Kryetari i Nisma Socialdemokrate, Fatmir Limaj, ka deklaruar se gjatë kësaj jave do të takohet me liderin e LVV-së, Albin Kurti, në tentim për të arritur një marrëveshje për të formuar shumicën parlamentare në Kuvend, përcjell albinfo.ch.

Ai, pas dështimit të vazhdimit të seancës konstituive në Kuvend për herë të 47-të, tha se ia ka shtrirë dorën e bashkëpunimit Kurtit, por nuk tregoi nëse ka hequr dorë nga ambicia e tij për postin e kryeparlamentarit.

“Ne duhet të bashkëbisedojmë për të dalë nga kjo situatë. Kuptoni se gjërat më të zakonshme po bëhen të jashtëzakonshme. Gjëja e parë është komunikimi për të dalë nga kriza. Unë jam i interesuar po ashtu edhe me liderët tjerë politikë të shikojmë dhe të marrim mendimet se si të dilet nga kjo situatë, pasi është bërë e tepërt. Do të bisedoj me kryeministrin për të ardhur te një moment për të zgjidhur këtë situatë. Natyrisht duhet të shikohen mundësitë që mund të bëhen nga ai dhe nga ne se si të tejkalohet kjo krizë”, tha ai.

Sipas tij, në zgjedhjet e 9 shkurtit është votuar për formimin e qeverisë dhe postin e kryeministrit, andaj fokusi duhet të jetë në formimin e një shumice parlamentare për një qeveri stabile.

“Ne jemi të hapur për bashkëpunim dhe ia kemi zgjatur dorën e bashkëpunimit për të ndërtuar shumicën parlamentare. Mos më lejoni të përsëris, Nisma ka dëshirë për të gjetur një zgjidhje. Kosova ka votuar për qeverinë dhe ne jemi të gatshëm për të ndihmuar për të përmbushur atë vullnet të shumicës. Partneri pastaj ose shtrihet, siç kemi biseduar, ose shkon të qeverisë vet. Në këtë rast po kërkohet një shumicë që do të ofronte një qeverisje stabile”, theksoi Limaj.

Presidentja e Kosovës, Vjosa Osmani, tha se Serbia është shndërruar në shtet satelit të Rusisë, e cila synon të krijojë efekt destabilizues në rajon. Por Osmani theksoi se Kosova do të punojë ngushtë me NATO-n dhe Bashkimin Evropian që taktikat destabilizuese të mos kenë sukses.

Këto deklarata Osmani i bëri gjatë vizitës së saj në Letoni, që është e para e një presidenti të Kosovës në këtë shtet, para se ta nderonte me medalje ushtarake presidenciale homologun e saj, Edgars Rinkēvičs.

Osmani tha se zëri i Letonisë ka qenë vendimtar në përkrahjen e anëtarësimit të Kosovës në organizatat ndërkombëtare. Ndërkaq, presidenti i Letonisë theksoi se dita kur Kosova do të bëhet vend kandidat në BE është afër, edhe pse kërkohet ende punë dhe angazhim.

Presidentja Osmani tha se vizita në Riga shënon vazhdimësinë e një partneriteti të fortë ndërmjet të dy vendeve.

“Propozoj krijimin e një Forumi Ekonomik Kosovë-Letoni për të thelluar lidhjet tona ekonomike dhe për të afruar agjencitë tona të investimeve dhe inovacionit. Lidhjet biznes-mes-biznesesh janë gjithmonë një hap i rëndësishëm përpara në afrimin e vendeve dhe popujve. Theksova gatishmërinë e Kosovës për të finalizuar marrëveshje dypalëshe të rëndësishme ndërmjet vendeve tona dhe shpresoj që ministritë përkatëse do të vazhdojnë bisedimet që do të nisin sot. Zëri i Letonisë ka qenë vendimtar në përkrahjen e anëtarësimit të Kosovës në organizatat ndërkombëtare, në Këshillin e Evropës, siç e përmenda, në Interpol, UNESCO dhe institucionet financiare ndërkombëtare”, deklaroi Osmani në një konferencë për media në Letoni.

