Kosova ka zhvilluar sot stërvitjen e tretë në kuadër të përgatitjeve për dy ndeshjet miqësore të muajit qershor kundër Armenisë dhe Komoreve.

Edhe kjo seancë është mbajtur në Kampin Nacional në Hajvali dhe është karakterizuar me intensitet të lartë dhe përkushtim maksimal nga të gjithë futbollistët, transmeton albinfo.ch.

Përzgjedhësi Franco Foda kishte në dispozicion të gjithë futbollistët, përfshirë edhe ata që munguan në seancat paraprake, dhe ka vazhduar të punojë me ekipin në ndërtimin e filozofisë së lojës që do të aplikohet në këto dy miqësore. Stafi teknik është përqendruar në aspektet taktike dhe organizimin e lojës në të dy fazat, si në mbrojtje edhe sulm.

Pas përfundimit të stërvitjes, futbollisti Ron Raçi, i cili për herë të parë është ftuar nga Foda u shpreh i lumtur që është pjesë e Kombëtares së Kosovës.

“Jam mjaft i lumtur. Ta përfaqësosh vendin tënd është një ndjenjë shumë e mirë dhe jam krenar që jam në mesin e këtyre djemve. Do ta jap maksimumin për Kombëtaren e Kosovës. Jam duke u munduar të përshtatem me ekipin dhe taktikat e trajnerit. Stërvitjet që po i bëjmë janë me intensitet mjaft të lartë dhe shpresoj të jap më të mirën nga vetja. Të dyja miqësoret që na presin duhet t’i fitojmë, në mënyrë që të jemi më të motivuar për kualifikimet e Botërorit që na presin nga shtatori”, tha Raçi.

Në të njëjtën linjë u shpreh edhe Donat Rrudhani, i cili theksoi rëndësinë e këtyre dy përballjeve si pjesë e përgatitjeve për ciklin kualifikues të Botërorit.

“E dimë që janë dy miqësore shumë të rëndësishme dhe duhet t’u qasemi me shumë seriozitet, duke u përgatitur maksimalisht si individë, por edhe si grup. Lojtarët e rinj i kemi pritur shumë mirë dhe besoj që janë ambientuar. Shpresoj që edhe ata do të tregojnë potencialin e tyre në këto miqësore”, tha ai.

Kosova do të përballet me Armeninë më 6 qershor dhe me Komoret më 9 qershor, në stadiumin “Fadil Vokrri” në Prishtinë, me të dyja ndeshjet që nisin në orën 19:00. Këto sfida do të shërbejnë si test i rëndësishëm për Dardanët, në prag të nisjes së kualifikimeve për Kampionatin Botëror 2026, ku janë në grup me Zvicrën, Suedinë dhe Slloveninë.

Seanca e radhës stërvitore është paraparë të mbahet të mërkurën, në orën 17:00, në stadiumin ‘Fadil Vokrri’.

Ekipi i trajnerit Murat Yakin do të qëndrojë në Salt Lake City për një javë dhe do të përballet me Meksikën të shtunën (ora 22:00 sipas kohës zvicerane). ” Të gjithë lojtarët janë këtu dhe shumë të motivuar. Atmosfera është shumë e mirë. Nuk na është dashur të bindnim askënd për të marrë pjesë në këtë turne “, tha Yakin në një konferencë për shtyp gjatë fluturimit nga Cyrihu në Salt Lake City, raporton SRF, transmeton albinfo.ch.

Delegacioni zviceran zbarkoi në Salt Lake City në orën 17:00, ose 1:00 të mëngjesit sipas kohës zvicerane, të martën. Ekipi do të stërvitet në kampusin e Universitetit të Utah të martën përpara se të përballet me Meksikën në stadiumin Rice-Eccles të Universitetit.

“Jemi të lumtur që arritëm të organizojmë një udhëtim të tillë. Nuk ndodh çdo ditë që luajmë kundër Meksikës dhe SHBA-së”, tha Yakin.

