Archives

Shoqatat evropiane denoncojnë çmimet e larta të bagazhit të dorës në linjat low-cost

Posted on by Alb

Rreth 15 shoqata të konsumatorëve në Evropë kanë denoncuar çmimet e larta të bagazhit të dorës në linjat ajrore me kosto të ulët, duke i quajtur këto tarifa të pajustifikuara dhe abuzive. Ata i kanë kërkuar Bashkimit Evropian të ndërhyjë me rregullore për të mbrojtur të drejtat e udhëtarëve.

Sipas shoqatave, ndonëse kompanitë reklamojnë tarifa të ulëta (nga 9 deri në 20 franga), çmimet reale për një valixhe të vogël dore mund të arrijnë deri në 49 franga, si në rastin e fluturimeve nga Gjeneva në Barcelonë apo Londër, transmeton albinfo.ch.

Përfaqësuesi i Organizatës Evropiane të Konsumatorëve, Agustin Reyna, theksoi se bagazhi i dorës nuk paraqet as kosto shtesë dhe as rrezik për kompanitë, prandaj tarifimi i tij është thjesht një mënyrë për të nxjerrë më shumë përfitime nga pasagjerët.

Nga ana tjetër, linjat ajrore nuk kanë komentuar, përveç EasyJet-it, e cila deklaroi se politika e saj për bagazhin është në përputhje me ligjet dhe se ofron një opsion falas për një bagazh të vogël dore.

Komisioni Evropian pritet të japë një vendim në muajin qershor për të drejtat e udhëtarëve në BE, por disa shtete anëtare po mbrojnë interesat e kompanive ajrore, çka mund të pengojë rregullimin e përbashkët të këtij problemi.

Përsëri tetë kilometra trafik në Gotthard drejt jugut

Posted on by Alb

Në autostradën A2, përpara tunelit rrugor të Gotthard-it, trafiku drejt jugut është i bllokuar në një kolonë prej tetë kilometrash. Sipas Klubit të Automobilistëve të Zvicrës (TCS), kjo përkthehet në një kohë pritjeje prej afërsisht 1 orë e 20 minuta, transmeton albinfo.ch.

Të premten, kolonat në të njëjtin vend arritën deri në 20 kilometra. Shërbimi i trafikut parashikon bllokime edhe gjatë kthimit drejt veriut të hënën. Edhe gjatë ditës së shtunë, në orën 15:30, ishte formuar tashmë një kolonë rreth tre kilometra e gjatë në hyrjen jugore të tunelit, që korrespondon me një pritje rreth gjysmë ore.

 

 

Fitore me vlerë të dyfishtë për Labinot Xhoxhaj

Posted on by BR

Boksieri shqiptar, Labinot Xhoxhaj, vazhdon me paraqitje të shkëlqyeshme në karrierën ndërkombëtare.

Xhoxhaj mposhti Mourad Aliev (13-1-0, 10 KO) me vendim unanim të gjyqtarëve, pas 12 raundeve të forta, transmeton albinfo.ch.

Labinot Xhoxhaj e mbrojti titullin e kampionit evropian në versionin EBU, ndërkohë që fitoi edhe titullin prestigjioz WBC International, duke forcuar pozicionin e tij në ranglistat ndërkombëtare të peshave të rënda.

“Faleminderit familjes time që më ka qëndruar pranë në çdo hap, në ditët e vështira dhe në momentet e mira.

Faleminderit stafit tim, trajnerëve, ekipit tim të ngushtë që punuan ditë e natë për këtë moment.

Një falënderim i madh shkon për sponsorët që më mbështetën dhe besuan në rrugëtimin tim.

Për bashkatdhetarët kudo në botë, ndjeva zemrat tuaja në çdo sekondë të kësaj lufte!

Dhe mbi të gjitha, për kombin tim shqiptar, kjo fitore bart me vete krenarinë, fuqinë dhe shpirtin e gjithë një populli që nuk dorëzohet kurrë!”, ka shkruar Xhoxhaj në Facebook.

Çfarë hapet e çfarë mbyllet të hënën e Pentekostit në Zvicër?

Posted on by albinfo.ch

Të hënën, më 9 qershor, shumica e kantoneve në Zvicër festojnë Ditën e Pentekostit, e njohur si festë zyrtare, ndaj shumica e bizneseve do të jenë të mbyllura. Përjashtim bëjnë kantonet Neuchâtel, Solothurn, Valais dhe Zug, ku dita do të jetë e zakonshme pune, shkruan The Local, transmeton albinfo.ch.

Në kantonet ku është festë, supermarketet dhe dyqanet me pakicë do të mbyllen, përveç atyre në aeroporte, stacione kryesore trenash dhe dyqaneve të benzinës si Coop Pronto dhe Migrolino. Kafenetë dhe disa restorante do të qëndrojnë të hapura.

Transporti publik do të funksionojë me orar të reduktuar, sipas orarit të së dielës, ndërsa farmacitë do të jenë kryesisht të mbyllura, përveç atyre që ofrojnë shërbim të rojës. Spitalet dhe shërbimet emergjente do të operojnë normalisht.

Në rast urgjence, qytetarët mund të telefonojnë 144 për ndihmë mjekësore, 117 për policinë dhe 118 për zjarrfikësit. Për situata jo emergjente, ofrohen numra kontakti për mjekët e rojës në kantone të ndryshme.

Ky ndryshim në festat publike vjen nga sistemi federal zviceran, ku çdo kanton vendos për festat e veta. Kantoni me më shumë festa publike është Ticino, me gjithsej 15, transmeton albinfo.ch.

.

