pjesë e procesit të bashkimit familjar, gjë që nuk do të kishte ndodhur nëse ai do të kishte dijeni për dënimin në Shqipëri. Nga tetori 2016 ai zyrtarisht jetoi sërish në Cyrih.

Para Gjykatës së Lartë, i akuzuari deklaroi se nuk e dinte që duhej të tregonte këtë dënim të mëparshëm në kërkesën e tij pe¨r ardhje në Zvicër. Ai kishte supozuar se autoritetet zvicerane e dinin se ai ishte burgosur në Shqipëri, përcjell albinfo.ch. Ai nuk është dënuar asnjëherë në Kosovë. Ai thotë se ka menduar se duhej të plotësonte vetëm katrorin për të treguar nëse ishte dënuar në Kosovë ose jo.

Prokurori publik, i cili e kishte cilësuar të akuzuarin në gjykatën më të ulët si “kriminel profesionist që i ka parë të gjitha”, në akuzën e tij ka kërkuar që dënimi me burg të rritet në 73 muaj. Dëbimi duhet të konfirmohet. I akuzuari ka humbur përfundimisht të drejtën e qëndrimit në Zvicër. Ai gjithashtu zotëron një shtëpi madhështore me 12 dhoma në Kosovë. “Faleminderit, mjafton, ai duhet të shkojë tani!” deklaron prokurori.

Avokati mbrojtës ndër të tjera vë në dyshim vlerësimin e analizës së gjurmëve të ADN-së dhe kërkon lirimin e plotë dhe heqjen dorë nga dëbimi nga vendi edhe në rast dënimi. Është një “rast vështirësie”. Kujdesi shëndetësor i të akuzuarit, i cili vuan nga disa sëmundje kronike, në Kosovë nuk është i garantuar, sipas tij.

Në fund: 48-vjeçari kosovar është shpallur sërish fajtor për shkak të shpërthimit, mashtrimit të autoriteteve dhe shumë vepra të tjera, me gjithsej dhjetë akuza. Dënimi me burg është rritur nga 64 muaj në 66 muaj. Prej tyre 1138 ditë kanë kaluar në paraburgim. Kohëzgjatja e dëbimit zvogëlohet nga 14 vjet në 10 vjet.

Aktgjykimi SB240114 i datës 14 shkurt 2025, ende jo përfundimtar.

Posta zvicerane shkruan histori: Letra e sigurt elektronike po vjen për të gjithë

Posted on by Alb

Nga viti i ardhshëm, Posta zvicerane do të ofrojë një shërbim të ri: letra elektronike e sigurt, e cila funksionon si letër e rekomanduar, por përmes email-it. Këshilli Federal ka hapur tashmë një konsultim publik mbi këtë temë.

Aktualisht, për të komunikuar me një institucion publik apo administratë, dërgojmë letra të zakonshme ose të regjistruara. Në të ardhmen, do të kemi mundësi të përdorim edhe email-in e sigurt. Ky shërbim, që deri tani ishte i disponueshëm vetëm për kompani të mëdha, do të zgjerohet së shpejti edhe për individët, transmeton albinfo.ch.

“Sigurisht, është shumë më i sigurt se një email i thjeshtë, sepse letra mban një vulë të rregulluar që garanton se nuk është ndryshuar. Për shembull, ka një pullë dixhitale që tregon kohën e dërgimit. Gjithashtu, adresat e dërguesit dhe marrësit verifikohen,” shpjegon zëdhënësi i La Poste, Stefan Dauner, në RTS.

Midis traditës dhe modernitetit

Në praktikë, mjafton të regjistrohesh në faqen zyrtare të Postës Zvicerane, të shkruash letrën dhe ta ruash si PDF. Më pas mund të dërgohet përmes email-it të sigurt ose si letër fizike. La Poste kujdeset për printimin dhe dërgimin me postë, me çmim nga rreth 0.40 CHF deri në 1.00 CHF.

Posta siguron se do të vazhdojë të jetë e mundur dërgimi i letrave me zarfe dhe pulla tradicionale. Megjithatë, ky shërbim i ri pasqyron një prirje në rritje: komunikimi me letra në letër po bie ndjeshëm. Ajo që La Poste e quan “letra hibride” pritet të jetë në dispozicion nga janari i vitit 2026.