Në takimin me presidentin e Letonisë, ajo tha se kanë diskutuar edhe për qëllimet imperialiste të rrezikshme të Rusisë. Osmani tha se Kosova qëndron në vijën e parë të mbrojtjes së vlerave euroatlantike në Ballkanin Perëndimor.

“Ne besojmë në fuqinë transformuese të Bashkimit Evropian dhe mbetemi të përkushtuar ndaj reformave dhe plotësimit të kritereve, por kjo rrugë duhet të udhëhiqet nga drejtësia, trajtimi i barabartë dhe besueshmëria nga ana e BE-së. Pra, i nderuar president Rinkēvičs, ndërsa ne po flasim, 140 ushtarë letonë po shërbejnë ende në kuadër të misionit të NATO-s në Kosovë, duke kontribuar në paqen, stabilitetin dhe sigurinë e qytetarëve tanë. Ata i bashkohen mijëra forcave letonase që kanë shërbyer në Kosovë gjatë dy dekadave të fundit. Kjo është një dëshmi e përkushtimit të Letonisë ndaj vlerave tona të përbashkëta dhe shpresoj sinqerisht që kjo mbështetje do të vazhdojë edhe pas dhjetorit të këtij viti”, shtoi presidentja Osmani.

Osmani u pyet në Letoni se cili është ndikimi i Rusisë në tensionet mes Kosovës dhe Serbisë. Ajo tha se Serbia është shndërruar në një shtet satelit të Rusisë.

“Serbia vazhdimisht përpiqet të destabilizojë vendin tonë, përfshirë përmes akteve të agresionit, ndërsa ne vazhdimisht vetëmbrohemi. Në historinë e ekzistencës së shtetit tonë, asnjëherë nuk kemi pushtuar apo sulmuar as edhe një centimetër të territoreve të fqinjëve tanë. Ajo që kemi bërë gjithmonë dhe që do të vazhdojmë të bëjmë është të mbrojmë pavarësinë tonë, integritetin tonë territorial, paqen dhe lirinë që e kemi fituar me shumë sakrifica. Në vendin tim, ndikimi i Rusisë është zero. Fatkeqësisht nuk mund ta them të njëjtën gjë për vendin fqinj, sepse Serbia është shndërruar në një shtet satelit të Rusisë, qoftë në aspektin politik, ekonomik apo ushtarak. Përmes Serbisë, Rusia përpiqet të krijojë një efekt destabilizues zinxhir në rajon, sepse sa më shumë destabilizim në Evropë, aq më shumë i shërben interesave të Rusisë. Kjo është ajo që duan, por ne do të punojmë ngushtë me aleatët tanë në BE dhe NATO, përmes parandalimit dhe zmbrapsjes, për të siguruar që asnjë nga taktikat destabilizuese të Rusisë, të realizuara përmes Serbisë, të mos ketë sukses”, u përgjigj Osmani.

Në anën tjetër, presidenti i Letonisë, Edgars Rinkēvičs, tha se vizita e Osmanit është historike, ndërsa shtoi se në takim ka konfirmuar mbështetjen për Kosovën në rrugëtimin drejt Bashkimit Evropian dhe integrimit të mëtejshëm evropian.

“Unë vetë kam vizituar Kosovën këtë vit, në fakt në mars, gjatë pranverës, kur gjithashtu vizitova edhe ushtarët tanë të dislokuar në kuadër të KFOR-it. Aktualisht kemi të dislokuar rreth 140 ushtarë në Kosovë. Dhe atëherë, së bashku me zonjën presidente, diskutuam për marrëdhëniet dypalëshe, sigurinë rajonale, dhe unë besoj se jemi vende me mendësi të ngjashme, jemi në të njëjtën gjatësi vale, në të njëjtën faqe për shumë çështje të ndryshme. Gjithashtu konfirmova se politika e jashtme dhe e sigurisë e Kosovës është tërësisht e harmonizuar me atë të Bashkimit Evropian. Diskutuam edhe për çështje që kanë rëndësi për forcimin e sigurisë në Ballkanin Perëndimor. Diskutuam për situatën në Ukrainë, për agresionin rus kundër Ukrainës, i cili kërkon që të mbajmë qëndrime të qarta në kuadër të bashkësisë ndërkombëtare në tërësi”, deklaroi ai.