Shoferët gjermanë mund të kursejnë në karburant duke furnizuar jashtë vendit, ja ku është më lirë

Posted on by albinfo.ch

Ndërsa qytetarët në Gjermani përgatiten për fundjavën e gjatë me rastin e festës publike Pfingstmontag më 9 qershor, shumë prej tyre planifikojnë udhëtime të shkurtra brenda dhe jashtë vendit. Për ata që do të udhëtojnë me makinë, një pyetje e zakonshme është: a ia vlen të mbushin rezervuarin në Gjermani apo të presin deri pas kufirit?

Sipas të dhënave më të fundit nga Komisioni Evropian, çmimet e karburantit ndryshojnë ndjeshëm në varësi të vendit dhe në disa raste, shoferët mund të kursejnë dhjetëra euro për mbushje të plotë, nëse ndalen për të furnizuar jashtë kufirit gjerman, shkruan The Local, transmeton albinfo.ch.

Austria ofron një nga alternativat më të lira për shoferët që kalojnë kufirin nga Gjermania. Benzina atje kushton mesatarisht 22 cent më pak për litër, ndërsa nafta është 6 cent më lirë. Megjithatë, kursimet më të mëdha regjistrohen në Poloni dhe Republikën Çeke, ku shoferët mund të paguajnë deri në 35 cent më pak për litër benzinë, krahasuar me çmimet në Gjermani. Edhe Luksemburgu mbetet ndër vendet më të favorshme për mbushje, me benzinë 24 cent dhe naftë 16 cent më të lira.

Nga ana tjetër, jo të gjitha shtetet ofrojnë përfitime në çmim. Zvicra, për shembull, ka çmime më të larta se Gjermania dhe fqinjët e saj, ndaj rekomandohet që shoferët të furnizohen para se të kalojnë kufirin. E njëjta situatë vlen edhe për Italinë dhe Holandën, ku karburanti është dukshëm më i shtrenjtë.

Ekspertët këshillojnë që shoferët të planifikojnë furnizimin me karburant në mënyrë strategjike, idealisht gjatë orëve të mbrëmjes, kur çmimet janë zakonisht më të ulëta. Po ashtu, shmangia e stacioneve në autostrada dhe përdorimi i aplikacioneve për krahasim çmimesh mund të sjellë kursime shtesë, transmeton albinfo.ch.

Shqipëri -Serbi: Largimi i simboleve të UÇK-së nga stadiumi nxit reagime

Posted on by albinfo.ch

Largimi i simboleve të Ushtrisë Çlirimtare të Kosovës (UÇK) nga stadiumi “Air Albania” gjatë ndeshjes Shqipëri – Serbi, e zhvilluar të shtunën mbrëma dhe që përfundoi pa gola, ka ngjallur reagime të ashpra në të dy anët e kufirit, transmeton albinfo.ch.

Organizata e Veteranëve të Luftës së Ushtrisë Çlirimtare të Kosovës (OVL-UÇK) ka reaguar me një deklaratë të ndjerë, duke e cilësuar këtë akt si goditje ndaj kujtesës historike dhe sakrificës së dëshmorëve.

“Na dhemb zemra oj nanë Shqipni. Kur preket flamuri i UÇK-së, preket gjaku i Dëshmorëve tanë. Ai flamur është varri i atyre që s’u kthyen kurrë. Nuk kërkojmë asgjë më shumë veçse respekt,” thuhet në deklaratën e organizatës.

Pamje të shpërndara në rrjete sociale tregojnë policë shqiptarë duke larguar tifozë nga stadiumi për shkak të veshjeve apo flamujve me simbole të UÇK-së. Në një video të publikuar nga ish-kryeministri dhe kreu i Partisë Demokratike të Shqipërisë, Sali Berisha, shihen qartë momente kur një tifoz largohet nga policia shqiptare për shkak të një fanelle me stampë të UÇK-së, transmeton albinfo.ch.

“As në Beograd nuk ndodh! Dënoj me neveri një akt të tillë të shëmtuar antidemokratik prej vasali të Edi Ramës dhe narko-regjimit të tij!” ka shkruar Berisha në rrjete sociale.

Në një tjetër reagim, politikani demokrat Shyqyri Myrtollari ka publikuar një video ku flamuri i UÇK-së largohet nga tribuna e stadiumit nga ana e policisë. Ai e ka cilësuar këtë veprim si fyerje ndaj të rënëve për atdheun dhe si një kërcënim për unitetin kombëtar.

“Në një vend ku shteti dhe policia nuk respektojnë simbolet e rezistencës kombëtare, forcohet tendenca e përçarjes dhe dobësohet ndjenja e unitetit kombëtar. Mallkuar qoftë kush nuk na do bashkë!” ka shkruar Myrtollari.

Ndeshja Shqipëri – Serbi ishte pjesë e ciklit kualifikues për Kampionatin Botëror 2026 dhe u zhvillua në një atmosferë të tensionuar, nën masa të shtuara sigurie, transmeton albinfo.ch.

Nga Liqeni i Cyrihut në Malet Neuchâtel: Tregu i pasurive të paluajtshme në dy botë të kundërta

Posted on by albinfo.ch

Nga lartësitë panoramike të Kilchberg në brigjet e Liqenit të Cyrihut, deri te qetësia industriale e Le Locle në Malet Neuchâtel, tregu i pasurive të patundshme në Zvicër ndan dy realitete kontradiktore. Në njërën anë, luks milionësh dhe kërkesë e lartë nga investitorë ndërkombëtarë. Në tjetrën, çmime të ulëta dhe ndërtesa që presin rilindjen urbane, shkruan RTS, transmeton albinfo.ch.

Në Kilchberg, Claudio dhe Ingila Baumann menaxhojnë prona që shkojnë deri në 35,000 franga për metër katror. Një papafingo dupleks me pamje madhështore nga liqeni ofrohet për më shumë se tetë milionë franga. Apartamente me kopsht dhe pesë dhoma arrijnë në 4.8 milionë. Klientët? Një miks ndërkombëtar dhe vendas me pasuri të konsiderueshme, që shpesh kërkojnë diskrecion të plotë, aq sa as nuk paraqiten personalisht në aktin e blerjes.