Donald Trump ushtron presion mbi universitetet zvicerane

Posted on by Alb

Rreth dhjetë universitete dhe institute kërkimore në Zvicër – përfshirë EPFL, ETH Zürich, Universitetin e Bernës dhe atë të Gjenevës – përfitojnë çdo vit dhjetëra miliona dollarë në formë grantesh nga qeveria e Shteteve të Bashkuara. Këto fonde, kryesisht nga Departamenti Amerikan i Mbrojtjes dhe Instituti Kombëtar i Shëndetësisë (NIH), përdoren për të mbështetur projekte kërkimore në fusha si bioteknologjia, medicina, teknologjitë hapësinore dhe inteligjenca artificiale.

Sipas të dhënave zyrtare të publikuara nga qeveria amerikane, aktualisht ekzistojnë mbi 56.4 milionë dollarë që përfundojnë në institucionet arsimore dhe kërkimore zvicerane. Gjatë dekadës së fundit, kjo shifër ka arritur vlerën e 136.7 milionë dollarëve.

Megjithatë, politika e re e presidentit Donald Trump mund të ndryshojë rrënjësisht këtë dinamikë, transmeton albinfo.ch.

Një mbështetje jetike, por e brishtë
Megjithëse kjo ndihmë përbën vetëm një pjesë të vogël të financimeve – Fondacioni Kombëtar Zviceran për Shkencë ka shpërndarë mbi 9 miliardë franga në dhjetë vjetët e fundit – për shumë projekte, kontributi amerikan mbetet i domosdoshëm.

Universiteti i Bernës është përfituesi më i madh i këtyre fondeve: me 15 projekte aktive dhe një total prej 16.3 milionë dollarësh, kjo qendër kërkimore tregon ndikimin konkret të bashkëpunimit transatlantik. Sidoqoftë, sipas përfaqësueses së institucionit, Brigit Bucher, kjo mbështetje përbën më pak se 1 % të buxhetit të përgjithshëm të universitetit. Çdo ndryshim në politikat e financimit nga SHBA mund të sjellë pasoja për projektet aktuale dhe ato të planifikuara.

Alarm edhe në EPFL, ETH Zürich dhe Universitetin e Gjenevës
Në EPFL, ekzistojnë rreth 30 projekte aktive të lidhura me fonde amerikane, me një vlerë totale prej afro 15 milionë dollarësh. ETH Zürich ka në zhvillim rreth 15 projekte të ngjashme, ndërsa Universiteti i Gjenevës ka marrë rreth 7.4 milionë dollarë gjatë dekadës së fundit.

Rektorja e Universitetit të Gjenevës, Audrey Leuba, paralajmëron se ndërprerja e këtyre granteve do të rrezikonte mbështetjen për studentët në nivel master dhe doktorature. Ajo thekson se tashmë janë ndjerë pengesa konkrete, si kufizime në qasjen në burime shkencore dhe nevoja për t’u organizuar përmes kanaleve private.

Universitetet amerikane ngrihen në protestë
Në SHBA, situata është po ashtu e tensionuar. Rreth 100 drejtues universitetesh prestigjioze – përfshirë Yale, Princeton dhe Harvard – kanë denoncuar publikisht ndërhyrjet e administratës Trump në autonominë universitare dhe lirinë akademike.

Në një deklaratë të përbashkët, ata paralajmërojnë se “ndërhyrja e pajustifikuar qeveritare” rrezikon të dëmtojë seriozisht kërkimin shkencor dhe bashkëpunimet ndërkombëtare. Mes shqetësimeve janë akuzat për antisemitizëm në kampuset që kanë protestuar kundër luftës në Gaza, të cilat institucionet i mohojnë.

Rrezik për të ardhmen e bashkëpunimit shkencor ndërkombëtar
Nga Zvicra, institucione të ndryshme po rishikojnë strategjitë e bashkëpunimit ndërkombëtar. Universiteti i Cyrihut ka bërë thirrje për një angazhim të fortë dhe të qëndrueshëm nga Konfederata, për të kompensuar çdo boshllëk që do të linte tërheqja e fondeve amerikane.

Aeroporti i Tiranës me rritjen më të shpejtë në Evropë

Posted on by BR

Aeroporti i Tiranës renditet si aeroporti me rritjen më të shpejtë në Evropë që nga pandemia, me një shtesë prej 3,2 milionë udhëtarësh në vitin 2024 në krahasim me vitin 2023.

Kjo arritje pasqyron përpjekjet e vazhdueshme për përmirësimin e infrastrukturës dhe shërbimeve, si dhe rritjen e numrit të destinacioneve të ofruara nga aeroporti.