Në takimin me presidenten Osmani ai shtoi se diskutuan edhe për bashkëpunim ekonomik dhe theksoi se ka rritje të shkëmbimeve tregtare mes dy vendeve.

“Shpreha mbështetjen time për përfaqësuesen e lartë të BE-së, Kaja Kallas, dhe zotëri Sorensen, i cili është ndërmjetësues në emër të BE-së në dialogun e Prishtinës, që është shumë i rëndësishëm. Po ashtu është me rëndësi që ky dialog të mbështetet nga të dyja palët, jo vetëm nga njëra palë. Nga kjo pikëpamje, ishte shumë interesante për mua të dëgjoja nga kolegia ime, zonja presidente, mendimin e saj për ecurinë e këtij dialogu dhe mënyrën se si po trajtohen çështjet rajonale. Mendoj se do të arrijmë në një pikë kur do të shënojmë përparim të rëndësishëm në integrimin evropian të Kosovës. E dimë se çfarë duan miqtë tanë në Kosovë, por gjithashtu e dimë se ka ende shumë për t’u bërë, si në aspektin e reformave të brendshme, ashtu edhe në planin e politikës së jashtme, për të siguruar mbështetjen e të gjitha shteteve anëtare të BE-së. Por dita kur Kosova do të bëhet vend kandidat është afër, edhe pse kërkohet ende shumë punë”, theksoi ai.

Presidentja Vjosa Osmani gjatë ditës do të vizitojë edhe Qendrën e Ekselencës Stratcom, për të cilën u tha se ka rol të rëndësishëm në promovimin e integritetit të informacionit dhe qëndrueshmërisë.

Osmani: Faleminderit Letonisë dhe presidentit për miqësinë me Kosovën

Presidentja e Kosovës, Vjosa Osmani, ka shkuar në Letoni me ftesë të presidentit letonez Edgars Rinkēvičs. Osmani publikoi një fotografi nga pritja atje dhe e falënderoi Rinkēvičs.

“Faleminderit presidentit Rinkēvičs për pritjen e ngrohtë dhe miqësinë e palëkundur ndaj Kosovës!”, shkroi ajo në Facebook.

Presidenca njoftoi dje se me Rinkēvičs, Osmani përveç takimit tête-à-tête do të zhvillojë takim pune me delegacionet përkatëse si dhe do të marrë pjesë në drekën e punës të shtruar nga presidenti Rinkēvičs.

“Pas takimeve, të dy presidentët do të mbajnë një konferencë të përbashkët për media, me ç’rast presidentja Osmani do t’i dorëzojë presidentit Rinkēvičs medaljen ushtarake presidenciale për Forcat Mbrojtëse të Letonisë për kontributin e tyre për paqen dhe sigurinë si pjesë e KFOR-it”, thuhet në njoftim.

Bëhet e ditur se Gjykata Supreme e ka shfuqizuar udhëzimin administrativ të nënshkruar nga ministri në detyrë i Financave, Hekuran Murati, me të cilin u pezulluan për 60 ditë shitjet dhe abonimet e arkave fiskale, përcjell albinfo.ch.

Udhëzimi administrativ, i nënshkruar nga ministri në detyrë i Financave më 15 prill të këtij viti, është shpallur i jashtëligjshëm.

Aktgjykimi është nxjerrë më 7 korrik nga një kolegj i gjyqtarëve të Gjykatës Supreme, i kryesuar nga gjyqtarja Delushe Halimi.