Ndërkohë, në Le Locle, Sadry Ben Brahim shet një papafingo të bollshme për vetëm 625,000 franga. Me tre vende parkimi, tarracë dhe 202 metra katrorë, prona qëndron prej muajsh në treg. Çmimet aty janë aq të ulëta, sa shumë blerës zhvendosen nga qytete si Neuchâtel për të përfituar nga oferta që përndryshe do të ishin të paarritshme, transmeton albinfo.ch.

Por ndryshimi nuk është vetëm ekonomik, është edhe strukturor. Kilchberg ofron shkolla ndërkombëtare, lidhje të shpejta me Cyrihun dhe Zugun dhe është bërë një magnet për profesionistët e sektorit të teknologjisë dhe financës. Le Locle, në anën tjetër, mbetet e varur nga industria e orëve dhe përballet me sfida të mëdha infrastrukturore dhe imazhi publik.

Megjithatë, po fryjnë erëra ndryshimi. Me ndërtimin e një tuneli modern që do të ulë ndjeshëm trafikun kalimtar deri në vitin 2032, Le Locle synon një ringjallje. Planet për rivitalizimin e qendrës dhe investimet në infrastrukturë, si rinovimi i pishinës historike komunale, dëshmojnë për ambicien e qytetit për të tërhequr më shumë banorë dhe turistë.

E ardhmja? Mbetet për t’u parë. Por historia e Kilchberg dhe Le Locle është një reflektim i realitetit më të gjerë të Zvicrës: një vend me ekuilibër të jashtëzakonshëm midis luksit të përqendruar dhe potencialit të fshehur. Dhe ndërsa çmimet në breg të liqenit mbeten të paarritshme për shumicën, qytete si Le Locle ofrojnë një kujtesë se vlera nuk matet vetëm me franga për metër katror, por edhe me potencialin për ndryshim, transmeton albinfo.ch.

Thirrje anti-shqiptare dhe incidente nga tifozët serbë në Vjenë pas ndeshjes Shqipëri – Serbi

Posted on by albinfo.ch

Ndeshja e kualifikimeve për Kupën e Botës mes Shqipërisë dhe Serbisë, që përfundoi pa gola (0-0) në Tiranë, u shoqërua me tensione jo vetëm në stadium, por edhe në disa qytete të tjera evropiane, përfshirë kryeqytetin austriak, Vjenën, shkruan Heute, transmeton albinfo.ch.

Në rrugën Ottakringer Straße, të njohur ndryshe si “Balkan Mile”, atmosfera festive para ndeshjes u shndërrua në tension pas përfundimit të saj. Sipas një videoje të shpërndarë në rrjete sociale, disa tifozë serbë u mblodhën përpara një restoranti ballkanas dhe situata degradoi. Fishekzjarre u hodhën edhe në drejtim të forcave policore që ndodheshin në vendngjarje, ndërsa dëgjoheshin brohoritje me përmbajtje urrejtjeje ndaj shqiptarëve.

Policia e Vjenës, në një përgjigje për gazetën “Heute”, konfirmoi se rreth 40 tifozë serbë u shoqëruan nga oficerët. Sipas autoriteteve, para ndeshjes situata ishte e qetë, ndërsa pas saj u raportuan disa shkelje të rendit publik dhe shqetësime për zhurmë në zonë.

Hetimet nuk përfundojnë këtu. Për shkak të përmbajtjes diskriminuese të brohoritjeve dhe thirrjeve anti-shqiptare, autoritetet austriake kanë nisur analizën e materialeve filmike të publikuara në rrjete sociale. Policia nuk përjashton mundësinë që ditëve në vijim të pasojnë procedura të tjera ligjore dhe raportime shtesë, transmeton albinfo.ch.

Austria rrit çmimet e patentës së shoferit dhe KlimaTicket nga korriku dhe gushti

Posted on by albinfo.ch

Nga korriku dhe gushti, qytetarët në Austri do të përballen me tarifa më të larta për dokumentet e drejtimit dhe transportin publik, si pjesë e një pakete të re të kursimeve të qeverisë federale, shkruan The Local, transmeton albinfo.ch.

Duke filluar nga 1 korriku, do të hyjnë në fuqi tarifat e reja për patentën e drejtimit. Tarifa për lëshimin e një patente të re do të jetë 178 euro, që përfaqëson një rritje prej 58.20 euro. Ndërkohë, aplikimi për patentë të re do të kushtojë 90 euro, duke u rritur me 29.50 euro.

Ndryshimet janë pjesë e një reforme më të gjerë që synon përafrimin e tarifave administrative me normat e inflacionit dhe sigurimin e të ardhurave shtesë për buxhetin shtetëror.

Po ashtu, nga 1 gushti, do të rritet edhe çmimi i KlimaTicket,  bileta vjetore për transportin publik në të gjithë vendin. Çmimi i saj do të shkojë nga 1,095 euro në 1,300 euro. Një rritje tjetër prej 100 euro është paralajmëruar për vitin 2026, transmeton albinfo.ch.

Përveç këtyre, qeveria do të ndërpresë edhe disa nga përjashtimet dhe subvencionet aktuale, duke përfshirë:

  • Heqjen e përjashtimit nga TVSH-ja për sistemet fotovoltaike (PV),

  • Heqjen e përjashtimit nga taksa e sigurimit për automjetet elektrike,

  • Ndërprerjen e KlimaTickets falas për të rinjtë 18-vjeçarë.

Këto masa janë pjesë e planit të konsolidimit buxhetor për vitet 2025-2026, me synimin për të stabilizuar financat publike. Megjithatë, ato pritet të kenë ndikim të drejtpërdrejtë te qytetarët, veçanërisht ata që mbështeten në shërbimet publike dhe në stimujt për lëvizshmëri të gjelbër.