Statistikat e publikuara nga Tirana Airport Partners (TIA) tregojnë se në muajin mars të këtij viti, Aeroporti Ndërkombëtar i Tiranës (Rinas) arriti një rekord historik me 751 235 pasagjerë, duke shënuar rritje krahasuar me të njëjtin muaj të vitit 2024.

Përmes Rinasit janë kryer gjithsej 4684 fluturime, nga 18 linja ajrore drejt 69 destinacioneve në 20 vende, shkruajnë mediat shqiptare, përcjell albinfo.ch.

Për vitin 2025, autoritetet kanë vendosur një objektiv ambicioz prej 12 milionë pasagjerësh, duke synuar një rritje të mëtejshme të fluksit të udhëtarëve dhe forcimin e pozicionit të aeroportit si një portë kryesore për Shqipërinë.

Zvicra vendos sanksione ndaj tetë mediave ruse

Posted on by Alb

Zvicra ka vendosur të zgjerojë listën e saj të sanksioneve, duke përfshirë tetë media ruse, sipas një njoftimi zyrtar nga Sekretariati i Shtetit për Çështjet Ekonomike (SECO).

Në listën e re përfshihen:

  • portali i lajmeve Lenta.ru

  • televizioni Zvezda

  • gazeta Krasnaya Zvezda

  • agjencitë News Front, SouthFront, RuBaltic.ru

  • Fondacioni Strategic Culture

Masat kufizuese do të hyjnë në fuqi më 23 prill, përcjell albinfo.ch.

Ky vendim vjen në vijim të sanksioneve të Bashkimit Evropian, i cili më 24 shkurt prezantoi paketën e 16-të të masave ndëshkuese kundër Rusisë. Në kuadër të saj, BE-ja ndaloi transmetimin e disa mediave të ngjashme, përfshirë ato që tashmë janë në listën e sanksioneve të Zvicrës.

Qëllimi i kësaj lëvizjeje është frenimi i përhapjes së dezinformimit dhe propagandës nga mediat që akuzohen për afilacione të ngushta me Kremlinin.

Italia 5 ditë zie për vdekjen e Papa Françeskut

Posted on by BR

Qeveria e Italisë ka shpallur pesë ditë zie kombëtare pas vdekjes së Papa Françeskut.

Zia do të zgjasë deri të shtunën, kur varrimi i papës së ndjerë do të bëhet jashtë Bazilikës së Shën Pjetrit.

Për këtë arsye janë shtyrë të gjitha aktivitetet sportive, të parapara për ditën e shtunë, transmeton albinfo.ch.

Imazhet e Papës në një arkivol të hapur janë publikuar nga Vatikani, ndërsa trupi i tij do të zhvendoset në Bazilikën e Shën Pjetrit për zi publike të mërkurën.

Katolikët në mbarë botën vazhdojnë të mbajnë zi për vdekjen e papës.

Në Vatikan, ka një fluks të vazhdueshëm njerëzish që vizitojnë kishën ku pritet të prehet Papa.

Vdekja e Papa Françeskut shtyn ndeshjet e Serisë A në Itali

Posted on by albinfo.ch

Vdekja e Papa Françeskut ka sjellë një ndikim të madh edhe në arenën sportive italiane, duke bërë që të gjitha ndeshjet e planifikuara për të shtunën në Serinë A të shtyhen. Ceremonia madhështore e varrimit për kreun e ndjerë të Kishës Katolike Romake, e cila do të mbahet të shtunën në Vatikan, është arsyeja kryesore e këtij vendimi, shkruan 20minuten, transmeton albinfo.ch.

Sipas mediave italiane, funeralit të Papës pritet t’i bashkohen figura të shumta nga mbarë bota, çka ka detyruar autoritetet sportive të rishikojnë axhendën e ndeshjeve për të shmangur përplasjet logjistike dhe për të respektuar dhimbjen kombëtare.

Një nga përballjet më të rëndësishme që preket nga ky vendim është ajo mes Inter Milanit dhe AS Romës, një ndeshje kyçe në luftën për titullin kampion. Kjo nuk është hera e parë që Seria A ndryshon orarin për shkak të zisë kombëtare – katër ndeshje të planifikuara për të hënën e Pashkëve tashmë ishin shtyrë dhe janë ricaktuar për këtë të mërkurë.