Gjykata e ka aprovuar kërkesëpadinë e paditësve, kompanive Enternet dhe Service Global, të cilat merren me shitjen dhe servisimin e arkave fiskale, raporton Paparaci. Lëndën në gjykatë për palën paditëse e ka përfaqësuar avokati Virtyt Ibrahimaga.

“APROVOHET e themeltë kërkesëpadia e paditësve: Enternet Shpk me numër unik identifikues 811557266, me seli në Rrafshi i Kosovës nr.80, Prishtinë, dhe Konsorciumi Service Global, me numër unik identifikues 602193427, me seli në Prishtinë, e paraqitur kundër të paditurës: Ministria e Financave, Punës dhe Transfereve (MFPT), me seli në Prishtinë”, thuhet në pikën e parë të dispozitivit të aktgjykimit.

Për të 47-ën herë ka dështuar konstituimi i Kuvendit të Kosovës, përcjell albinfo.ch.

Kryesuesi i seancës, Avni Dehari, sërish hodhi në votim Komisionin për votim të fshehtë, i cili nuk po merr mbështetje nga partitë tjera, përveç Vetëvendosjes.

Të pranishëm në sallë ishin 105 deputetë, prej tyre 51 votuan për, asnjë kundër dhe asnjë abstenim.

Sipas aktgjykimit të Gjykatës Kushtetuese, deputetët janë të obliguar të konstituojnë legjislaturën e nëntë të Kuvendit deri më 26 korrik, më së largu.

Megjithatë, aktgjykimi nuk e qartëson se çfarë do të ndodhë nëse Kuvendi nuk konstituohet.

Ndërkohë, Vetëvendosje këmbëngul që emri i Albulena Haxhiut të hidhet në votim për kryeparlamentare përmes votimit të fshehtë, ndërsa partitë tjera e konsiderojnë këtë kundërkushtetuese, meqë në aktgjykim thuhet se zgjedhja e kryeparlamentarit duhet të bëhet sipas praktikave të deritanishme.

Presidentja Vjosa Osmani ka paralajmëruar se nëse nuk ndodh konstituimi, do t’i drejtohet sërish Gjykatës Kushtetuese

Edhe sot, deputetët e zgjedhur të Kuvendit të Kosovës do të mblidhen për herë të 47-të në një përpjekje tjetër për ta konstituuar legjislaturën e nëntë, të dalë nga zgjedhjet parlamentare të mbajtura më 9 shkurt, përcjell albinfo.ch.

Seanca fillon në orën 11:00.

Të dielën ka dështuar edhe përpjekja e 46-të për konstituimin e legjislaturës së nëntë të Kuvendit të Kosovës.

Kryesuesi i seancës, Avni Dehari, ka kërkuar nga subjektet politike që nuk kanë propozuar emër për anëtar të Komisionit për Votim të Fshehtë për zgjedhjen e kryeparlamentarit që ta bëjnë një gjë të tillë, por si zakonisht ata kanë refuzuar.

Në vend të propozimit, ata në foltore kanë kërkuar nga kryesuesi që t’i kthehet pikës së rendit të ditës, por fjalimet e tyre janë ndërprerë nga regjia me kërkesë të kryesuesit, pasi në seancën konstituive nuk lejohet debati.

Në votimin e Komisionit për Votim të Fshehtë, nga 85 deputetë të pranishëm, për votuan 43 deputetë, ndërsa nuk pati as vota kundër e as abstenim, pasi pjesa tjetër e deputetëve, si zakonisht deri më tash, nuk morën pjesë në votim.

Procesi i konstituimit po vazhdon të mbetet i bllokuar në pikën kyçe të zgjedhjes së kryetarit të Kuvendit, çka ka pamundësuar vazhdimin e rregullt të punës së këtij institucioni për më shumë se katër muaj.