Qytetarët këshillohen që, nëse planifikojnë të aplikojnë ose të rinovojnë patentën apo KlimaTicket, ta bëjnë këtë përpara hyrjes në fuqi të tarifave të reja, transmeton albinfo.ch.

BE drejt uljes së kompensimeve për vonesat e fluturimeve

Posted on by albinfo.ch

Pasagjerët që udhëtojnë me avion në hapësirën e Bashkimit Evropian mund të përballen së shpejti me kufizime të reja në të drejtën për kompensim financiar në rast vonese ose anulimi të fluturimeve. Këshilli i BE-së ka rënë dakord për një reformë të diskutueshme që pritet të ndikojë drejtpërdrejt udhëtarët, duke ndryshuar rregullat ekzistuese mbi kompensimet e linjave ajrore, shkruan The Local, transmeton albinfo.ch.

Aktualisht, pasagjerët kanë të drejtë për kompensim në vlerë prej 250 deri në 600 euro nëse një fluturim vonohet më shumë se tre orë, për aq kohë sa përgjegjësia është e linjës ajrore. Megjithatë, me ndryshimet e reja, kjo e drejtë do të kufizohet.

Sipas vendimit të miratuar në një samit të Këshillit Evropian, kompensimi për fluturimet e shkurtra dhe mesatare do të ofrohet vetëm nëse vonesa kalon katër orë, ndërsa për fluturimet mbi 3,500 kilometra, kompensimi do të jepet vetëm pas një vonese prej së paku gjashtë orësh.

Shumat e reja të kompensimit do të jenë 300 euro për vonesa mbi katër orë dhe 500 euro për vonesa mbi gjashtë orë. Rregullat aktuale mbeten në fuqi deri në një vendim përfundimtar të Parlamentit Evropian, i cili ka afat katër muaj për të paraqitur kundërshtime apo ndryshime, transmeton albinfo.ch.

Vendimi ka ngjallur reagime të përziera, veçanërisht për shkak se u mor përmes një procedure që shmang konsultimin e drejtpërdrejtë me Parlamentin. Gjermania dhe Spanja ishin ndër shtetet që shprehën rezerva ndaj këtij ndryshimi.

Industria e aviacionit, e cila ka lobuar fuqishëm për ndryshimet, argumenton se kompensimet e larta janë të papërballueshme, sidomos për linjat me kosto të ulët, ku ndonjëherë kompensimi i kalon vlerën e vetë biletës. Linjat ajrore gjithashtu kërkojnë një proces më të thjeshtë për kompensimet dhe më pak ambiguitet në rastet e rrethanave të jashtëzakonshme.

Ndërkohë, nuk parashikohen ndryshime në të drejtat e pasagjerëve për sa i përket ofrimit të ushqimit, akomodimit apo udhëtimit alternativ në rast të vonesave apo anulimeve. Po ashtu, rregullat që përjashtojnë kompensimet në rast të motit ekstrem, paqëndrueshmërisë politike apo çështjeve të sigurisë mbeten të pandryshuara.

Nëse Parlamenti Evropian nuk kundërshton vendimin brenda katër muajve, rregullat e reja do të hyjnë në fuqi me një datë që do të përcaktohet më vonë, transmeton albinfo.ch.

Zvicra synon të shkurtojë 15% të vendeve të punës në administratën federale

Posted on by albinfo.ch

Zvicra po përgatitet për një valë të re masash shtrënguese, ku në qendër është administrata federale me rreth 40,000 të punësuar. Në përpjekje për të ulur kostot publike, disa deputetë konservatorë në Këshillin Kombëtar, të udhëhequr nga përfaqësuesi i SVP-së, Erich Hess, propozojnë një plan për eliminimin e 15% të vendeve të punës në administratë brenda një dekade, ekuivalente me rreth 6,000 pozicione, shkruan 20minuten, transmeton albinfo.ch.

Hess thekson se ky reduktim mund të realizohet pa shkarkime, duke përfituar nga pensionimi natyral i rreth 30% të forcës aktuale të punës në dhjetë vitet e ardhshme. Ai e konsideron këtë një “mundësi unike” për të modernizuar dhe thjeshtuar administratën publike pa prekur drejtpërdrejt punonjësit.

Plani gjen përkrahje edhe përtej partisë SVP. Deputetët Thomas Rechsteiner (Qendër) dhe Marcel Dobler (FDP) janë bashkë-nënshkrues të mocionit. Dobler argumenton se shteti duhet të përballet me të njëjtin presion për eficiencë si çdo kompani private. Megjithatë, ai paralajmëron kundër rrezikut që pozicionet e humbura të zëvendësohen me kontrata të jashtme, gjë që mund të rrisë më tej kostot, ndaj ai sugjeron që kufizimet buxhetore mund të jenë mjet më efektiv për uljen e shpenzimeve, transmeton albinfo.ch.

Nga ana tjetër, kundërshtimi nga spektri i majtë është i ashpër. Sarah Wyss, këshilltare kombëtare e SP-së dhe kryetare e Komitetit të Financave, e quan mocionin “polemik dhe të parealizueshëm”. Ajo vëren se afërsisht gjysma e punonjësve federalë janë të përfshirë në sektorin e sigurisë, si rojet kufitare, policia federale dhe ushtria, dhe vë në dukje kontradiktën që qëndron në dëshirën e partive konservatore për të rritur këto kapacitete, ndërsa paralelisht kërkojnë shkurtimin e vendeve të punës.

Wyss shton se, megjithëse automatizimi dhe inteligjenca artificiale mund të rrisin efikasitetin, sfidat janë gjithashtu në rritje për shkak të zgjerimit të popullsisë. Sipas saj, nuk ka më vend për shkurtime të mëtejshme pa pasoja të dukshme për shërbimet publike. “Limoni është shtrydhur deri në fund”, përfundon ajo, transmeton albinfo.ch.