Vdekja e Papa Françeskut është konfirmuar nga Vatikani të hënën e Pashkëve. Ai ndërroi jetë në moshën 88-vjeçare, pas një sëmundjeje të gjatë. Papa me origjinë argjentinase, i njohur për përulësinë dhe lidhjen me njerëzit e zakonshëm, kishte edhe një pasion të madh për futbollin dhe ishte një mbështetës i klubit argjentinas San Lorenzo, transmeton albinfo.ch.

Federata Italiane e Futbollit (FIGC) ka shprehur ngushëllimet e saj dhe ka theksuar se futbolli në Itali ndan dhimbjen me miliona njerëz në mbarë botën. Presidenti i FIGC, Gabriele Gravina, u shpreh: “Futbolli italian ndan pikëllimin e qindra miliona njerëzve për vdekjen e dhimbshme të Papa Françeskut.”

Nuk është përcaktuar ende se kur do të zhvillohen ndeshjet e së shtunës, ndërsa Federata pritet të japë më shumë detaje në ditët në vijim. Ndërkohë, vëmendja mbetet e përqendruar në ceremoninë lamtumirëse të Papës Françesku, transmeton albinfo.ch.

Kriza e strehimit për punonjësit edhe në Graubünden

Posted on by albinfo.ch

Në resortet e pushimeve, ku dikur ishte e vështirë të gjeje vend për turistët, sot është edhe më e vështirë të gjesh strehim për ata që punojnë për ta. Në një klimë ku mungesa e fuqisë punëtore në sektorin e hotelerisë është tashmë një sfidë e njohur, problemet janë shtuar më tej: punonjësit e turizmit po përballen me pamundësinë për të gjetur një vend ku të jetojnë, shkruan SRF, transmeton albinfo.ch.

“Presioni është i dyfishtë”, thotë Christoph Schlatter, drejtor i Hotel Laudinella në St. Moritz. “Nga njëra anë mungojnë apartamentet, nga ana tjetër çmimet janë rritur ndjeshëm. Po bëhet gjithnjë e më e vështirë që punonjësit të gjejnë strehim vetë.” Sipas tij, ndërtimi i rezidencave parësore është ndër zgjidhjet e vetme të qëndrueshme.

Presidenti i Hotelleriesuisse Graubünden, Ernst Wyrsch, pranon se vetë industria e hotelerisë mban një pjesë të përgjegjësisë për situatën. “Për arsye biznesi, shumë hotele shitën banesat e personelit dhe i kthyen ato në apartamente për turistë. Sot, ato banesa na mungojnë.”

Për më tepër, kërkesat e punonjësve kanë ndryshuar. Tani kërkohet strehim më cilësor, dhe destinacionet më të mëdha po e ndiejnë më thellë krizën për shkak të çmimeve të larta të qirasë dhe konkurrencës së ashpër për hapësirë.

Në përpjekje për të ofruar zgjidhje, Hotelleriesuisse dhe Shoqata Zvicerane për Rajonet Malore (SAB) bashkëpunuan në prill me Kantonin e Graubünden dhe qeverinë federale për të zhvilluar një udhëzues që përfshin shembuj të praktikave të mira. Një rast i suksesshëm është ai i Scuol, ku një hotel bleu një ndërtesë për të strehuar punonjësit. Ose rasti i Sumvitg, ku bashkia përfshiu strehimin e stafit në planet e saj urbanistike, transmeton albinfo.ch.

Megjithatë, sfidat mbeten. Hotelet janë të interesuara për hapësira të vogla, funksionale dhe të përballueshme, ndërsa komunat shpesh synojnë zhvillimin e apartamenteve më të mëdha për familjet. Për këtë, Schlatter thekson nevojën për një dialog të hapur: “Është thelbësore të krijojmë një konsensus. Duhet të bëjmë të dukshëm presionin nën të cilin ndodhemi.”

Aktualisht, hoteli i tij po jep me qira 26 dhoma për punonjësit – dhoma që ndryshe do të shfrytëzoheshin për mysafirët. Ai sheh potencial edhe në rregullimin e tregut të Airbnb: “Mbase ekziston mundësia për të rikthyer në treg më shumë apartamente për qëllime pune. Na duhen apartamente të thjeshta, të vogla dhe të përballueshme.”

Ndërkohë, pavarësisht përpjekjeve dhe shembujve pozitivë, një zgjidhje e shpejtë nuk duket në horizont. Me sezonin turistik që afrohet, mungesa e strehimit për punonjësit pritet të bëhet edhe më akute – duke rrezikuar funksionimin e vetë industrisë që e mban në këmbë ekonominë e rajoneve turistike, transmeton albinfo.ch.