Ky ngërç politik ka ndikuar drejtpërdrejt në paralizimin e punës së institucionit legjislativ, ndërsa qytetarët dhe shoqëria civile kanë shprehur shqetësim për mungesën e vullnetit politik për të gjetur zgjidhje.

Bllokada në Kuvendin e Kosovës ka nisur të bëhet temë edhe në mediat botërore.

Rreth përpjekjeve të pasuksesshme të Kuvendit ka shkruar gazeta gjermane Frankfurter Rundschau, përcjell albinfo.ch.

Artikulli i shkruar nga Thomas Roser thekson se faji pjesërisht është edhe te kryeministri në detyrë, njëherësh kryetari i Vetëvendosjes, Albin Kurti.

Tutje në këtë shkrim përmendet edhe protesta me gomarë e organizuar para disa ditësh nga avokati Arianit Koci.

“Njerëzit po trajtohen si gomarë nga përfaqësuesit e tyre” kishte shpjeguar Koci.

Dhe duket se afër është të bëhet edhe përpjekja e 50-të për konstituimin e Kuvendit, e cila pritet të ndodhë të dielën e ardhshme.

Tutje autori gjerman përmend faktin se Kurti nuk po shihet i gatshëm për kompromis.

Gazeta në fjalë përmendi një nga një edhe pasojat e bllokimit.

“Pasoja e bllokimit: Ndërsa inflacioni u rrit në 4.3 për qind në qershor, niveli më i lartë në dy vjet, asnjë legjislacion nuk është miratuar, asnjë marrëveshje ndërkombëtare nuk është ratifikuar, asnjë fond i miratuar dhe asnjë pozicion udhëheqës vakant në institucionet shtetërore nuk është plotësuar për më shumë se gjysmë viti” shkruan në artikullin e gazetës gjermane.

“Në zgjedhjet parlamentare të 9 shkurtit, partia e majtë populiste Vetëvendosje (VV) e udhëhequr nga kryeministri në largim Albin Kurti doli qartë si partia më e fortë me rreth 42 për qind të votave, por humbi shumicën absolute. Opozita e konsideron kandidaten e nominuar nga VV dhe ish-ministren e Drejtësisë, Albulena Haxhiu, të papërshtatshme për këtë pozicion për shkak të qëndrimit të saj polarizues dhe po shtyn përpara një propozim alternativ.

Megjithatë, kryeministri aktual Kurti nuk shihet as veçanërisht i gatshëm për kompromis dhe as si lojtar ekipi.

Edhe pse Haxhiu vazhdimisht ka dështuar të sigurojë shumicën e kërkuar prej 61 votash në gjashtë përpjekjet e mëparshme zgjedhore, VV-ja deri më tani nuk ka bërë asnjë përpjekje për të zëvendësuar kandidatin e saj.

Gjykata Kushtetuese e Kosovës ka caktuar një afat deri më 28 korrik për anëtarët e parlamentit që të përmbushin detyrimin e tyre.

Megjithatë, për të shpërndarë parlamentin për zgjedhje të parakohshme, ai së pari duhet të konstituohet.

Sot me fillim nga ora 11:00 do të mbahet seanca e 47-të me radhë në përpjekje për ta konstituuar Parlamentin e Kosovës.

Autorja nga diaspora, Shkëndije Ibishi Shala, ka paralajmëruar promovimin e librit të saj “Flaka ndriçon për Atdheun”, përcjell albinfo.ch.

Më 14 korrik 2025, pikërisht në ambientet e Institutit Albanologjik të Prishtinës. Ajo thekson: “Kur një artist hyn në epokën e kreativitetit të tij, mjafton një fjali, një koment apo një figurë për të ndezur frymëzimin për një vepër të re. Pikërisht kështu ka lindur libri ‘Flaka ndriçon për Atdheun’.”

Ajo fton anëtarët e komunitetit shqiptar në Kanada t’i bashkohen kësaj ngjarjeje të veçantë që përfshin tregime frymëzuese, aktivitete ngjyrosjeje për fëmijë si dhe diskutime domethënëse mbi librin dhe mesazhet e tij.