Gjermania në rrezik recesioni dyvjeçar nëse përshkallëzohet lufta tregtare me SHBA-në

Posted on by albinfo.ch

Gjermania mund të përballet me dy vite të tjera recesioni nëse lufta tregtare me Shtetet e Bashkuara përshkallëzohet ndjeshëm, paralajmëroi të premten Bundesbank, banka qendrore e vendit. Kjo është një goditje e re për ekonominë më të madhe të Evropës, e cila tashmë ndodhet në një periudhë të zgjatur vështirësie, shkruan The Local, transmeton albinfo.ch.

Sipas skenarit të përkeqësuar të parashikuar nga Bundesbank, nëse tarifat e shpallura nga ish-presidenti amerikan Donald Trump do të zbatohen plotësisht nga korriku 2025 dhe Bashkimi Evropian do të hakmerrej, atëherë prodhimi ekonomik gjerman pritet të bjerë me 0.5% këtë vit dhe me 0.2% në vitin 2026.

Ky skenar përfshin “një rënie të ndjeshme të eksporteve dhe një nivel të lartë pasigurie që ndikon negativisht në investime”, tha Bundesbank në deklaratën e saj. Megjithatë, institucioni parashikon një rikthim modest në vitin 2027, me një rritje prej 1%.

Lufta tregtare ka potencialin të godasë rëndë sektorët më të fuqishëm të eksportit në Gjermani. Shtetet e Bashkuara ishin partneri më i madh tregtar i Gjermanisë në vitin 2024, duke importuar kryesisht automjete, produkte farmaceutike dhe makineri, transmeton albinfo.ch.

Agjencia federale gjermane e punësimit paralajmëron se tarifat prej 25% nga ana e SHBA-së mund t’i kushtojnë Gjermanisë rreth 90,000 vende pune brenda një viti. “Mungesa e parashikueshmërisë nga SHBA po dëmton seriozisht tregun gjerman të punës”, tha shefja e agjencisë, Andrea Nahles, për gazetën Sueddeutsche Zeitung. Sipas saj, kjo situatë po i ndalon kompanitë të investojnë, punësojnë dhe trajnojnë punonjës të rinj.

Përveç skenarit më të keq, Bundesbank paraqiti edhe një parashikim bazë, më të moderuar, ku efektet e politikave të Trump do të jenë të kufizuara. Sipas këtij skenari, ekonomia gjermane do të ngecë në vitin 2025, për të kaluar në një rritje të lehtë prej 0.7% në 2026 dhe 1.2% në 2027. Kjo parashikohet të ndodhë falë shtimit të investimeve në infrastrukturë dhe mbrojtje nga qeveria e re e Kancelarit Friedrich Merz.

Megjithatë, pasiguria e madhe rreth zhvillimeve tregtare po i detyron institucionet gjermane të ulin pritshmëritë për rritje ekonomike. Qeveria gjermane dhe institutet ekonomike kryesore tashmë e kanë ulur parashikimin për rritjen në vitin 2025 në zero, transmeton albinfo.ch.

Zvicër: Rënie e vdekshmërisë tek grupmoshat nën 65 vjeç

Posted on by albinfo.ch

Rreth 740 persona më pak se sa pritej statistikisht vdiqën në Zvicër në periudhën midis mesit të janarit dhe fundit të prillit 2025, në grupmoshën nën 65 vjeç. Këtë e tregojnë të dhënat më të fundit nga Zyra Federale e Statistikave (BfS), shkruan CH Media, transmeton albinfo.ch.

Rënia konsiderohet jashtëzakonisht e ndjeshme dhe ka habitur edhe ekspertët. BfS ka konfirmuar se nuk ka ndryshuar metodat e mbledhjes së të dhënave, ndërsa një shpjegim përfundimtar pritet vetëm pasi të publikohen statistikat zyrtare për shkaqet e vdekjeve, gjë që nuk do të ndodhë para vitit 2026 për shkak të vonesave në raportim.

Epidemiologu i njohur Christian Althaus tha se është i habitur nga ky fenomen dhe sugjeroi se ndoshta po shohim një kombinim të një tendence në rënie që ekzistonte para pandemisë dhe një efekt kompensues pas vdekshmërisë së lartë nga COVID-19 në vitet e mëparshme.

Për grupmoshën mbi 64 vjeç, rënia nuk është reale, por lidhet me metodologjinë e përllogaritjes së pritshmërive. Viti 2022 është përfshirë në bazën krahasuese, ndonëse pati ende vdekshmëri të lartë pas pandemisë, gjë që ka ndikuar në rritjen artificiale të pritshmërisë statistikore, transmeton albinfo.ch.

Në plan afatgjatë, Zvicra ka parë një rënie të vazhdueshme të vdekjeve nga shkaqe të zakonshme si kanceri dhe sëmundjet kardiovaskulare. Sidomos në vitin 2023 është vërejtur një ulje e dukshme e vdekjeve nga kanceri, që sipas ekspertëve lidhet me përmirësimin e terapive dhe diagnostikimin e vonuar gjatë pandemisë, kur më pak qytetarë kërkuan ndihmë mjekësore. Fenomen të ngjashëm ka përjetuar edhe Gjermania, ku u raportuan më pak trajtime për kancerin se në vitet para COVID.

Faktorë të tjerë si vdekjet nga ortekët (vetëm 10 këtë vit, krahasuar me një mesatare prej 19) apo shpërndarja kantonale nuk mjaftojnë për të shpjeguar rënien e përgjithshme, e cila është konstatuar në pothuajse të gjitha rajonet, me përjashtim të kantonit të vogël Appenzell Ausserrhoden, transmeton albinfo.ch.