 

FMN: Tarifat e Trump dhe masat hakmarrëse po frenojnë ndjeshëm ekonominë globale

Posted on by albinfo.ch

Fondi Monetar Ndërkombëtar (FMN) ka paralajmëruar se tarifat e vendosura nga presidenti amerikan Donald Trump, të shoqëruara me masat hakmarrëse nga vendet e tjera, pritet të godasin rëndë aktivitetin ekonomik global gjatë këtij viti. Institucioni ndërkombëtar ka bërë një rishikim në ulje të parashikimeve të tij, duke nënvizuar pasiguritë në rritje dhe ndikimin e thellë të tensioneve tregtare ndërkombëtare, shkruan RTS, transmeton albinfo.ch.

Në raportin e fundit, të cilin FMN e përshkruan si një “parashikim referimi” për shkak të “kompleksitetit dhe rrjedhshmërisë së momentit aktual”, thuhet se rritja globale për vitin 2025 pritet të arrijë vetëm në 2.8%. Kjo shifër përfaqëson një rënie prej 0.5 pikë përqindjeje krahasuar me vlerësimin e mëparshëm të janarit.

Kryeekonomisti i FMN-së, Pierre-Olivier Gourinchas, gjatë një konference për shtyp theksoi se “sistemi ekonomik global që kemi njohur për tetë dekada është në prag të një rivendosjeje”. Ai paralajmëroi se përveç rritjes së ndjeshme të tarifave, pasiguria e përgjithshme po ndikon rëndë mbi ekonominë botërore dhe nëse ajo vazhdon, do të ngadalësojë më tej ritmet e rritjes.

Si një tregues i goditjes që ka marrë tregtia globale, FMN tani parashikon një rritje prej vetëm 1.7% për tregtinë e mallrave dhe shërbimeve këtë vit — pothuajse përgjysmë krahasuar me pritshmëritë e mëparshme prej 3.2%, transmeton albinfo.ch.

Megjithëse parashikohet që ekonomia globale të shmangë recesionin në të ardhmen e afërt, ndikimet negative të tarifave do të ndihen në të gjitha rajonet si këtë vit ashtu edhe në vitin e ardhshëm. Rreziku për një recesion global, sipas FMN-së, është rritur ndjeshëm, veçanërisht për Shtetet e Bashkuara.

Sidoqoftë, Gourinchas theksoi se ekonomia amerikane, për momentin, mbetet e fortë: “Ekonomia vazhdon të rritet, tregu i punës është i qëndrueshëm. Megjithatë, tarifat përfaqësojnë një kosto prej 0.4 pikë përqindjeje për rritjen,” sqaroi ai.

Për Amerikën e Veriut, FMN ka rishikuar ndjeshëm në ulje parashikimet për të gjitha ekonomitë kryesore. Rritja e SHBA-së tani pritet të jetë vetëm 1.8% për këtë vit (-0.9 pikë), ndërsa Kanadaja parashikohet të rritet me 1.4% (-0.6). Meksika, më e ekspozuara ndaj tregtisë me SHBA-në, mund të futet në recesion me një tkurrje prej 0.3% (-1.7 pikë).

Ndërkohë, Eurozona pritet të goditet më pak, me një rënie mesatare prej 0.3 pikë përqindjeje në parashikime. Gjermania mund të përballet me një tjetër vit pa rritje ekonomike, ndërsa Franca pritet të ketë një rritje modeste prej 0.6%, më pak se sa parashikojnë autoritetet franceze.

Spanja del si përjashtimi i vetëm pozitiv në rajon, me një rritje të pritshme prej 2.5%, më e larta mes ekonomive të përparuara — rezultat i performancës së qëndrueshme gjatë dy viteve të fundit.

FMN paralajmëron se në mungesë të një stabilizimi të tensioneve tregtare, perspektiva për ekonominë globale mbetet e brishtë dhe e rrezikuar nga përshkallëzimi i mëtejshëm i konflikteve tregtare, transmeton albinfo.ch.

Gjykata e Ferizajt cakton paraburgim për gjashtë persona të dyshuar për vrasjen e rreshterit të Policisë

Posted on by albinfo.ch

Gjykata Themelore në Ferizaj ka caktuar masën e paraburgimit prej një muaji për gjashtë persona të dyshuar për përfshirje në vrasjen e rreshterit të Policisë së Kosovës, Muhamed Lika, më 1 prill në Kaçanik. Të dyshuarit H.B., R.M., V.Ç., E.L., Sh.K. dhe D.G. po përballen me akuzën për veprën penale “vrasje e rëndë”, shkruan albinfo.ch.

