Kryeministri në detyrë i Republikës së Kosovës, Albin Kurti, ka bërë homazhe sot në Zhazhë, në kujtim dhe nderim të civilëve shqiptarë të vrarë në masakrën e Zhazhës, përcjell albinfo.ch

Kujtojmë se, 26 vjet më parë, forcat policore ekzekutuan civilë shqiptarë të pambrojtur dhe të paarmatosur, në mesin e tyre edhe një të mitur, Fidan Pecin, i cili ishte vetëm 16 vjeç. Kryeministri Kurti dhe ministri Peci, të shoqëruar edhe nga deputetë të Kuvendit, vendosën lule të freskëta te lapidari i ngritur në nderim të viktimave civile dhe katër dëshmorëve të kësaj zone, të rënë në luftën çlirimtare.

Pas homazheve në Zhazhë, ata vazhduan për në fshatin Boletin, në Komunën e Zveçanit, ku vizituan Kompleksin e Kullave të Isa Boletinit dhe vendosën lule të freskëta mbi varrin e heroit Isa Boletini.

Kryetari i PDK-së, Memli Krasniqi, e ka akuzuar LVV-në për tallje me qytetarët dhe me verdiktin e tyre.

“U shpreh keqardhje të gjithë qytetarëve për këtë tallje që po iu bëhet verdiktit të tyre nga ana e partisë së parë, e cila na mblodhi për të tetën herë në Kuvend dhe sillet me të njëjtin mentalitet,” është shprehur Krasniqi.

Ai ka thënë se dëshiron t’u japë tri mesazhe.

“Dëshiroj t’u japë tri mesazhe: e para, demokracia funksionon me shumicë, jo me imponim; e dyta, institucionet janë të popullit, jo të asnjë partie politike të veçantë; dhe e treta, duhet ta kuptojmë të gjithë se koha e sundimit njëpartiak dhe monizmit ka përfunduar,” ka deklaruar ai.

Ai ka shtuar se sa më parë që LVV-ja t’i kuptojë këto çështje, aq më mirë do të jetë për vendin.

Krasniqi ka theksuar se LVV-së i takon ta propozojë kandidaten për kryetare, por nuk mund të marrë votat me zor.

Bëhet e ditur se, para pak minutash, ka përfunduar pa sukses edhe përpjekja e tetë për konstituimin e legjislaturës së nëntë të Kuvendit të Kosovës. Kandidatja e Lëvizjes Vetëvendosje për kryeparlamentare, Albulena Haxhiu, nuk po arrin të marrë 61 vota të mjaftueshme për të marrë postin, përcjell albinfo.ch.

Si pasojë, do të duhet edhe seanca e nëntë për të tentuar konstituimin.

Për dallim nga votimet e deritashme, në të cilat Haxhiu merrte 57 vota, sot ajo mori 54. Kundër kandidaturës së saj votuan 44 deputetë. Tre deputetë abstenuan.

Kuvendi, tashmë prej 15 prillit, është duke mbajtur seanca çdo dy ditë në përpjekje për të kaluar procedurat fillestare. Konstituimi konsiderohet i përfunduar vetëm pas zgjedhjes së kryeparlamentarit dhe të nënkryetarëve të Kuvendit.

Nga partitë që në legjislaturën e shkuar ishin në opozitë, vazhdimisht është bërë thirrje për ndërrim të emrit të propozuar. Teksa Partia Demokratike e Kosovës ka thënë se emri i Haxhiut nuk është unifikues, Aleanca për Ardhmërinë e Kosovës ka deklaruar se do ta votonte kryeparlamentarin nëse do të propozoheshin Saranda Bogujevci ose Shqipe Selimi. Lidhja Demokratike ka bërë me dije se nuk do të votojë asnjë kandidat të VV-së, ndërsa në partinë fituese kanë përsëritur vazhdimisht se nuk mund të pranojnë propozime për emra nga partitë e tjera.

Seanca e ardhshme mbahet të enjten, duke filluar nga ora 10:00.

Gati 100 për qind e energjisë elektrike është rikthyer në Spanjë, pasi janë kryer të gjitha masat e nevojshme për të rregulluar problemin, sipas operatorit spanjoll të rrymës, Red Electrica, përcjell albinfo.ch.

Ndërkohë, disa rajone akoma janë në gjendje emergjente që nga e hëna, shkaku i problemeve me energji elektrike; sipas zyrtarëve, gjendja emergjente do të shpallet në rajonet që e kërkojnë.

Edhe në Portugali, sipas qeverisë, energjia elektrike gjatë natës është rikthyer për 6.2 milionë shtëpi nga gjithsej 6.5 milionë prej tyre.

Shkaktari i këtyre problemeve, sipas një grupi tregtar të energjisë elektrike në Bashkimin Evropian, ishte një problem teknik në një lidhje në rrjetin elektrik mes Francës dhe Spanjës.

Ndërkohë, kryeministri i Portugalisë, Luis Montenegro, ka deklaruar se nuk ka indikacione për një sulm kibernetik në rrjetin shpërndarës.

Mësohet se Kuvendi i Kosovës do të mblidhet sërish sot për të vazhduar seancën konstituive, të nisur më 15 prill, në përpjekje për të përmbyllur zgjedhjen e kryetarit dhe nënkryetarëve, përcjell albinfo.ch.

Të dielën u votua për herë të pestë kundër propozimit të Lëvizjes Vetëvendosje për zgjedhjen e Albulena Haxhiut si kryetare e Kuvendit. LVV-ja vazhdon të këmbëngulë në propozimin e saj, duke refuzuar të ndryshojë kandidatin, ndërkohë që partitë, që në legjislaturën e kaluar kanë qenë në opozitë, vazhdojnë të refuzojnë ta mbështesin atë. Të gjitha zhvillimet rreth seancës së sotme mund t’i lexoni këtu.

Ndërkohë, deputeti i Vetëvendosjes, Hekuran Murati, ka deklaruar se nuk do të tërhiqet nga vendimi për ndryshimin e emrit të Albulena Haxhiut për kryetare të Kuvendit.

“Propozimi ynë është Albulena Haxhiu,” ka thënë ai para mediave në hyrje të Kuvendit të Kosovës.

“Lus të gjitha partitë që me votën e tyre të marrin pjesë dhe të votojnë për konstituimin e Kuvendit. Ne në vazhdimësi kemi bërë thirrje për konstituim të Kuvendit, sepse konstituimi u takon të gjitha partive, nuk është vetëm i një koalicioni qeverisës,” ka shtuar ai.