Rritet numri i përfituesve të ndihmës për kujdes afatgjatë në Austri

Posted on by albinfo.ch

Numri i personave që marrin ndihmë financiare për kujdes afatgjatë në Austri është rritur sërish gjatë pranverës së vitit 2025. Sipas të dhënave më të fundit të publikuara nga Ministria e Çështjeve Sociale, deri në prill 2025, 499.112 persona përfitonin ndihmë në para, shkruan ORF, transmeton albinfo.ch.

Krahasuar me muajin mars 2025, kur kishte 498.053 përfitues, kjo përfaqëson një rritje prej 1.059 personash, ose 0,21 për qind. Rritja bëhet edhe më e theksuar nëse krahasohet me të njëjtën periudhë të vitit të kaluar: në mars 2024, numri i përfituesve ishte 487.644, që do të thotë se brenda një viti janë shtuar 10.409 përfitues, një rritje vjetore prej 2,13 për qind.

Sipas Ministrisë, shumica dërrmuese e përfituesve janë gra, çka lidhet me jetëgjatësinë më të lartë mes femrave dhe përqindjen më të madhe të tyre që kanë nevojë për përkujdesje në moshë të shtyrë.

Rritja graduale e përfituesve reflekton plakjen e popullsisë dhe sfidat gjithnjë në rritje në sektorin e kujdesit afatgjatë në Austri, transmeton albinfo.ch.

Trump dërgon 2,000 trupa të Gardës Kombëtare në Los Angeles për shkak të protestave

Posted on by albinfo.ch

Administrata e Presidentit të SHBA-së, Donald Trump, ka njoftuar të shtunën vendosjen e 2,000 trupave të Gardës Kombëtare në qytetin e Los Angeles, pas përleshjeve të dhunshme mes protestuesve dhe forcave të sigurisë, të shkaktuara nga bastisjet e fundit të agjentëve të Imigracionit dhe Doganave (ICE), shkruan DW, transmeton albinfo.ch.

Sipas Sekretares së Shtypit të Shtëpisë së Bardhë, Karoline Leavitt, trupat do të ndihmojnë në “adresimin e paligjshmërisë” pas bastisjeve që çuan në arrestimin e dhjetëra emigrantëve të premten. “Turmat e dhunshme kanë sulmuar oficerët që kryejnë operacione bazë deportimi. Kjo është arsyeja pse Presidenti Trump ka nënshkruar një Memorandum Presidencial për vendosjen e Gardës Kombëtare,” tha Leavitt.

Car-i i kufirit i Trump, Tom Homan, konfirmoi për Fox News se trupat do të dislokohen që sonte. “Po e bëjmë Los Anxhelosin më të sigurt. Kryetarja e bashkisë duhet të na falënderojë,” deklaroi ai.

Por vendimi ka hasur në kundërshtime të forta nga zyrtarët lokalë. Kryebashkiakja e Los Anxhelosit, Karen Bass, dënoi aksionet e ICE, duke i quajtur “terr për komunitetet tona”, ndërsa Guvernatori i Kalifornisë, Gavin Newsom, e cilësoi ndërhyrjen federale si “qëllimisht nxitëse” dhe paralajmëroi se ajo vetëm sa do të përshkallëzojë tensionet, transmeton albinfo.ch.

Protestat që shpërthyen pas arrestimeve janë përshkallëzuar për të dytën ditë radhazi. Skena të tensionuara janë regjistruar në juglindje të qytetit, ku agjentët federalë përdorën gaz lotsjellës për të shpërndarë demonstruesit që, sipas autoriteteve, kishin “rrethuar një ndërtesë federale, dëmtuar pronë publike dhe sulmuar oficerët”.

Sipas Departamentit të Sigurisë Kombëtare, operacionet e së premtes rezultuan në arrestimin e 118 emigrantëve pa dokumente. Protestuesit dhe zyrtarët lokalë thonë se kjo qasje ekstreme është një përpjekje politike nga administrata Trump për të forcuar bazën e saj konservatore.

Drejtori i përkohshëm i ICE-së, Todd Lyons, paralajmëroi se “protestuesit e dhunshëm do të mbahen përgjegjës”, ndërsa ndihmësi i Shtëpisë së Bardhë, Stephen Miller, i quajti protestat një “kryengritje kundër ligjeve dhe sovranitetit të Shteteve të Bashkuara”, transmeton albinfo.ch.

Pezullohet qarkullimi i trenave në Cyrih për shkak të dëmeve nga moti

Posted on by albinfo.ch

Qarkullimi i trenave në linjën mes Zurich HB dhe Zurich Oerlikon është pezulluar që nga orët e para të së dielës, si pasojë e dëmeve të rënda të shkaktuara nga moti dhe një shpërthim tubi uji në zonën e Wipkingen, shkruan 20minuten, transmeton albinfo.ch.

Sipas një zëdhënësi të SBB, si pasojë e shpërthimit, gurë kanë rënë mbi shina, duke e bërë të pamundur lëvizjen e trenave në këtë segment. Linjat IR75 dhe S24 janë ndër më të prekurat nga situata.

Autoritetet njoftojnë se qarkullimi i rregullt nuk pritet të rikthehet para orës 12:00 të mesditës së sotme. Përveç pezullimit të linjës, SBB paralajmëron për vonesa, anulime dhe devijime të mundshme në itineraret e tjera për shkak të ngjarjes, transmeton albinfo.ch.

Shumë lugina zvicerane përballen me rrezik të konsiderueshëm rrëshqitjeje dheu

Posted on by BR

Ndoshta rasti më i njohur i rrezikut të lartë të rrëshqitjeve të dheut është aktualisht në Brienz, në kantonin e Bernës. Rreth 80 banorë të fshatit në Luginën e Albulas janë evakuuar që nga nëntori për shkak të kërcënimit të një orteku shkëmbinjsh. Por kjo nuk është e gjitha. I gjithë mali mbi fshat është monitoruar intensivisht për vite me radhë dhe, sipas komunës përgjegjëse të Albulas, është “shpati më i monitoruar në Evropë”, raporton Swissinfo.ch, transmeton albinfo.ch.