Sipas njoftimit të gjykatës, rreth orës 23:00 më 1 prill, viktima—rreshteri M.L.—u vra me armë zjarri në hyrje të banesës së tij, pak pasi kishte përfunduar orarin e punës në Stacionin Policor të Kaçanikut. Sipas hetimeve të deritanishme, vrasja ishte planifikuar dhe organizuar paraprakisht, ku i mituri, i përfshirë në rast, kishte shtënë me armë ndaj viktimës, duke e lënë të vdekur në vend.

Nga vendi i ngjarjes janë sekuestruar katër gëzhoja të kalibrit 9×19 mm. Vdekja e zyrtarit policor u konstatua në Qendrën e Mjekësisë Familjare në Kaçanik, si pasojë e plagëve të marra nga predhat e armës së zjarrit, transmeton albinfo.ch.

Sipas Prokurorisë, të dyshuarit kanë vepruar në bashkëkryerje, dhe secili ka pasur rol specifik në ndjekjen dhe vëzhgimin e viktimës. I mituri, pas kryerjes së veprës penale, u largua nga vendi i ngjarjes dhe u takua me të dyshuarin R.M., me të cilin u largua me shpejtësi drejt një lokali në qytet. Pamjet e kamerave të sigurisë e kanë kapur H.B. duke e ndjekur rreshterin Lika që nga dalja nga stacioni policor.

Hetimet zbuluan edhe përfshirjen e të tjerëve, të cilët kishin marrë pjesë në vëzhgimin e vendit të ngjarjes dhe ndjekjen e viktimës me dy automjete – një “Opel Astra” dhe një “Golf II”. Sipas aktakuzës, D.G. ka ndihmuar të miturin pas vrasjes, duke e strehuar dhe furnizuar me ushqim e sende të tjera.

Gjykata i arsyetoi masën e paraburgimit me rrezikun e arratisjes, ndikimit te dëshmitarët dhe mundësinë e përsëritjes së veprës penale.

Hetimet për zbardhjen e plotë të rastit vazhdojnë nën drejtimin e Prokurorisë Themelore në Ferizaj, shkruan albinfo.ch.

 

Pagat u rritën në Zvicër gjatë 2024

Posted on by albinfo.ch

Në Zvicër, pagat u rritën sërish gjatë vitit 2024. Sipas Zyrës Federale të Statistikave, rritja mesatare e pagave nominale ishte 1.8% krahasuar me vitin e kaluar. Edhe pse inflacioni ndikoi në këtë rritje, fuqia blerëse e qytetarëve u përmirësua, falë një rritjeje prej 0.7% të pagave reale – për herë të parë pas tre vitesh rënie, shkruan RTS, transmeton albinfo.ch.

Inflacioni zbriti në 1.1%, i ndikuar nga rritja e qirave dhe çmimeve të energjisë elektrike, dhe ishte më i ulët krahasuar me 2.1% në 2023 dhe 2.8% në 2022.

Rritja e pagave nuk ishte e barabartë në të gjitha sektorët. Në sektorin dytësor, që përfshin ndërtimin dhe prodhimin, rritjet varionin nga +0.8% në ndërtim dhe prodhimin e metaleve, deri në +4.9% në industrinë e gomës, plastikës e produkteve minerale jometalike.

Në sektorin terciar, rritja mesatare ishte 1.9%, me përqindje të larta në:

  • shëndetësi, kujdes social dhe punë sociale (+3.0%),

  • shërbimet postare e korrierëve (+3.0%),

  • sigurime (+2.5%),

  • administratë publike (+2.5%).

Rritje të ulëta ose negative u regjistruan në sektorë si media, telekomunikacion dhe teknologji informacioni (+0.4%), si dhe në shërbimet administrative e mbështetëse, ku u vu re një rënie prej –0.4%.

Sa i përket gjinisë, gratë përfituan më shumë nga rritjet e pagave këtë vit: pagat e tyre u rritën mesatarisht me 2.6% në terma nominalë, ndërsa pagat e burrave me vetëm 1.2%.

Këto të dhëna tregojnë jo vetëm përmirësimin e përgjithshëm të të ardhurave në Zvicër, por edhe ndryshimet dhe sfidat mes sektorëve të ndryshëm, si edhe një hap pozitiv drejt zvogëlimit të hendekut gjinor në paga, transmeton albinfo.ch.