Në “Flaka ndriçon për Atdheun”, autorja na çon në një rrugëtim të bukur dhe plot emocion, ku përshkruan mënyrën se si ajo i arrin qëllimet e saj dhe si ne mund të përvetësojmë vlerat, madhështinë dhe virtytet e heronjve e heroinave shqiptare.

Shkëndije Ibishi Shala është një aktiviste shqiptare që jeton dhe vepron në Kanada, si dhe autore e disa librave për fëmijë të botuar vitet e fundit në gjuhën angleze dhe shqipe.

Mësohet se pilotët e FSK-së, një major dhe dy kapitenë, Afrim Zabeli, Atdhe Hasani dhe Krenar Voca, kanë përfunduar me sukses trajnimin rifreskues me helikopter në Shkollën e Aviacionit Tokësor në Isparta të Turqisë, përcjell albinfo.ch.

FSK-ja thotë se trajnimi nuk ishte vetëm një përditësim teknik, por edhe një përforcim i mëtejshëm i përgjegjësisë që, sipas tyre, ata bartin çdo ditë mbi supe.

“Gjatë trajnimit, pilotët tanë zhvilluan dhe përmirësuan aftësitë e tyre përmes fluturimeve praktike, duke përfshirë skenarë të fluturimeve emergjente dhe taktike. Po ashtu, ata patën mundësinë të shkëmbejnë përvoja profesionale me kolegët e tyre nga Forcat e Armatosura të Turqisë, duke treguar standardin e lartë që përfaqëson FSK-ja në çdo angazhim ndërkombëtar” thuhet në njoftimin e Forcës së Sigurisë së Kosovës.

FSK-ja thekson se Turqia në vazhdimësi ka dhënë kontributin e saj në ngritjen e kapaciteteve të FSK-së në fusha të ndryshme. “Me këtë rast, përmes mbështetjes së vazhdueshme në fuqizimin e kapaciteteve tona ajrore dhe bashkëpunimeve të tilla, ne rrisim ndërveprueshmërinë me partnerët tanë dhe forcojmë themelet e një ushtrie moderne, të aftë dhe të përgatitur” thuhet më tej në njoftim.

Kryeministri i Kosovës, Albin Kurti, në mbrëmjen e 14.07.2025 pati darkë pune me të dërguarën e posaçme të Mbretërisë së Bashkuar për Ballkanin Perëndimor, Karen Pierce, përcjell albinfo.ch.

Darka e punës u mbajt në rezidencën e ambasadës së Mbretërisë së Bashkuar.

Zyra e Kryeministrit njofton se Pierce vjen në Kosovë për herën e dytë, pasi në prillin e kaluar ishte pjesë e delegacionit të Sekretarit të Shtetit për Punë të Jashtme të Mbretërisë së Bashkuar, David Lammy.

“Kryeministri Kurti dhe emisarja Pierce diskutuan së bashku mbi marrëdhëniet mes Kosovës dhe Mbretërisë së Bashkuar dhe mundësitë për zgjerim të bashkëpunimit duke përfshirë fusha të ndryshme, nga industria kreative dhe diplomacia deri te mbrojtja e siguria” thuhet mes tjerash në komunikatën për media të ZKM-së.

Kurti citohet të ketë theksuar domosdoshmërinë e zbatimit të marrëveshjeve të arritura dhe rëndësinë e njohjes reciproke të diplomave dhe lëvizjes së lirë, në përgatitjet për mbajtjen e Samitit të Procesit të Berlinit që do të zhvillohet në muajin tetor në Londër.

Këto domosdoshmëri, sipas Kurtit, janë jetike për suksesin e Tregut të Përbashkët Rajonal dhe Planin e Rritjes.

Sipas komunikatës, Kurti ka shprehur mirënjohje për mbështetjen e vazhdueshme të Mbretërisë së Bashkuar ndaj Republikës së Kosovës.