Ndeshja kundër SHBA-së do të zhvillohet të martën e ardhshme në Nashville, Tennessee. Ky turne eksplorues, një vit para Kupës së Botës në kontinentin e Amerikës së Veriut, u bë i mundur nga fakti që Zvicra nuk i fillon kualifikimet e Kupës së Botës deri në shtator. Kundërshtarët e tyre do të jenë Kosova, Suedia dhe Sllovenia.

“Këto dy ndeshje miqësore janë shumë motivuese. Është gjithashtu një mundësi për lojtarët që të njihen me atmosferën dhe stadiumet, si dhe të nxisin oreksin e tyre për t’u rikthyer në Kupën e Botës vitin e ardhshëm”, shtoi Yakin.

Trajneri i kombëtares mund të mbështetet te pothuajse të gjithë lojtarët e tij kryesorë. Mungon vetëm Ruben Vargas. Sulmuesi duhej të humbiste udhëtimin për në SHBA për shkak të një dëmtimi në kofshë.

“Harmonia brenda ekipit është e shkëlqyer, mund ta shihni. Jam jashtëzakonisht i lumtur që të gjithë janë të përfshirë”, tha Yakin.

https://www.srf.ch/sport/fussball/nationalmannschaft/vor-den-zwei-testspielen-nati-in-den-usa-angekommen-das-soll-lust-auf-wm-wecken

Federata Shqiptare e Futbollit informon të gjithë tifozët dhe publikun e interesuar se procesi i shortit elektronik për përzgjedhjen e atyre që kanë fituar të drejtën për të blerë bileta për ndeshjen Shqipëri-Serbi, e vlefshme për kualifikueset e Botërorit 2026, do të vijojë deri më datat 3-4 qershor.

Kjo zgjatje është bërë e domosdoshme për shkak të numrit shumë të lartë të aplikimeve të regjistruara në sistem dhe ngarkesës së platformës, çka e bën të nevojshëm një proces më të kujdesshëm, transparent dhe të drejtë për të gjithë aplikuesit, njofton FSHF, transmeton albinfo.ch.

Procesi i shpërndarjes së biletave ka nisur, dhe një pjesë e aplikuesve që janë përzgjedhur si fitues nga shorti elektronik janë tashmë pajisur me bileta përmes platformës së dedikuar.

FSHF i bën thirrje të gjithë personave që kanë aplikuar për bileta të kontrollojnë në mënyrë të vazhdueshme adresat e tyre të emailit (si në Inbox ashtu edhe në Spam), për të parë nëse kanë marrë njoftim nga kompania T-Ticket, e cila menaxhon procesin zyrtar të shitjes së biletave.

Vetëm ata që do të përzgjidhen përmes shortit elektronik do të marrin një link të personalizuar për blerjen e biletave.

Nëse pas datës 4 qershor nuk merrni një email konfirmimi, kjo do të thotë që nuk jeni përzgjedhur nga shorti elektronik. Nuk do të dërgohet njoftim për ata që nuk janë përzgjedhur.

FSHF falënderon të gjithë tifozët për interesin dhe durimin, duke garantuar se çdo hap i këtij procesi po realizohet me transparencë të plotë dhe barazi për të gjithë aplikuesit.

Kombëtarja shqiptare ka nisur zyrtarisht përgatitjet në kuadër të ndeshjeve kualifikuese për Kampionatin Botëror 2026 ndaj Serbisë dhe Letonisë.

Dje, ekipi i drejtuar nga trajneri Silvinjo mbajti seancën e parë stërvitore në “Shtëpinë e Futbollit”, ku u vëzhgua gjendja fizike e lojtarëve dhe u provuan skema të ndryshme taktike.

Departamenti i Komunikimit në FSHF bën me dije se ekipi u stërvit i plotë me të gjithë lojtarët që kanë mbërritur në Shqipëri.

Seanca stërvitore e radhës do të zhvillohet sot pasdite dhe do të jetë e hapur për 15 minutat e para për mediat.