Në pranverën e vitit 2023, rreth 1.2 milion metra kub mbeturina u shkëputën dhe u ndalën pak para fshatit. Të gjithë banorët u evakuuan herët edhe atëherë.

Shembulli i rrëshqitjes së dheut në Bondo, në Bregaglia, tregon se kjo nuk është gjithmonë e suksesshme. Aksidenti në Piz Cengalo mori tetë jetë në vitin 2017, kur tre milionë metra kub shkëmb ranë nga krahu i tij verior. Vetëm pak javë më parë, tre milionë metra kub shkëmb dhe baltë varrosën fshatin Blatten në kantonin Valais.

Zona të tjera me një rrezik të konsiderueshëm të rënies së shkëmbinjve dhe rrëshqitjeve të dheut mund të gjenden midis Thusis dhe Andeer, në pyllin e Rinit pranë Sufers dhe Splügen, pranë Savognin dhe Mulegns në Qafën Julier dhe në Engadin pranë Pontresina dhe Samedan, si dhe në Susch, Lavin dhe Zernez. Rrëshqitjet e shkëmbinjve mund të priten gjithashtu në Poschiavo, Bregaglia dhe Misox, në malësitë e kantonit Graubünden, në Domleschg dhe pranë Chur në Felsberg. Një vështrim në hartën interaktive të rrezikut të kantonit Graubünden e tregon këtë, transmeton albinfo.ch.

Mbi 5,000 shtëpi në rrezik

Nga një total prej 170,000 ndërtesash në kanton, 10% ndodhen brenda zonave të përgjithshme të rrezikut natyror, siç mund të shihet nga udhëzuesi kantonal për hartat e rrezikut. Nga këto ndërtesa, një e treta janë të banuara  që përbëjnë 5,100 ndërtesa banimi. Një e treta tjetër e këtyre 10% përdoren për bujqësi, një e pesta janë industriale dhe tregtare, dhe pjesa tjetër përdoret për qëllime të tjera.

Përveç rrëzimeve të shkëmbinjve dhe rrëshqitjeve të dheut, Graubünden është gjithashtu në rrezik nga ortekët, rrjedhjet e mbeturinave, përmbytjet, rrëshqitjet e dheut, shembjet dhe tërmetet. Ky i fundit mbart rrezikun më të madh, tha specialisti kantonal i rreziqeve natyrore Urban Maissen për gazetën Südostschweiz në fund të majit. Një tërmet me magnitudë 5.6 në zonën e Chur mund të marrë jetë të panumërta dhe të shkaktojë miliarda dëme, tha Maissen për gazetën e përditshme.

Ndeshja Shqipëri – Serbi mbyllet me rezultat të barabartë, 0:0

Posted on by albinfo.ch

Një ndeshje cilësore dhe me mjaft raste për të shënuar ka përfunduar me rezultat të barabartë, 0 me 0. Kombëtarja shqiptare ka zhvilluar një lojë mjaft të mirë dhe dinamike, por pa mundur të kurorëzojë me gol sulmet e saj të shumta drejt portës së kundërshtarit.

Dështimi i Manajt për të shënuar golin nga penaltia në minutën e 45-të ka “vulosur” fatin e ndeshjes, e cila fare mirë mund të mbyllej me fitore të skuadrës sonë.

Kështu, Shqipëria vijon të qëndrojë në vendin e dytë në renditje me 4 pikë, pas Anglisë që ka nëntë, Letonisë me tri, Serbisë me një dhe Andorrës ende pa pikë.

Takimi tjetër do të jetë ai pas tre ditësh kundër Letonisë në transfertë.

Meta arrin marrëveshje me reaktor bërthamor për 20 vjet për energji

Posted on by BR

Meta njoftoi se ka arritur një marrëveshje për të mbajtur një reaktor bërthamor të një kompanie amerikane të shërbimeve në Illinois në funksion për 20 vjet.

Marrëveshja e Meta-s me Constellation Energy është e para e kompanisë së rrjeteve sociale me një central bërthamor. Kompani të tjera të mëdha teknologjike po kërkojnë të sigurojnë energji elektrike, ndërsa kërkesa në SHBA rritet ndjeshëm, pjesërisht për shkak të nevojave të inteligjencës artificiale.

Google ka arritur marrëveshje për të furnizuar qendrat e të dhënave me energji bërthamore nëpërmjet 6 reaktorëve të vegjël të ndërtuar nga një kompani e shërbimeve në Kaliforni. Kontrata e ngjashme e Microsoft do të rihapë centralin bërthamor Three Mile Island, vendin e aksidentit më të rëndë bërthamor në historinë e SHBA-së, shkruan Scan, transmeton albinfo.ch.

Illinois do të ndihmojë në subvencionimin e centralit bërthamor të Constellation Energy, me një program kreditimi me emetime zero të financuar nga taksapaguesit. Ky program skadon në vitin 2027, kur Meta do të nisë mbështetjen e termocentralit me një shumë të papërcaktuar parash për të ndihmuar me operacionet.

Marrëveshja i lejon Constellation të zgjerojë qendrën e energjisë Clinton, që ka një kapacitet prej 1.121 megavatësh, me 30 MW të tjerë. Termocentrali furnizon me energji ekuivalentin e rreth 800.000 shtëpive amerikane. Clinton filloi operimet në vitin 1987 dhe vitin e kaluar Constellation aplikoi në Komisionin Rregullator Bërthamor të SHBA-së për të rinovuar licencën e saj deri në vitin 2047.

Marrëveshja mund të shërbejë si model për kompanitë e tjera të mëdha të teknologjisë për të mbështetur energjinë ekzistuese bërthamore, ndërsa përpiqen të zgjerojnë investimet për inteligjencën artificiale dhe qendrat e të dhënave.

Zvicër: Sa ka ekuilibër mes grave dhe burrave për punët e shtëpisë

Posted on by BR

Shifrat më të fundit:
Sipas shifrave të publikuara nga Zyra Federale e Statistikave, gratë vazhdojnë të marrin përsipër një pjesë dukshëm më të lartë të punës së papaguar. Ato shpenzojnë mesatarisht 61 përqind të kohës së tyre të punës në aktivitete të papaguara, krahasuar me vetëm 42 përqind për burrat, raporton SRF, transmeton albinfo.ch.

Arsyet:
Cyrielle Huguenot, Sekretare Qendrore e Federatës Zvicerane të Sindikatave, e sheh arsyen kryesore si krijimin e një familjeje. “Ekuilibri midis punës dhe familjes është i vështirë në Zvicër, dhe kujdesi për fëmijët është jashtëzakonisht i kushtueshëm”, shpjegon ajo. Të kesh të dy prindërit që punojnë me orar të plotë në përgjithësi nuk është e vlefshme financiarisht  kostot e kujdesit ditor dhe progresioni tatimor gërryejnë të ardhurat e dyta të çifteve të martuara. Përveç kësaj, shumë prej tyre kënaqen duke kaluar kohë me fëmijët e tyre dhe falë pagave të larta, ata gjithashtu mund të përballojnë të kalojnë kohë në shtëpi, transmeton tutje albinfo.ch.

Çiftet mund ta bëjnë llogaritjen:
Nga një perspektivë ekonomike, mund të jetë më tërheqëse për njërin bashkëshort të zvogëlojë ngarkesën e punës dhe në vend të kësaj të bëjë më shumë punë të papaguar, e cila më pas nuk ka pse të delegohet me shpenzime të mëdha. Por pse ndodh zakonisht kjo me nënën? “Gratë shpesh punojnë në punë me paga më të ulëta”, thotë Huguenot. Stereotipet gjinore gjithashtu luajnë një rol: “Ekziston presion shoqëror që i bën gratë të ndihen fajtore: ‘Nuk mund të punoj 100 për qind, nuk është mirë për fëmijën'”. Ky presion rëndon më shumë mbi gratë sesa mbi burrat.

Pasojat:
Sa më shumë gra punojnë pa pagesë në shtëpi në vend që të punojnë në zyrë, në industri ose në punë të tjera të paguara, aq më e keqe është situata e tyre profesionale.

Kjo është ajo që nevojitet:
“Kujdesi për fëmijët duhet të zgjerohet urgjentisht si një shërbim publik”, thotë Huguenot. Krahasuar ndërkombëtarisht, Zvicra renditet dobët kur bëhet fjalë për balancimin e punës dhe jetës familjare. “Leja më e gjatë prindërore, si në vendet e tjera, do të ishte gjithashtu e rëndësishme. Pas një leje më të gjatë, më shumë gra do të ktheheshin në punë sepse fëmijët e tyre nuk janë më aq të vegjël”, është e bindur Huguenot.

 

 

Norma referuese e qirasë zvicerane mbetet e pandryshuar

Posted on by BR

Norma referuese e hipotekës në Zvicër, një shifër kyçe e përdorur për të përcaktuar qiratë sipas kontratave ekzistuese të qirasë, mbeti e pandryshuar në 1.5% në qershor, sipas përditësimit të fundit nga Zyra Federale e Strehimit (FHO).

Norma u ul për herë të fundit me 25 pikë bazë në mars 2025, duke shkaktuar një valë kërkesash për ulje të qirasë nga qiramarrësit, të cilat do të hyjnë në fuqi duke filluar nga korriku.

E prezantuar në vitin 2008, norma referuese llogaritet bazuar në normat mesatare të hipotekës të ofruara nga bankat zvicerane, të rrumbullakosura në çerekun më të afërt të pikës përqindjeje. Ajo shërben si standard kombëtar për rregullimin e qirave në përgjigje të lëvizjeve të normës së interesit, transmeton albinfo.ch.

Një rritje prej 0.25 pikësh përqindjeje u lejon qiradhënësve të rrisin qiratë deri në 3%, me kusht që qiraja të indeksohet me normën e mëparshme referuese. Anasjelltas, një rënie me të njëjtën madhësi u jep të drejtë qiramarrësve të kërkojnë një ulje të qirasë prej 2.91%.

Megjithatë, për momentin, si qiramarrësit ashtu edhe pronarët do të duhet të presin me qetësi. Me normën që mbetet e qëndrueshme, nuk shkaktohen rregullime automatike të qirasë  të paktën deri në shqyrtimin e ardhshëm.

Nis ndeshja Shqipëri – Serbi

Posted on by albinfo.ch

Në orën 20:45 ka filluar në stadiumin “Air Albania” ndeshja Shqipëri – Serbi, që luhet në kuadër të kualifikimeve për Kupën e Botës 2026.

Shqipëria ka mbledhur deri tani 3 pikë nga dy ndeshje të luajtura, ndërsa për Serbinë kjo do të jetë ndeshja e parë në grup. Kujtojmë që sfidat mes këtyre dy ekipeve kanë pasur gjithmonë tensione dhe emocione të veçanta.

Në prag të ndeshjes, përzgjedhësi i Shqipërisë, Sylvinho, dhe kapiteni Berat Gjimshiti janë munduar ta mbajnë kontrollin mbi emocionet, duke mos dhënë deklarata të nxituara dhe duke u fokusuar vetëm te përgatitja e skuadrës.

E njëjta gjë vlen edhe për kampin serb, ku Dragan Stojković dhe sulmuesi Aleksandar Mitrović kanë ruajtur qetësinë dhe kanë kërkuar të shmangin çdo tension që mund të dalë jashtë fushe.